¹ Lafa antitse Isake le goa reo fajone kea le tsy nahisake re, vaho nampikaike andre Esao, anane taolagnolo lehilahy reke, le nitsara tamine tihoe: " Intoy raho." ² Vaho nanao tihoe reke: "Heno soa, fa antitse raho. Tsy haitso ty andro hafatesako. ³ Noho zane rambeso reto fitaom-pialianao, ty fitifiranao vaho ty kiditsinao, le mandena agne am-baibo vaho mihazà bibi-maly ho ahike. ⁴ Handraho sakafo matsiro, amy iaze vatane teako raho, vaho andeso amiko zane hazahoako mitava zane naho hagnomezako tsipi-rano anao mialoha ty hafatesako." ⁵ Vaho heno ndre Rebeka zane lafa nirehake tamy ndre Esao anandahine re Isaka. Nagnagne am-baibo re Esao soa hihaza bibi-maly vaho handay zane hole. ⁶ Niresake tamy ndre Jakoba anane re Rebeka vaho nitsara tihoe: " Njanjigno soa, henoko ty babanao nirehaker tamy ndre Esao rahalahinao. Nanao tihoe re: ⁷ 'Hagnandeso haza raho vaho hagnamboaro sakafo matsiro, soa hazahoako mitava zane naho hagnomeizako tsipi-rano anao eo agnatreha Yaveh mialoha ty hafatesako.' ⁸ Vaho noho zane, anaka, le ekeo ty tsarako arake ze handiliako anao. ⁹ Mandehana magnagny amy ty aondre amy ty ose, le angalao anak'ose roe soa raho; le hanao mahatanjake matsiro amy reo ho ahy ty babanao raho, manahake ty teane. ¹⁰ Vaho ho andesenao magnagne amy ty babanao zane, soa hazahoane mitava zane le hagnomeizane tsi-pirano anao mialoha ty hafatesane." ¹¹ Nitsara tamy ndre Rebeka renine re Jakoba tihoe: "Vanbao, Esao rahalahiko le lehilahy voloe, te raho kea le lehilahy malama hoditse. Mete hikasike ahike ty babako, le ho haine te mamitake aze raho. ¹² Handay ozo amy ty vatako raho te tsy tsi-pirano." ¹³ Nanao tihoe ty reine tamine: "Anake, aleo ty babanao hagnozo ahike. Araho avao ty tsarako, le mandena, andeso atoy amiko reo." ¹⁴ Kea nandeha nangalake reo anak'ose re Jakoba vaho nanday reo tagne amy ty renine, le nanao mahatanjake matsiro ty renine, arake ty hitiava ty babane aze. ¹⁵ Nala ndre Rebeka ty fisikina soa laote andre Esao, anane taolagno lehilahy, ze niarake tamine tao agna-jomba, vaho nampisikinane andre Jakoba, iaze anane faralahy. ¹⁶ Napone tegne amy ty tagnane naho ty faritse malama egne amy ty vozone ty angozy reo anak'ose. ¹⁷ Napone tegne an-tagna ndre Jakoba anane iaze mahatanjake matsiro naho ty mofo ze fa nikarakaraine. ¹⁸ Nagnagne amy ty babane re Jakoba le nanao tihoe: " Babako o!"Nanao tihoe reke: "Intoy rah; ia moa riha, anaka?" ¹⁹ Nanao tihoe Jakoba tamy ty babane: " Esao iaze taolagnolonao; fa vitako ze nangatahinao nataoko. Miabesara vaho mitava ty hazako, soa hitsimpazanao rano ahike." ²⁰ Nanao tihoe Isaka tamy ty anandahine: "Nanao akore ro nataonao nahisahanao zane tao agnate fotoa fohe anake?" Nanao tihoe reke: " Satria Yaveh Andragnaharenao ro nanday zane tamiko. ²¹ Le nanao tihoe Isaka tamy ndre Jakoba: "Misara eto agnilako, soa hazahoako mikasike anao, anako, le hahiza laha vatane Esao anako marene riha na tsie." ²² Namonje andre Isaka babane re Jakoba; vaho nikasike aze Isaka le nanao tihoe: "Iaze feo le ty feo ndre Jakoba, te reo tagnane kea le andre Esao." ²³ Tsy nahay aze Isaka, satria voloe ty tagnane, manahake ty tagna ndre Esao rahalahine, le nitsi-pirano aze Isaka. ²⁴ Nanao tihoe re: "Vatane Esao anako vatane marina va riha?" Namale re tihoe: " Raho vatane." ²⁵ Nanao tihoe Isaka: "Aroso amiko eto ty mahatajake te hotavako ty hazanao, mba hazahoako mitsi-pirano anao." Nandese ndre Jakoba tegne amine ty sakafo. Le nitava Isaka, vahho nandesa ndre Jakoba divay re, le nino. ²⁶ Bak'eo le nanao tihoe Isaka babane