¹ Laha fa reign'Isboseta, anadahign'i Saoly, fa mate tagne Hebrona ty Abnera, le lasa naleme ty tagnane, naho nikoronta Israely iaby. ² Naho ty anadahign'i Saoly le nana roe lahy ty kapitene reo vondro reo miaramila. Ty agnara ty raike le Bana naho ty raike hafa kea le i Rekaba, anadahign'i Rimona Berotita bakamity vahoake i Benjamina(satria Berota avao kea le niraesene ho Benjamina, ³ naho reo Berotita niala tagne Gitaima ka nitoboke tagne zisikezao andro zao). ⁴ Naho Jonatana, anadahign'i Saoly, le nana anadahy zay maleme ty tombone. Dime tao re laha fa niavy tao Jezirela ty vaovao momba Saoly vaho Jonatana. Niente ty mpiteza aze mba hilay re. Kanefa laha nilay igne re, le nitonta ty anagn'i Jonatana naho lasa maleme. Mefiboseta ro agnarane. ⁵ Laha zao reo anadahign'i Rimona Berotita, i Rekaba vaho Bana, le lasa nindeha zisike ty hamay ty andro nimbaeo amity tragno i Isboseta, tamire nialoke tamity mitatao vovogna. ⁶ Azon-droro ty ampela mpiambe varavara laha nitsionga vare, naho Rekaba vaho Bana nindeha ampintsigna vaho nandrio aze. ⁷ ka laha fa nilitse tao amity tragno iereo, le nanafike aze ka namono aze laha niroro teo ampandreane tao amity efetragnone re. Bakeo tinampa iereo ty lohane naho nientene zay, naho nindeha tegne amity lala zisike ty hale iaby nimbaeo amity Araba. ⁸ Niente iereo tagne amy Davida tao Hebrona ty loha Isboseta, naho hoe iereo tamy mpanjaka ty hoe:" Ingo, toy ty loha Isboseta anadahign'i Saoly, fahavalonao, ty nifofo ty arofonao. Amizao Yaveh le namale fate ty mapanjaka tamy Saoly vaho reo fokone." ⁹ Naho Davida namale i Rekaba vaho Bana rahalahine, reo anadahign'i Rimona ty Berotita; hoe re tamiereo ty hoe:" Laha mboe velo kea ty Yaveh, zay nagnafake ty arofoko tamity koronta iaby, ¹⁰ laha fa nisy ndaty nirehake tamiko ty hoe:' Ingo, mate ty Saoly,' midineke fa minday vaovao soa re, le tsinepako re naho nivonoeko tagne Ziklaga. Izay ro valesoa nomeako aze noho ty vaovaone. ¹¹ Lako fa, laha fa nisy lahilahy namono ndaty tsy manan-tsiny tao amity tragnone arere teo amity fandreane, le tsy tokone hangatake ty lione eo antagnanareo vao raho, naho magnafake anareo antane eo?" ¹² Bakeo Davida nagnomea baiko reo ajalahy, naho namono iereo ka nanampake ty loha vaho ty tombo iereo naho namonje iereo teo agnila ty kamory tao Hebrona. Fa nalaeiereo ty baibo Isboseta naho nalevene tao amity kibory i Abnera tao Hebrona zay.