¹ Vaho Isaka nikaike andre Jakoba, nitsipi-rano aze, Vaho nandily aze tihoe: "Tsy mahazo mangalake valy amy reo ampela Kananita riha. ² Mitsangàna, le mandena agne Padana-Arama, ho agne amy tarana ndre Betoela baba ty reninao, le mangalà valy agne, raike amy reo anak'ampela ndre Labana, rahalahin-dreninao. ³ Andragnahare Tsitoha vatane hitahy anao, Hampamokatse anao vaho hahalahialy anao, soa hahaavy anao ho firenena maro. ⁴ Homeine anao vatane ty tsipi-rano ndre Abrahama, ho anao, naho ahy reo taranake misolo anao, soa handovanao ty tane ze itobohanao, ze nomein'Andragnahare anre Abrahama." ⁵ Vaho Isaka nampandeha andre Jakoba. Nagnagny Padana-Arama re Jakoba, ho agne amy ndre Ndre Labana ana ndre Betoela Syriana, rahalahy ndre Rebeka, rene ndre Jakoba naho Esao. ⁶ Vaho hisa ndre Esao te nitsipaza ndre Isaka rano Jakoba vaho nompiline tagne Padana-Arama, sao hangalake vale bak'agne. Nahisake avao kea re te nitsipi-rano naho nagnomey baiko aze re Isaka, nanao tihoe: " Tsy mahazo mangalake vale amy reo ampela bak'agne Kanàna riha." ⁷ Hisa ndre Esao avao kea te nagnina ty babane naho renine Jakoba, vaho nandeha tagne Padan-Arama. ⁸ Vaho hisa ndre Esao te tsy tea reo ampela bak'agne Kanà re Isaka babane. ⁹ Kea ankoatse reo vale ze fa nanagnane, le lasa re nagnagny amy ndre Ismaela, vaho nangalake andre Mahalota, anak'ampela ndre Ismaela, ana ndre Abrahama, rahavavy ndre Nebaiota soa ho valine. ¹⁰ Niala tao Beri-sheba re Jakoba nagnagny Harana. ¹¹ Vaho avy teo amy ty toera raike re le nijano teo tagnate ty halike iaby, satria fa noly ty masoandro. Nangalake raike tamy reo vato teo amy zane toera zane re, nametrake zane tao ambane lohane, le nitsilagne teo amy iaze toera mba hatore. ¹² Nagnofe re le nahisake tohatse niore tamy ty tane. Nidofotse tamy ty lagnitse ty legnone vaho niakatse naho nizotso tamy zane reo anjelin'Andragnahare. ¹³ Ingo, Yaveh nitsanga teo amboe zane vaho nitsara tihoe: Raho Yaveh, Andragnahare ndre Abrahama babanao, naho Andragnahare ndre Isaka. Ty tane ze handreanao io, le Himeiko anao naho ty taranagnao. ¹⁴ Hanahake ty leboke amy ty tane ty taragnao, vaho hiele lavitse hatragne andrefa, le hatragne atignana, hatragne avaratse, vaho hatragne atimo riha. Amy ty alalagnao naho amy ty alalagn'reo taranagnao ro hitahia reo longo etoy an-tane iaby. ¹⁵ Ingo, miaro anao Raho, vaho hiaro anao na aia na aia handenanao. Handay anao amy toy tane toy ndraike Raho; te tsy hagnega anao Raho. Ho anoeko iaby ze iaby nampagnantegnaiko anao." ¹⁶ Nifoha Tamy ty torimasone Jakoba, le nanao tihoe reke: " Azo antoke vatane te eto amy toy toera toy Yaveh, te raho ro tsy nahay." ¹⁷ Natahotse re le nitsara tihoe: "Vatane mampatahotse toy toera toy! Tsy ino akore te ajomban'Andragnahare toy. toy ro vavahade ty lagnitse." ¹⁸ Nifoha maraindray Jakoba le nangalake iaze vato ze napone tao ambane lohane. Nataone ho tsangam-bato zane nagnilignane menake teo ambonine zane. ¹⁹ Vaho le kinaine tihoe Betela ty agnara zane toera zane, te Lozy ro agnara iaze tanà tagne amy ty nanombohane ²⁰ Vaho nanao sareke Jakoba, nitsara tihoe: "Laha hitahy naho hiharo ahike amy toy lala ze andenako toy Andragnahare le hagnomey ahike hoahane, naho akanjo hisikina, ²¹ soa hazahoako mimpole soa tsy magnahy agne ajomba ty babako, le Yaveh ro ho Andragnahareko. ²² Vaho lasa vato mase toy vato ze naoreko ho tsangam-bato toy. Amy ze iaby omeinao ahike, le ho hampoliko aminao vatane ty ampahafolone.