¹ Fito tao ty Joasy laha fa nanomboke nanjaka; nanjaka zisike ty efapolo tao tamy Jerosalema re. Ty agnaran-drenene le Zibia, bakagne Berisheba. ² Joasy le nanao ze mare teo amaso Yaveh tamity andro iaby nivelogna Joiada, mpisoro. ³ Nangalake valy roe ho aze ty Joiada, naho niterake ajalahy vaho ajampela re. ⁴ Tafara zay, le tapa-kevetre ty hagnere amity lalane ty tragno Yaveh ty Joasy. ⁵ Navory niarake reo mpisoro vaho reo Levita, naho hoe re tamiereo:" Mindehana isan-tao agne amity tana Joda naho mamoria vola bakamy Israely iaby mba hagnamboara ty tragno ty Zagnaharenareo. Anovo azo antoke fa hamototre amizay nareo." Tamity voalohane le tsy nanao na ino ino reo Levita. ⁶ Naho ty mpanjaka nampikaike i Joiada, ty mpisorombey, naho nirehake tamine hoe:" Nagnino ro tsy nampidesenao reo Levita bakagne Joda vaho Jerosalema ty haba ze navory Mosesy mpanompo Yaveh vaho reo fiangona Israely, ho amity tragno ty lala ty fagnenkea?" ⁷ Fa reo anadahy Atalia, ty ampela raty fagnahy, namoteke ty tragnon'Agnahare naho nagnomea reo zaka-masy iaby tao antragno Yaveh ho ahy reo Bala. ⁸ Ka le nialy ty mpanjaka, naho nagnamboatre vata iereo naho nametrake zay teo ambaly ty filira mbaeo antragno Yaveh. ⁹ Laha fa zay le nanao talily nagnera Joda vaho Jerosalema iereo, ty mba hindaisa ty vahoake hom ahy Yaveh ty haba ze navory Mosesy mpanompon'Agnahare tamy Israely tagne agnefetre. ¹⁰ Le nifale reo mpitarike vaho ty vahoake iaby ka ninday vola naho nametrake zay tao amireo vata zisike ty ahafenoa iereo zay. ¹¹ Isake ty minday ty vata ho agne amity manan-kasy ty mpanjaka reo Levita, naho isake ze hisa iereo fa misy vola maro ao agnate zay, le avy ty mpanora-dala ty mpanjaka vaho ty manan-kasy ty mpisorombey, ka nagnafoa ty vata, vaho nangalake zay naho ninday zay hihere ho eo amity toerane. Nanao zay isan'andro iereo, namory vola maro. ¹² Namea ty mpanjaka vaho Joiaba ho ahy reo ze nanao ty asa fanompoa tao antragno Yaveh ty vola. Nagnarama mpanao tragno vaho mpandrafitre reo lahilahy reo mba hagnere amity lalane ty tragno Yaveh, naho niasa tao avao kea reo mpanefe vy vaho varahy. ¹³ Le nitofa ty mpiasa, naho ty asa fagnamboara le nilasa teo antnana iereo; naore iereo mitovy toera tamity voalohane ty tragno Yaveh naho nihamafese zay. ¹⁴ Laha fa vita iereo, le nientene tagne amy Joiada vaho ty mpanjaka ty sisam-bola. Ze vola zay le nampiasae hanova fanake ho ahy ty tragno Yaveh, reo koja-koja ente-manompo vaho hanova fagnatetre__Sotro vaho koja-koja volamena vaho volafoty. Tsy nijano nanolotre fagnatetre oroa tao amity tragno Yaveh iereo tamity andro Joiada iaby. ¹⁵ Nihabey vaho ela andro nivelogna ty Joiada, naho le mate re; 130 tao re ro nimate. ¹⁶ Naleve iereo tao amity tana Davida niarake tamireo mpanjaka re, satria le fa nanao ty soa tagne Israely, tamin'Agnahare, naho tamity tragnon'Agnahare re. ¹⁷ Naho tafara ty nihafate Joiada, le niavy reo mpitarike Joda naho nanenke ty mpanjaka. Le nidranjy iereo ty mpanjaka. ¹⁸ Nahafoe ty tragno Yaveh, ty Zagnahare reo razambeine iereo, naho nanompo reo zagnahare Aseraha vaho reo sampe. Niavy tamy Joda vaho Jerosalema ty helon'Agnahare noho ze asa raty iereo zay. ¹⁹ Ne nagnirake mpaminane ho agne amiereo Re mba hinday iereo hihere agne amine, Yaveh ndraike; nitsanga vavolombelo handietre ty vahoake reo mpaminane feie nilietse ty hidranjy iereo. ²⁰ Niavy tamy Zakaria anadahy Joiada, ty mpisoro ty fagnahy Nagnahare; nitsanga teo ambone ty vahoake Zakaria naho nirehake tamiereo hoe:" Zao ro safan'Agnahare: nagnino ro mandika reo lily Yaveh nareo, ka tsy mahisake hasoa? Ka satria nahafoe Yaveh nareo, le hahafoe anareo avao kea Re." ²¹ Kanefa iereo nihevetre handietre aze; tamireo lily ty mpanjaka, le nitora-bato aze teo ankianja ty targno Yaveh iereo. ²² Tamize fomba zay, Joasy, mpanjaka, le tsy niraharaha ty hasoam-pagnahy natao Joiada, rae i Zakaria, tamine. Fa kea, namono ty anadahy Joiada re. Laha fa mate ty Zakaria, le hoe re ty hoe:" Yaveh anie hahisake zao naho hamale anao." ²³ Naho tamity fiafara ty tao, le niakatre handietre i Joasy ty tafike Syria. Niavy tao Joda vaho Jerosalema iereo; vinono iereo ty mpitarike ty vahoake iaby naho nandefa reo azo iaby ho agne amity mpanjaka Damaskosy iereo. ²⁴ Ty tafike reo Syriana le niavy niarake tamity tafike kele, fa Yaveh ro nagnomea iereo faharesea teo amireo tafike bey vatane, satria nahafoe Yaveh, ty Zagnahare reo razambey iereo ty Joda. Tamizay ro nitsara ty Syriana i Joasy. ²⁵ Tamity andro nindehana reo Syriana, le fa nafere mafe ty Joasy. Reo mpanompone avao ro nilasa handietre aze noho ty famonoa reo anadahy Joiada, mpisoro. Vinono iereo teo ambone fandrea re, naho le mate; naleve iereo tao amity tana Davida re, fa tsy tao amity kibory reo mpanjaka. ²⁶ Toa ro ndaty ze nilasa handietre aze: le Zabada anadahy Simata, ty aze Amonita; naho Jozabada anadahy Simrita, ty aze Moabita. ²⁷ Amizao ty mikasike ty anadahine, ty famisavisam-bey ze nirehafa ty mikasike aze, vaho ty fagnoregna ndraike ty tragno Yaveh Zagnahare, ingo, le fa voasoratre ao amity boke ty Tanatara ty mpanjaka zay. Amazia anadahine, ro nanjaka nisolo ty toerane.