¹ Voalohane vatane laha zao, le mandrisike raho fa reo fangataha, vavake, fifona, naho fisaora le natao hoahy ty ndaty iaby, ² hoahy reo mpanjaka vaho reo iaby eo amity fahefa, mba hahafahantika mivelo ampilamina vaho mivelo milamy amity toe-pagnahy arake an'Agnahare vaho hametea iaby. ³ Zay le soa vaho azo enkene eo agnoloan'Agnahare mpamonjentika. ⁴ Paie mba ho vonje iaby ty ndaty iaby naho hoavy amity fahaia ty mare. ⁵ Fa raike avao ro Zagnahare, naho raike avao ro mpagnelagnela an'Agnahare vaho ty ndaty, le ty lahilahy kirisity Jesosy. ⁶ Re nagnomea ty vatane ho vilim-pagnavota hoahy iaby, manahake ty fisehoa vavolombelo amity andro tokone ho ie. ⁷ Fa amize dineke zay, raho, ty vatako, le natao ho mpitalily vaho ho apositoly. Mirehake ty mare raho. Tsy mavande raho. Mampianatre reoJentilisa amity finoa vaho ty hamarea raho. ⁸ Laha zao, teako ty lahilahy ndra ia ia mba hivavake vaho hagnakatagna masy tsy amin-keloke ndra amity fifandiera. ⁹ Ka zay koa, teako ty ampela mba hiakanjo akanjo soa amity vatane, amity hamarea vaho fahafeheam-bata. Tsy tokone hanao volo mitaly, ndra volamena, ndra voahangy, ndra akanjo lafo vily. ¹⁰ Teko iereo hiakanjo amize mete hoahy reo ampela ze manoro toeram-pagnahy arake an'Agnahare amity alala reo asa soa. ¹¹ Ty ampela le tokone hianatre ampilamina naho hagnenke vatane. ¹² Tsy engako hampianatre ty ampela ndra hampianatre fahefa amity lahilahy, fa hijano ao agnate filamina. ¹³ Fa Adama ro finoro voalohane, bakeo Eva. Adama le tsy voafitake, fa ty ampela ro voafitake vatane tamity fandikan-dily. ¹⁵ Ndra zay aza, ho vonje re amity alala ty fiterahan-kolo, naho mitohy amity finoa vaho hatea naho hamasigna miarake amity fagnonognambata.