¹ Naho nisy aly lava reigne teo amity foko i Saoly vaho ty foko i Davida. Nihamafe zisikagne ty Davida, fa ty foko Saoly kea le nihanaleme zisikagne. ² Niterake ajalahy tao Hebrona ty Davida. Ty lahilahy voalohane le i Amnona, tamy Ahinoama bakagne Jezraela. ³ Ty anadahine faharoe, le i Kileaba, natera i Abigaila, ty mpivem-bata nenga i Nabala bakagne Karmela. Ty fahatelo, le i Absaloma, anadahy Maka, anak'ampela i Talmay, mpanjaka i Gesora. ⁴ Ty anadahy Davida fahaefatre, le i Adonia, anadahign'i Hagita. Ty anadahine fahadime le i Sefatia anadahign'i Abitala, ⁵ naho ty fahaene le i Jitreama, anadahign'i Egla valy Davida. Reo anadahilahy natera i Davida tao Hebrona. ⁶ Naho zisike ty aly teo amity foko Saoly vaho ty foko Davida le nihamafe tao antragnone ty Saoly i Abnera. ⁷ Saoly le nana vaitsindrano atao ty hoe Rizpa, anak'ampela i Aia. Hoe ty Isboseta tamy Abnera ty hoe:" Nagnino riha ro niarake niroro tamity valitsindranon-draeko?" ⁸ Naho le meloke mafe tamity reha Isboseta ty Abnera ka nanao ty hoe:" Lohan'amboa zay ahy Joda vao raho? Amizao raho le manoro fatokia amity foko Saoly, razambeinao, amireo rahalahine, naho amireo namane, mba tsy hanolotre anareo eo antagna i Davida. Fa amizao riha le mitana ahy ty amity fanoan-draty mikasike ty ampela toy? ⁹ Ho ataon'Agnahare amiko anie zay, ry Abnera, naho mihoatre aza, laha tsy hataoko amy Davida arake ze nifanta Yaveh tamine, ¹⁰ ty hamindra ty fanjaka bakamy ty foko Saoly vaho hagnore ty sezen-droandria Davida eo amy Israely vaho eo amy Joda, zisikagne Dana ka zisikagne Beri-sheba." ¹¹ Tsy nana rehake hafa havale i Abnera sase ty Isboseta, satria natahotre aze re. ¹² Bakeo le nandefa mpinday talily nimbaeo amy Davida i Abnera mba hirehake ho aze manao ty hoe:" Ania ty tane toy? Manova fagnenkea amiko, mba hinday ty Israely iaby ho aminao eo." ¹³ Namale ty Davida ty hoe:"Soa zay, hanao fagnenkea aminao raho. Kanefa ty zaka raike takeko aminao le ty tsy hahisahanao ty vatako laha tsy entenao aloha i Mikala, anak'ampela Saoly, laha fa avy hanente ahy riha." ¹⁴ Bakeo Davida nandefa mpinday talily nimbaeo amy Isboseta, anadahign'i Saoly, nanao ty hoe:" Ameo ahy Mikala valiko, ze le fa naloako vily tamity lohatsitsy ty Filistina zato." ¹⁵ Laha zao Ibsoseta le nampangalake i Mikala ka nangalake aze tamy Paltiela valine, anadahign'i Laisy. ¹⁶ Nindeha niarake tamine ty valine, nitagny tegne ampindehana, naho nagnorike aze zisikagne Bahorima. Naho hoe Abnera tamine ty hoe:" Miheregna agne antragno amizao." Ka nihere re. ¹⁷ Nirehake tamireo olobey Israely Abnera nanao ty hoe:" Taloha nareo le niezake ty hana Davida ho mpanjaka eo aminareo. ¹⁸ Amizao anovo zay. Fa Yaveh le fa nirehake tamy Davida nanao ty hoe:' Amity tagna Davida mpanompoko ro hamonjeako ty Israely vahoakeko amity tagna reo Filistina vaho amity tagna reo fahavalogn'iereo iaby."' ¹⁹ Nirehake arere tamity ndaty Benjamina avao kea Abnera. Bakeo le nindeha avao kea Abnera mba hirehake amy Davida ao Hebrona mba hagnazava ty zaka iaby ze irie Israely vaho ty foko i Benjamina iaby ho tanterahe. ²⁰ Laha fa niavy tao Hebrona mba hifanoje amy Davida ty Abnera vaho ty roapolo tamireo lahilahine, le fa nagnoma kibory ho ahy iereo ty Davida. ²¹ Naho Abnera nagnazava tamy Davida ty hoe:" Hitsanga raho ka hamory ty Israely iaby ho aminao, ry mpanjaka tompoko, mba