¹ Paoly, apostoly raeke ahy ndre Kristy Jesosy tamy ty tea ty Andragnahare, naho Timoty rahalahintika, ho ahy ty fiangona ty Andragnahare ze ao amy ty Korito, vaho ho ahy reo mpino iaby magnera ty faritse Akaia. ² Ho aminareo vatane ty fahasoava vaho ty fiadagna bak'amy ty Andragnahare Raentika naho Tompo Jesosy Kristy. ³ Ho antsay vatane ty Andragnahare naho Baba ty Tompontika Jesosy Kristy. Re ro Baba ty famindram-po iaby naho Andragnahare ty fampionogna iaby. ⁴ Andragnahare le mampionogne antika amy ty fijaleantika iaby, le soa ahafahantika mampionogne reo ze ao ampo fahoria, Tika le mampiongne reo hafa manahake ty fampionogna ze nampiasa ty Andragnahare ampionogne antika. ⁵ Te manahake ty hitomboa ty fijalea ndre Kristy noho ty aminay, ro hitomboa ty Fampionogna anay kea amy ty alala ndre Kristy. ⁶ Te laha nampahoria zahay, zay le ho ahy ty fampionogna naho famonjea nareo. Vaho laha nampionogna zahay, zay le ho ahy ty fampahereza anareo. ty fampaherezanareo le mandaitse lafa manam-pahareta hizara reo fijalea ze mitovy amy ty fijaleanay kea. ⁷ Te ty fahatokinay mikasike anareo le azo antoke, satria zahay le mahay te nareo kea le mizara reo fijalea, nareo kea le mizara fampahereza. ⁸ Te tsy teanay nareo tsy ahay, rahalahy, ty amy reo olagne nahazo anay tagne Asia. Zahaya le nivesare aby mihoatse ze tokone ho zakanay, maro loatse le tsy nagnantegna ty hiay ela sase zahay. ⁹ Teo aminay ty fagnameloha ho mate. Te zay ro nahaavy anay tsy hametrake ty tokinay eo amy ty vatanay avao, te kea amy ty Andragnahare ze mampitsanga ty mate. ¹⁰ Nagnavotse anay tamy ty loza mahafate manahake zay Reke, vaho mboe hagnavotse ndraeke. Zahay le nametrake ty tokinay tamine te mboe hagnafake anay ndraeke Reke. ¹¹ Reke le hanao zay satria nareo kea magnampe anay amy ty alala ty vavakareo. Vaho maro bak'ei ro hagnome fisaora amy ty agnaranay noho ty tombom-pahasoava nomea anay tamy ty alala reo vavake ty maro. ¹² Zahay le mirehareha amy zao: fitsangana vavolombelo ty amy ty feo ty fieratseretanay. Te amy ty safiry malio naho fahatsoram-po ze bak'amy ty Andrgnahare ze nandesanay ty vatanay ao amy zao tontolo zao. Zahay le nahavita zay iaby zay vaho ty ankamaroa ty niarake taminareo__tsy tamy ty fahendrea zao tontolo zao, te tamy ty fahasoava ty Andragnahare. ¹³ Zahay le tsy nanoratse raraha tsy ho voavake na ho azonareo. Raho le magnantegna te, ¹⁴ satria nareo nahazo ty mikasike anay amy ty ampahane, zahay le ho anto ty reharehanareo amy ty andro ty Tompontika Jesosy, manahake anareo ho antone hireharehanay. ¹⁵ Satria natoke ty mikasike zay raho, le te ho agne aminareo aloha, soa hahafahanareo mahazo vokane amy ty fitsidiha roe. ¹⁶ Nioma ty hitilike anareo lafa tegne amy ty lalako ho agne Makedonia raho. Vaho bak'eo le mboe nagnire hitilike anareo ndraeke raho tamy ty liako bak'agne Makedonia, vaho ty soa ty soa hagnateranareo ahike tegne amy ty lalako ho agne Jodia bak'eo. ¹⁷ Lafa nieritseritse manahake zay raho, nisalasala vao raho? Nagnoma reo raraha reo arake ty nofotse vao raho, soa itsarako "Eka, eke" naho "Aha, aha" amy ty fotoa raeke avao? ¹⁸ Te satria Andragnahare le matoke, tika le tsy afake ty hitsara na "Eka" na Aha." ¹⁹ Te ty Ana ndre Andragnahare, Jesosy Kristy, ze nitoria ndre Sylvanosy, Timoty vaho raho taminare, le tsy "Eka" na "Aha." te Reke le nitsara avao tihoe: "Eka." ²⁰ Satria ty fampagnantegna ty Andragnahare iaby le "Eka" iaby ao amine. Le amy ty alalane kea tika le hitsara tihoe "Amena" ho ahy ty asy ty Andragnahare. ²¹ Vaho Andragnahare ze magnamafe anay aminareo ao amy ndre Kristy, vaho Reke ro nagnirake antika. ²² Reke le nagnisy tombo-kase tamintika ho antoke zay mboe ho omeine antika ao afara. ²³ Te nikaike ahy ty Andragnahare raho, hitsanga vavolombelo ho ahike ze antone tsy niaviako tao Korinto soa hamikndrako arofo aminareo. ²⁴ Zay le tsy sagnatria noho zahay miezake ty mamehy ze tokone ho finoanareo. Te kea, zahay le miara-miasa aminareo amy ty fifaleanareo, satria nareo mitsanga ao amy ty finoanareo.