¹ Bakeo ilahilahy ninday ahy tamity vavahady ze sinokitse niatignana. ² Ingo! Niavy baka antignana ty hasy Nagnahare Israely; manahake ty feo ty rano maro ty feone, vaho nangelangetse ty hasy ty tane. ³ Izay le manahake ty fisehoa ty hisako, manahake ty fahisaha hisako laha niavy handrobake ty tana re, vaho fahisaha reo le manahake ty fahisaha hisako tamity Lakandrano Kebara-vaho niondreke tamity tarehe raho. ⁴ Kea niavy tatragno ao tamity lala mba bavahady nisokake niatignana ty hasy gn'Yaveh. ⁵ Le nagnogake ahy ty Fagnahy vaho ninday ahy tagnate ty tane malalake. Ingo! Nameno ty tragno ty hasy gn'Yaveh. ⁶ Nitsanga tagnilako eo ilahilahy, vaho naharey ndaty hafa nivola tamiko baka antragno ao raho. ⁷ Hoe re tamiko: "Nao anagnodaty, intoy ro fitoboha ty seza fiambenako naho fitoboha ty lelan tomboko, hitobohako agnivoa ty vahoa Israely eo zisikagne. Tsy handratiraty ty agnarako masy sasy ty longo Israely-iereo ndra ty mpanjaka iereo-amity tsy finoa ndra amity fate mpanjakane reo tamy pilasy abone eo. ⁸ Tsy handratiraty ty agnarako masy amity fagnisia ty gonimbare gnireo agnila ty lavatragnoko sasy iereo, vaho tsangam-bavahady iereo reo le agnila ty tsanga bavahady, ndra amity ino ndra ino laha tsy lakoro raike agnivoako eo naho iereo. Nandratiraty ty agnarako masy tamy asa mampangory reo iereo, kea handrava iereo amity siake raho. ⁹ Amizao ao iereo hagnafake ty tsy finoa gniereo naho fate ty mpanjakane reo agnivoane, le hitoboke agnivoa iereo zisikagne raho. ¹⁰ Nao anagnodaty, iriha vatane ro ao hivola mikasike ze tragno zay amity longo Israely ho megnatse naho hadisoane reo iereo. Tokone handineke mikasike izay hamarita izay iereo. ¹¹ fa laha megnatse naho ze iaby nanoe gniereo, le atalilio amy gniereo ty saretragno, ty mikasike aze, ty fiboahane, ty filirane, naho ty sarene iaby, vaho ty lily aman dalaiaby. Le sorato amaso gniereo eo zay hiambenane ty sare gnizay naho ty lily gnize iaby zay, ka hahily rey. ¹² Ezao ro lily ho ahy ty tragno; Zisikegne amity fara ty haboa magnodidy ty faretse iaby magnodidy izay, le ho masy vatane. Ingo! Izay ro ho lily ho ahy ty tragno. ¹³ Intoa ro ho meta ty alitara amity metatse-ze metatse zay le ho metare mahazatse vaho volivoam tagna amity halavane. Kea ty fantso magnodidy ty alitara le ho metatse laleke, vaho ty zorone le ho metare raike avao kea. Ty faretse magnodidy ty sisine magnodidy le ho rae zahe. Izay ro ho foto ty alitara. ¹⁴ Bakeo amity fantso magnanike amity rindry abo agne amity alitara le roe metatse, vaho ty rindryne le rae metatse ty zorone. Vaho bakeo amity rindry kele magnanike amity velara ty sisy ty alitara, le efatse metatse zay, vaho ty velara ty sisine le rae metatse ty zorone. ¹⁵ Ty fatapera amity alitara eo ho ahy ty raketse oroa le efa metatse ty halavane, vaho misy tsifa efatse manondro magnanike amity fatapera mbeo. ¹⁶ Ty fatapera le roe ambiny folo metatse ty halavane vaho roe ambiny folo metatse ty zorone, efa-joro. ¹⁷ Ty fare gnizay le efatse ambiny folo metatse ty halavane vaho efatse ambiny folo ty zorone amity ilane efatse kiraidraike iaby, vaho ty morone le antsasa metatse. Ty fantsone le rae metatse ty zorone magnodidy iaby vaho anatohatse zay le mitolike antignana agne." ¹⁸ Magnarake izay le hoe re tamikotihoe: "Nareo anagnodaty, izao ty tsarae gny Tompo Yaveh: Intoa ty lily ho ahy ty alitara amity andro anaova gniereo izay, ho ahy ty fanondrota ty raketse oroa agnate gnizay ao, vaho ho ahy ty famiahan dio amignizay eo. ¹⁹ Hagnomey agnombe lahy bakamity biby fihare ho raketse naho ty hadisoa ho ahy mpisoro Levita reo ze longo Zadoka riha, le reo ze nagneke ahy hanompo ahy-izay ty fitalilia ty Tompo Yaveh. ²⁰ Bakeo riha hangalake ty ilane amity lio gnizay vaho hametsake izay amity alitara ty tsafo efatse naho ty lafy ty sisine vaho amity morone magnodidy; hagnalio izay riha ka hanao fagnavota ho ahy zay. ²¹ Le mangala agnombe lahy ho raketse naho ty hadisoa ka oro amity faretse voayingy eo amity faretse ty tempoly ambaly ty fitoboha masy zay. ²² Vaho amity andro faharoe riha le hagnomey aose lahy tsy misy takaine bakamy aose reo ho raketse naho ty hadisoa; hagnaligno ty alitara manahake ty nagnalignova izay tamity agnombe lahy mpisoro reo. ²³ Lahafa vitagnao ty fagnaliova izay, le magnomeza agnombe lahy tsy misy tsikone bakamity biby fihare vaho agnodry lahy tsy misy tsikone bakamity agnodry aman'ose. ²⁴ Ameo agnoloa gn'Yaveh reo; le handrarake sira amy mpisoro reo ka hanondrotse raketse reo ho oroa ho ahy Yaveh. ²⁵ Magnomana riha aose lahy raketse naho ty hadisoa isan'andro zisike ty fahafito, vaho ao mpisoro reo hagnoma agnombe lahy tsy misy tsikone amity biby fihare vaho agnodry lahy tsy misy takaine bakamity agnodry aman'ose avao kea. ²⁶ Ao iereo handietse ty alitara lahafa telo andro ka handio izay, vaho amy ze fomba zayro hagnamasigna gniereo izay. ²⁷ Ao hameno andro reo iereo, vaho amity andro fahavalo naho magnorike izay le hagnoma ty raketse oroanareo naho ty rakem-pilongoagnareo amity alitara reo eo mpisoro reo, le hagneke anareo raho-izay ro fitalilia gn'Yaveh."