¹ Vaho le vita ty lagnitse naho ty tane, naho ty zaka-mana-piay iaby zay mameno aze. ² Tamy ty andro fahafito Andragnahareo le fa namara ty asane zay nataone, le noho zane le nitofa tamy ty asane iaby Re tamy ty andro fahafito. ³ Nitahy ty Andragnahare ty nadro fahafito vaho nagnamasy zane, satria tamy zane ro ntofane tamy ty asa iaby zay nataone tamy ty famorognane. ⁴ Reto ty seho mikasike ty lagnitse naho ty tane, laha namboarine zane, tamy ty andro zay namorogna ty Yaveh Andragnhareo ty tane naho ty lagnitse. ⁵ Tsy mboe nisy kirihitsy ty baibo tegny amy ty tane, vaho tsy mboe nitiry ty zaka-mitiry tegny am-baibo, satria Yaveh Andragnahare tsy mboe nandatsake ora tamy ty tane, vaho tsy nisy ndaty niasa tane. ⁶ Te nisy ado bak'amy ty tane le nandeha ty velara ty tane iaby. ⁷ Nipakopako ty ndaty bak'amy ty leboky ty tane Yaveh Andragnahare, vaho nitiofine tamy ty fofo ty fiay ty fahaveloma ty vava ty orone, le nanjary ondaty. ⁸ Yaveh Andragnahare nagnamboatse baibo tao atignana, tao Edena, vaho natobone tao ty ndaty zay namboarine. ⁹ Tambony ty tane ro nampitiry Yaveh Andragnahare ty hetae iaby zay hisake tr mahafinaritse ty maso sade soa ho amy ty mahatajake. Agnisany zane ty hetae-piay zay teo ampagnivoa ty baibo, naho ty hetae ty fahaiaza ty soa naho ty rate. ¹⁰ Nisy sihanake niboake bak'ao Edena nanondrake ty baibo. Nizarazara bak'agne zane le nanjary sihanake efatse. ¹¹ Pisona ro agnara iaze voalaohane. Reke arere avaoa ro mandeha magnodidy iaze tane iaby ndre havila, zay misy volamena. ¹² Soa ty volamena zane tane zane. Misy bedola naho vato berila avao kea. ¹³ Gihona ro agnara iaze sihanake faharoe. Reke io le mandeha magnera ty tane Kosy. ¹⁴ Ty agnara iaze sihanake fahatelo le Tigra, zay mandeha atignana ndre Asyria. Eofrata ty sihanake faha-efatse. ¹⁵ Nala Yaveh Andragnahare ty lehilahy vaho nampitoboke aze tao amy ty baibo Edena soa hiasa naho hitajake zane. ¹⁶ Nandily an-dralehilahy Yaveh Andragnahare, nanao tihoe: "Bak'amy ty hetae iaby agny amy ty baibo le azonao hihinana. ¹⁷ Te bak'amy iaze hetae ty fahaiza ty soa naho ty rate kea ro tsy azonao hihinana, te amy ty andro hihinananao bak'amu zane, le h maty vantane iriha." ¹⁸ Bak'eo Yaveh Andragnahare nitsara tihoe: "Tsy soa laha raike avao ty lehilahy. hagnamboarako ragnitse sahaza aze re." ¹⁹ Bak'amy ty tane ro nagnamboara Yaveh Andragnahare ty biby ty baibo iaby naho ty voro ty habakabake iaby. Vaho nandesine teo amy ty lehilahy iaby soa hisane zay mete hikaihane aze. Na ino na ino nikaiha ty lehilahy ty zaka-mana-piay kiraikirake, le zane ro agnarane. ²⁰ Nomey ty lehilahy agnara iabu ty biby fihare, ty voro-mitily iaby egny amy ty habakabake, vaho ty bibily ty baibo. Nefa tsy nahisake namana maeva aze ralehilahy. ²¹ Nampatory Yaveh Andragnahare lalike ralehilahy, le natory ralehilahy. Nangalake raiuke tamy ty taolan-tahezena Yaveh Andragnahare nagnakatoke ty nofotse zay nangalane iaze taolan-taheza. ²² Tamy iaze taolan-taheza zay nala Yaveh Andragnahare tamy ty lehilahy, ro nagnamboarane ampela raike naho nandesane aze teo amy ty ralehilahy. ²³ Nanao tihoe ty lehilahy: "Zao kea, le taola bak'amy ty taoloko toy, vaho nofotse bak'amy ty nofotsiko. Hokaihiko tihoe 'Ampela re' re, satria nala bak'amy ty lehilahy." ²⁴ Noho zane hagnenga ty raene naho ty renine ty lehilahy, hiharo amy ty valine re, vaho hajary nofotse raike iareo. ²⁵ Sambe nihalo iareo, ty lehilahy naho ty valine, te tsy nahay megnatse.