¹ Tsy tokone hiambe ty agnombe reo Israelita namanao riha na ty agnondrine mindeha amity lalan-diso ka magnaja ty vatanao amireo; tsy maintsy ampolinao amine reo. ² Laha tsy agnila nao reo Israelita namanao, na laha tsy mahay aze riha, le tsy maintsy minday ty biby agne antragnonao riha, naho tsy maintsy miarake aminao zay mandram-pipaiane aze, naho bakeo le tsy maintsy ampolinao agne amine zay. ³ Tokone manao hoe zay amity ampondrane riha; tokone manao hoe zay amity siky riha; naho tokone manao hoe zay amireo zaka Israelita namanao robake iaby avao kea riha, ty rarahane ze robake ka hisanao; tsy tokone magnaja ty vatanao riha. ⁴ Tsy tokone magnente ty ampondra ty Israelita namanao na ty agnombene mitonta amity lala ka magnaja ty vatanao amiereo riha; tokone magnampe zay hiare ndraike riha. ⁵ Tsy tokone hisiky sikin-dahilahy reo ampela, naho tsy tokone manao sikin'ampela reo lahilahy; fa na ia ia manao reo zaka reo le zaka-raty amy Yaveh Zagnaharenareo zay. ⁶ Laha misy akanem-boro miseho eo agnoloanao egne andala, egne amity hetae iaby na egne amity tane, miarake amity anane na ty atoly eo amine, naho ty renene mitoboke eo amity anane na eo amireo atoly, le tsy tokone hangalake ty renene miarake amity anane riha. ⁷ Tokone hagnenga ty renene hindeha riha, fa ty anane le afake alaenao ho anao. Magnenkea ze baiko zay mba ho hanjare aminao zay, naho mba hahalava ty andronao. ⁸ Laha fa magnore tragno vao riha, le asio aro-fane ty tafonao mba tsy hindaisanao lio ao antragnonao laha misy ndaty mitonta bakeo amizay. ⁹ Tsy tokone hambole ty tanem-boalonao miarake amity karam-boa roe riha, mba tsy halae ty toera masy ty vokatre iaby, reo voa ze nafefenao naho ty vokatre ty tanem-boaloboke. ¹⁰ ko miasa tane amity agnombe vaho ampondra miarake riha. ¹¹ Ko misiky lamba vita tamity volon'agnondry vaho rongone miarake. ¹² Magnamboara somotr'aviavy eo amity zorone efatre amity akanjo lava ze anovanao. ¹³ Laha msy lahilahy raike mangala-baly, miarake-miroro amine, naho bakeo malay aze, ¹⁴ vaho misere aze amity zaka mahamegnatre naho manao raty laza aze, vaho manao ty hoe:' Nangalake ze ampela zay raho, fa laha fa namonje marine aze raho, le tsy nahisake porofo amity maha-verijiny aze.' ¹⁵ Le tsy maintsy mangalake porofo amity maha-verijiny aze ho ahy reo olobey ao amity vavahady ty tana ty rae vaho ty rene ty ampela. ¹⁶ Ty rae ty ampela le tsy maintsy mirehake amireo olobay hoe:' Nagnomea ty anako vave ho valy ze lahilahy zay raho, ka nalay aze re. ¹⁷ Ingo, nanere aze tamity zaka-mahamegnatre re, naho nanao ty hoe:" Tsy hisako tao amit ananareo vave ty porofo maha-verijiny aze."Kanefa toy ty porofo amity maha-verijiny ty anak'ampelako.' Bakeo iereo le hamelatre ty sikine eo agnoloa reo olobey ty tana. ¹⁸ Tokone hangalake io lahilahy io reo olobey ty tana naho hagnasazy aze, ¹⁹ naho tokone hampagnavake aze sekela volafoty zato iereo, naho hagnomea zay ho ahy ty rae ty ampela, satria nanao raty laza tamity verijine Israely raike ty lahilahy. Tsy maintsy ho valine re; naho tsy afake ty hisarake amine re zisike agne. ²⁰ Fa laha mare ze zaka zay, fa ty porofo maha-verijine le tsy hisake tao amity ampela, ²¹ le tsy maintsy hinday ty ampela agne amity varavara ty tragno ty rae iereo, naho reo lahilahy agne amity tana le tsy maintsy hitora-bato aze ho mate, satria nanao zaka raty tagne Israely re, tamity fagnanoa fihetseke hoe ty ampela janga tao antragnon-draene; naho hagnafake ty raty eo aminareo nareo. ²² Laha misy lahilahy tratre niarake-niroro tamity ampela raike ze manambaly lahilahy raike hafa, le tsy maintsy ho mate iereo roe, ty lahilahy ze niarake-niroro tamity ampela vaho ty ampela vatan; le hagnafake ty raty eo aminao riha. ²³ Laha misy ampela verijine raike, mifanambaly amity lahilahy raike, naho lahilahy raike hafa mahatratre aze ao amity tana ka miarake-miroro amine, ²⁴ le alao ho agne amity vavahady ty tana iereo roe, ka toraho vato ho mate. Tsy maintsy mitorake ty ampela riha, satria tsy nitagny re, na le tao amity tana aza. Tsy maintsy mitorake ty lahilahy riha, satria nandika ty valy ty mpirai-belo amine re; naho hagnafake ty raty aminao eo riha. ²⁵ Fa laha tratren-dralahilahy egne ambaibo ty ampela le fa valign'ondaty, ka laha tanane re naho miarake miroro amine, le ty lahilahy ze miarake miroro amine avao ro tsy maintsy ho mate. ²⁶ Fa ty ampela tsy hanoanao na ino ino; tsy misy heloke soa amity mate ao amity ampela ao. Fa ze zaka zay le hoe ty lahilahy raike manafike ty mpiara-mone amine vaho mamono aze. ²⁷ Fa hisane tagne ambaibo re; nikorake mafe ty ampela valign'ondaty, kanefa tsy nisy ndaty namonje aze. ²⁸ Laha misy lahilahy mahatratre ampela verijine raike nefa mboe valign'ondaty, naho laha tanane vaho miarake-miroro amine re, ka laha tratre iereo, ²⁹ le tsy maintsy amity magnomea sekele volafoty dimampolo amity rae ty ampela ty lahilahy niarake-niroro tamine, naho tsy maintsy lasa valine ty ampela, satria nagnafa-baraka aze re. Tsy tokone hisarake amine re zisike ty andro iaby. ³⁰ Tsy tokone mangalake ty valin-draene ho aze arere ty lahilahy raike; tsy tokone mangalake ty zo ty fanambalia ty raene re.