hahafaha iereo manao fagnenkea aminao, mba hahafahanao manjaka iaby ze irieneo." Ka nandefa i Abnera ty Davida, naho Abnera niala tam-pilamina. ²² Ka niavy bakagne ampanafiha ty miaramila i Davida vaho Joaba naho ninday gadra maro niarake tamiereo. Kanefa Abnera le tsy niarake tamy Davida tagne Hebrona. Te fa nandefa aze ty Davida, naho niala tampifalea Abnera. ²³ Laha fa niavy Joaba vaho reo tafike iaby niarake tamine, le hoe iereo tamy Joaba ty hoe:" Avy teto amity mpanjaka i Abnera anagn'i Nera, naho nalefa ty mpanjaka re, naho niala tampifalea i Abnera." ²⁴ Bakeo le niavy teo amity mpanjaka i Joaba ka nanao ty hoe:" Ino ro nataonao? Ingo, i Abnera le fa niavy teto aminao! Nagnino ro nalefanao re, ka nindeha? ²⁵ Tsy hainao vao fa i Abnera anagn'i Nera le niavy teto aminao mba hamitake anao vaho mba hahay reo dinenano naho hamantatre iaby ze ataonao? ²⁶ Laha fa niala i Davida Joaba, le nagnirake mpinday talily nagnorike Abnera re, naho niente iereo nihere bakagne amity famorian-drano Siraha re, kanefa tsy haign'i Davida zay. ²⁷ Laha nihere ho agne Hebrona Abnera, le niente Joaba nihatake kele teo agnivo ty vavahady mba hirehake amine arere re. Teo Joaba ro nitomboke aze tamity trone ka namono aze. Tamize fomba zay, ro namalea Joaba ty lio i Asahela rahalahine. ²⁸ Laha naharey ty momba zay Davida le hoe re ty hoe:"Zaho vaho ty fanjakako le tsisy tsiny zisikezay eo agnoloa Yaveh mikasike ty lio Abnera anagn'i Nera. ²⁹ Ao ty heleko ty amity fate i Abnera hipoke amity loha Joaba vaho ty fokon-draene iaby. Tsy ho afake amity foko i Joaba anie ty ndaty ze mitsi-dio na ty arete-kolitse na ze mandrava ka tsy maintsy mamindra amity tehe na ze tonta ty meso na reo tsy manan-kohane." ³⁰ Hoe izay ro namonoa Joaba vaho Abisay rahalahine i Abnera, satria namono i Asahela rahalahigniereo tagne agnaly tao Gibeona re. ³¹ Hoe Davida tamy Joaba vaho reo ndaty iaby niarake tamine ty hoe:" Riato ty sikinareo, manaova akanjo fandala, naho manaova fandala magnoloa ty fate i Abnera." Naho Davida mpanjaka le nindeha tao afara ty fate tamity asa ty fandevegna. ³² Nalevegniereo tao Hebrona ty Abnera. Nitagny vaho nikorake mafe teo amity kibory Abnera ty mpanjaka, naho nitagny avao kea ty ndaty iaby. ³³ Nandala i Abnera ty mpanjaka ka niantsa ty hoe:" Tokone ho mate manahake ty fate ty gege vao ty Abnera? ³⁴ Tsy finehe ty tagnanao. Tsy nasia ravake vy ty tombonao. Fa manahake ty fahavalo ty ndaty teo agnoloa reo ana ty tsy fahamarea, ro nahatonta anao." Naho mboe nitagny aze ndraike ty ndaty iaby. ³⁵ Niavy nampihina i Davida ty ndaty iaby laha mboe atoandro ty andro, fa Davida nifanta ty hoe:" Hataon'Agnahare amiko anie zay, naho mihoatre aza, laha magnandra mofo na zaka hafa raho aloha ty hitsofora ty masoandro." ³⁶ Hay ty ndaty iaby ty alahelo Davida, naho nenkene iereo zay, arake ty fagnenkeane iaby ze natao ty mpanjaka. ³⁷ Ka taka ty ndaty vaho ty Israely iaby tamize andro zay fa tsy fagniria ty mpanjaka ty hamono i Abnera anadahign'i Nera. ³⁸ Hoe ty mpanjaka tamireo mpanompone ty hoe:" Tsy hainareo vao fa roandria vaho ndaty bey ro mate agne Israely androany? ³⁹ Fa osa raho amizao, na le mpanjaka voahosotre aza raho. Reo lahilahy reo, reo anadahign'i Zeroia, le nahere vaike loatre tamiko. Hamale ty mpanao raty anie Yaveh amity fagnaliloa aze ty amity faharatiane, arake ze mete amine."