¹ Dime amby roapolo tao ty Amazia laha nanomboke nanjaka; nanjaka sive amby roapolo tao tamy Jerosalema re. Joadana ro agnaran-drenene, bakao Jerosalema. ² Nanao ze mare teo amaso Yaveh re, feie tsy tamity arofone iaby. ³ Naho naha tafatoboke soa ty fanjakane, le namono reo mpanompo ze namono ty rae, ty mpanjaka re. ⁴ Kanefa tsy namono reo anagnireo mpanompo re, fa nanao arake ze voasoratre tao amity lily, tao amity boke Mosesy, arake ty nandilia Yaveh ty hoe:" Ao ty rae tsy ho mate noho ty anakae, na ty anake mate noho ty rae. Fa kea, tokone ho mate noho ty hadisoane avao ty ndaty kirai-kiraike." ⁵ Ka le, nivoria Amazia niarake ty Joda, naho nandrae antsoratre ty agnara iereo arake ty foko ty razambey iaby, teo ambane reo mpifehe ty arivo vaho mpifehe ty zato__Joda vaho Benjamina iaby. Nisafene nanomboke tamity roapolo tao ro miakatre iereo, naho 300 000 reo lahilahy voaisake, afake mindeha agnaly, ze afake mita lefo vaho ampinga. ⁶ Nagnarama lahilahy mpialy 100 000 bakamy Israely avao kea re tamity talenta volafoty zato. ⁷ Fa nisy lahilahin'Agnahare raike niavy teo amine naho nanao ty hoe:" Ry mpanjaka, ko enga hiarake aminao ty tafike Israely, satria Yaveh tsy momba ty Israely__na ty vahoake Efraima. ⁸ Kanefa na le mindeha vaho mahere arofo naho mahere agnaly aza riha, le handavo anao eo agnoloa ty fahavalonao ty Zagnahare, satria Zagnahare le mana fahefa hagnampe, vaho fahefa handavo." ⁹ Le hoe Amazia tamity lahilahin'Agnahare hoe:" Ka ino zane ro ataonay momba reo talenta zato ze le fa nameako ho ahy ty tafike Israely?" Ty lahilahin'Agnahare namale hoe:" Yaveh le afake magnomea anao maro mihoatre noho zay." ¹⁰ Ka le nisarahe Amazia ty tafike bakamine vaho ty bakamy Efraima; naho nalefane noly ndraike iereo. Ka nirehetre mafe tamy Joda ty helo iereo, naho le noly tamin-keloke mafe iereo. ¹¹ Naho Amazia nana herem-po nitarike ty vahoakene niakatre ty baibon-tsira; tao ro nahareseane reo lahilahy ray ale bakagne Seira. ¹² Nisambo-belo reo ray ale hafa ty tafike Joda. Niente iereo tagne ambone ty haram-bato iereo naho navarine bakegne, mba hipoteha iereo iaby. ¹³ Fa reo lahilahy ty tafike ze nahere Amazia, mba tsy hindehana iereo miarake amine agne agnaly, le nanafike reo tana Joda zisikagne Samaria ka hatragne Beti-horona. Nandavo vahoake telo arivo vaho nangalake babo maro iereo. ¹⁴ Naho laha fa tafimpoly bakamity famonoa ty Edoma i Amazia, le ninday reo zagnaharene ty vahoake Seira, vaho nametrake iereo mba ho zagnaharene arere re. Nihohoke teo agnoloa reo re naho nangnoro liten-ketae magnitre ho ahy reo. ¹⁵ Lava zao le nirehetre tamy Amazia ty helo Yaveh. Nandefa mpaminane ho agne amine Re, ze nanao ty hoe:" Nagnino riha ro nipay reo zagnahare ty vahoake ze tsy nahavonje reo vahoakene teo antagnanao kea?" ¹⁶ Naho laha mboe nirehake tamine ty mpaminane, le hoe ty mpanjaka tamine hoe:" Feie vao zahay lefa nanao anao ho mpagnomea hevetre ty mpanjaka? Ao zay! Nagnino riha ro tokone ho vonoe?" Naho le nijano ty mpaminane naho nanao ty hoe:" Haiko fa le fa nanampa-kevetre ty handrava anao ty Zagnahare satria nanao ze asa zay riha naho tsy nidranjy ty torohevene." ¹⁷ Naho le nipay hevetre tamireo mpanolo-tsay ty Amazia, mpanjaka i Joda naho nagnirake mpinday talily tagne amy Joasy anadahy Johaza anadahy Jeho, mpanjaka Israely, nanao ty hoe:"Avia, ao tika hifagnatreke amity aly." ¹⁸ Kanefa ty Joasy mpanjaka Israely nagnere reo mpinday talily ho agne amy Amazia mpanjaka Joda, nanao ty hoe:" Tsilo raike tagne Libanona nandefa talily tamity Sedera raike tagne Libanona, nanao hoe:' Ameo ho valy ty anako lahy ty anagnao Vave,' kanefa nisy mere raike bakagne Libanona nindeha teo naho nihose-hose ty tsilo. ¹⁹ Riha le fa nanao hoe:' Ingo, le fa nandavo i Edoma raho,' naho ty arofonao ro nampirehareha anao. Mirehareha amity fandreseanao, nefa mitoboha avao agne antragno, fa nagnino riha ro tokone hignisy koronta vaho halavoa, ho ahy ty vatanao vaho Joda miarake aminao?" ²⁰ Feie tsy nidranjy Amazia, satria bakamin'Agnahare ze zaka zay, mba hahafahane manolotre ty vahoake Joda ho eo antagna reo fahavalone, satria le fa nipay hevetre bakamireo zagnahare Edoma iereo. ²¹ Ka le nanafike Joasy, mpanjaka Israely, re vaho Amazia, mpanjaka Joda, le nifagnatre-bata tao Beti-semesy, ze agne Joda. ²² Lavo teo agnoloa Israely ty Joda, naho nilay noly ty lahilahy iaby. ²³ Joasy, mpanjaka Israely, le nitsepake i Amazia anadahy Joasy anadahy Ahazia, mpanjaka Joda, tao Beti-semesy. Nientene tagne Jerosalema re naho namoteke ty manda Jerosalema zisikagne amity Vavahady Efraima ka hatragne amity Vavahady anjorone, te elagnela efajato metatre. ²⁴ Nalaene iaby ty volamena vaho ty volafoty iaby, ty zaka-iaby ze hisake tao antragno'Agnahare niarake tamy Obed-edoma, naho reo zaka manan-danja tao antragno ty mpanjaka, niarake tamireo takalom-pia avao kea, naho le nihere tagne Samaria. ²⁵ Amazia anadahy Joasy mpanjaka Joda, le nivelo dime amby folo tao tafara ty nahafate Joasy, anadahy Joahaza, mpanjaka Israely. ²⁶ Laha ty amireo raraha hafa mikasike i Amazia, ty voalohane vaho ty farane, ingo, feie vao reo tsy le fa voasoratre tao agnate ty boke reo mpanjaka Joda vaho Israely? ²⁷ Naho nanomboke tamity andro ze niotaha Amazia tamity fagnoriha Yaveh, le nanomboke nanao hevetre handiera aze tagne Jerosalema iereo. Nilay tagne Lakisy re, kanefa iereo nagnirake lahilahy nagnorike aze tagne Lakisy naho namono aze tagne. ²⁸ Niente iereo nihere tamity soavale re naho nandeve aze niarake tamireo razambeine tao an-Tana Joda.