tamine: "Misira marine ahike zao vaho orofo raho, anake." ²⁷ Namonje re Jakoba le nagnoroke aze, vaho nagnimbo ty imbo reo akanjone reke le nitsi-pirano aze. Nanao tihoe re: " Ingo, ty imbo ty anako le manahake ty imbo ty baibo ze nitahy Yaveh. ²⁸ Andragnahare vatane hagnomey anao anjara amy ty ando ty lagnitse, anjara amy ty tsiro ty tane, vaho voa naho divay vaovao maro. ²⁹ Hiasa anao vatane reo ndaty vaho hihohoke eo agnatrehanao reo firenena. Ho tompogn'reo rahalahinao riha, vaho hihohoke eo agnatrehanao vatane reo ana ty reninao. Ho voahozo vatane reo iaby nagnozo anao; vaho ho tahie vatane reo iaby mitsi-piranno anao." ³⁰ Vantane vo baka nitsi-pirano andre Jakoba re Isaka, vaho niboake tamy ty tohatse niala teo amy ty fagnatreha ty babane re Jakoba, vaho nimpoly baka nihaza re Esao rahalahine. ³¹ Nanao sakafo matsiro avao kea re vaho nanday zane tagne amy ty babane. Nanao tihoe reo tamy babane: "Baba o,mifohaza vaho mitava amy reto haza ty ananao reto, mba hazohoanao mitsi-pirano ahike." ³² Nanao tihoe Isaka babane tamine: " Te ia riha?" Nanao tihoe re: "Anakao raho, ananao taolagnolo, Esao." ³³ Nititike mafe Isaka le nitsara tihoe: "Te ia ro nihaza ty ose vaho nanday zane tamiko? Nitavaiko iaby zane taloha ty niavianao, vaho fa nitsi-pirano aze raho. Le ho tahie vatane re." ³⁴ Lafa nahaheno reo tsara ty babane re Esao, le nitomagne mafe, vaho nitsara tamy ty babane tihoe: "Tsipazo rano avao kea raho, babako." ³⁵ Nanao tihoe Isaka: " Ty rahalahinao ro faniavy tetoa namitaky ahike vaho nangalake ty tsipi-ranonao." ³⁶ Nanao tihoe Esao: " Tsy re va iaze kinaikinao tihoe Jakoba? Te reke le fanamitake ahike indroe. Fa nalane ty maha-taolagnolo ahike, vaho zao le mbo nalane avao kea ty tsi-pirano tokone ho ahike." Bak'eo re nanao tihoe: "Tsy misy tsi-pirano fa voatakanao ho ahike va?" ³⁷ Namale Isaka vaho nitsara tamy ndre Esao tihoe: "Ingo fa vitasoro ho tomponareo re vaho fa nomeoko ho mpanompone reo rahalahine, vaho fa nomeko aze ty voa naho divay vaovao. Ino ro mbo afake ataoko ho anao, anaka?" ³⁸ Nanao tihoe Esao tamy babane: Tsy mba mana tsipi-rano na raike ho ahike va riha, babako? Tsipazo rano avao kea raho, babako." Nitagne mafe Esao. ³⁹ Namale Isaka babane vaho nitsara tamine tihoe: "Ingo, ty toera ze misy anao le ho lavitsy ty tane soa, lavitsy ty ando ty lagnitse ambone. ⁴⁰ Amy ty alala ty mesonao rohivelomanao, vaho hanompo ty rahalahinao riha. Te laha milietse riha, le hagalake ty vatanao amy ty fitondrane." ⁴¹ Nalay andre Jakoba re Esao noho ty tsipi-rano ze nomey ty babane aze. Nirehake tao agnarofone Esao tihoe: " Marine reo andro fisaogna ty babako; afara zay le ho vonoako Jakoba rahalahiko." ⁴² Reo tsara ndre Esao anane taolagnolo le nitaliliene tagne amy ndre Rebeka. Kea nandefa vaho nampikaike andre Jakoba anane faralahy re vaho nitsara tamine tihoe: "Ingo, Esao rahalahinao le mampiognone ty vatane amy ty safiry hamono anao. ⁴³ Vaho noho zane, anake, araho ty tsarako vaho milaisa agne amy ndre Labana anadahiko, ao Harana. ⁴⁴ Mijanogna miarake amine fotoa fohike, zisike hihena ty helo ty rahalahinao, ⁴⁵ zisike maha ahafake ty helo ty rahalahinao aminao, le hagnalignosane ze nataonao tamine. Bak'eo le hampangalake anao agne raho. Ataoko akore ro hamoy anareo roe agnate ty andro raike? ⁴⁶ Nanao tihoe Rebeka tamy Isaka: Meloke mafe raho noho reo anak'ampela ndre Hitita. Laha mangalake vale amy treo anak'ampela Hetita re Jakoba, manahake regne ampela mitoboko amy io tane io regne, le ino ro soa ho ahike amy ty fiaignako?"