¹ Solomona anadahy Davida, le nitombo here tamity fanjakane, naho Ya Zagnaharene le niaro aze naho nahavy aze ho lasa mahere. ² Solomona nirehake tami Israely iaby, tamireo mpifehe ty arivo lahy vaho ty zato lahy, vaho tamireo mpitsara, naho tamity roandrian-dahy iaby tao Israely iaby, reo mpitarike ty tragnon-draza. ³ Ka le nindeha tegne amity fitoera abo tagne Gibeona ty Solomona vaho ty mpiharo amine, satria tagne ro nisy ty tragno lay fivoria amin'Agnahare, ze namboare Mosesy mpanompo Yaveh, tagne agnefetre. ⁴ Fa niente Davida bakagne Kiriata-Jearima ho agne amity toera ze vinognone ho amizay ty tomabilen'Agnahare, satria le fa nagnore tragno ho ahy zay tao jerosalema re. ⁵ Fagnampezay, ty alitara varahy natao Bezalila anadahy Ori anadahy Hora le fa tagne niaolo ty tabernakele Yaveh; nindeha tagne Solomona vaho ty fiangona. ⁶ Niakatre tagne amity alitara varahy agnoloa Yaveh ty Solomona, ze tao amity tragno lay fivoria, naho nanolotre fagnatetre oroa arivo teo amizay. ⁷ Zagnahare niseho tamy Solomona tamio hale eo naho nanao tamine hoe:" Angataho! Ino ro tokone ameiko anao?" ⁸ Hoe Solomona tamin'Agnahare hoe:" Riha le fa nanoro fandefera bey tamy Davida raeko, naho nanao ahy ho mpanjaka teo amity toerane. ⁹ Amizao, ry Yaveh Zagnahare, ao mba ho tanterahe ty fampagnantegna nataonao tamy Davida raeko, satria nataonao mpanjaka ty ndaty maro agnisa hoe ty deboke ty tane raho. ¹⁰ Ka ameo fahamarea raho vaho fahaia, mba hahafahako mitarike ty vahoake toy, satria ia ro afake hitsara ty vahoakenao, ze vatane maro isake?" ¹¹ Hoe Zagnahare tamy Solomona hoe:" Satria tao amponao zay, naho satria tsy nangatake vola aman-karea riha, na hasy, na ty fiay reo ze malay anao, na mba ho ela velo riha, fa hamarea vaho fahaia ho ahy ty vatanao ro nangatahanao, mba hahafahanao manjaka amity vahoakeko, eo amireo ze nagnanovako anao ho mpanjaka, naho zao ro hataoko. ¹² Hameiko hamarea vaho fahaia riha androany. Hameiko vola aman-karea, vaho hasy avao kea riha, ze tsy nanagna reo mpanjaka teo alohanao, naho tsy hisy afaranao hana." ¹³ Ka avy tao Jerosalema bakagne amity fitoboha abo ze tao Gibeona ty Solomona, bakeo agnoloa ty tragno lay fivoria; nanjaka nagnera Israely re. ¹⁴ Namory reo Kalese vaho mpitiki-tsoavale ty Solomona, naho nana Kelese 1.400 vaho mpitiki-tsoavale roa-arivo vaho ray ale re ze natobone tao amity tana tioera ty Kalese, naho niarake tamine, ty mpanjaka tao Jerosalema. ¹⁵ Natao ty mpanjaka nimaro tao Jerosalema hoe ty vatokele ty volafoty vaho volamena, naho nataone nimaro hoe ty aviavy ze egne amireo tane gebo ty hetae sedera. ¹⁶ Hoe ty fagnafara reo soavale bakagne Egypta vaho kiho ho ahy Solomona, le vinily reo mpandrantone bakagne Kiho tamity viline toka reo. ¹⁷ Nagnafatre kalese bakagne Egypta tamity sekele volafoty enen-jato iereo, naho soavale tamity viline sekele 150. Iereo avao kea le nagnondra reo tagne amireo mpanjaka Hetita vaho reo Syriana.