¹ Tsy misy lahilahy nafere tamity fagnafaha na fandilia ty filahiane afake hilitre ao amity fiangona Yaveh. ² Tsy misy kolo sare afake ho isa ty fiangona Yaveh; ka zisikagne amity foko afara fahafolo, tsy hisy ho agnate ty fikambana Yaveh iereo. ³ Ty Amonita vaho Moabita le tsy ho agnate ty fiangona Yaveh; ka zisikagne amity foko afara fahafolo, tsy hisy ho agnate ty fiangona Yaveh iereo. ⁴ Zay le satria tsy nanalaka anareo tamity mofo vaho rano tegne amity lala niboahanareo bakagne Egypta iereo, naho satria nagnarama i Balama anadahy Beora bakagne Petora agne Arama Naharaima handiera anao iereo, mba hagnozo anao. ⁵ Fa Yaveh Zagnaharenao le tsy hidranjy Balama; fa kea, navaly Yaveh ho fitahia ho anao ty ozo, satria tea Yaveh Zagnaharenao riha. ⁶ Tsy tokone hipay ty fiadagna na fagnambina iereo vatane riha, zisike ty androm-piaignanao iaby. ⁷ Tsy tokone halay Edomita riha, satria rahalahinao re; tsy tokone halay Egyptiana riha, satria vahiny tagne amity tanene riha. ⁸ Reo foko bakamity foko fahatelo ze natera iereo le mete ho agnate ty fiangona Yaveh. ⁹ Laha mindeha manahake ty tafike mandietse reo fahavalonao riha, le tokone hiambe ty vatanao amity zaka raty iaby. ¹⁰ Laha misy lahilahy tsy malio naho ze niseho tamity hale aminao eo, le tokone hiakatre ao amity tobe ty tafike re; tsy mahazo mihere ao amity tobe sase re. ¹¹ Laha fa avy ty hariva, le tokone hanasa ty vatane amity rano re; laha fa mitsofotre ty andro, le hihere ao amity tobe re. ¹² Tokone hana toera agne ambaly ty tobe avao kea riha ze hindehananao; ¹³ naho hana zaka ao amity zaka-fiasanao riha mba hangalia; laha fa mitilintily manao maloto riha, le tokone hangaly amizay naho bakeo magnere ty tane ka mandembeke ze niakatre bakao aminao. ¹⁴ Satria Yaveh Zagnaharenao le mindeha egne agnivo ty tobenao mba hagnomea faharesea ho anao vaho hatolotre reo fahavalonao aminao. Laha zao le tokone ho masy ty tobenao. mba tsy hahitane zaka tsy malio aminao eo ka hivalike aminao. ¹⁵ Ty ndevo ze nilay bakagne amity tompone le tsy tokone hihere agne amine. ¹⁶ Engao re hitoboke hiarake aminao, na aia aia tana filiene. Ko ampijale re. ¹⁷ Tsy tokone hisy mpitsangatsanga amity fanompoan-tsampe eo amireo anak'ampela Israely, na kea hisy mpitsangatsanga amity fanompoan-tsampe eo amireo anadahy Israely. ¹⁸ Reo karama ty mpivaro-bata na karaman'amboa le tsy tokone entenao militre ao antragno Yaveh Zagnaharenao mba handefea voady; satria sambe zaka-raty amy Yaveh Zagnaharenareo reo. ¹⁹ Tsy tokone hangalake tombone amireo Israelita namanao riha laha fa mampindra__tombone amity vola, tombone amity sakafo, tombone amity na ino ino nampindrame hangala tombone. ²⁰ Mete hampindra hangala tombone riha amity vahiny; fa amireo Israelita namanao le tsy tokone hampindra hangala tombone riha, mba hitahia Yaveh anao iaby ze hametrahanao tagna, ao amity tane ze ho lasa fanagnanao. ²¹ Laha fa manao voady amy Yaveh Zagnaharenao riha, le tsy tokone halisa amity fandefea zay, satria azo antoke fa ho take Yaveh Zagnaharenao aminao zay; ho hadisoa ho anao ty tsy fandefeanao zay. ²² Fa laha hita arofo riha amity fanova voady, le tsy ho hadisoa ho anao zay. ²³ Ty rehake ze nakare ty vavanao le ambeno naho anovo; arake ze voady nataonao tamy Yaveh Zagnaharenao, na ino ino nampagnantegnanao maimaimpoa tamity vavanao. ²⁴ Laha fa mabeo amity tanem-boaloboke ty mpiara-belo aminao riha, le mete hihina voaloboke maro arake ze paienao, fa ko magnisy ao agnate haronao. ²⁵ Laha fa mindeha mbaeo amity tanembare ty mpiara-belo aminao riha, le mete hahazo salohim-bare amity tagnanao, fa ko asia meso fihaza ty salohim-bare ty mpiara-belo aminao.