¹ Laha fa nihere baka nagnia reo Filistina ty Saoly, le natalily tamine hoe:" Agne agnefetre En-jedy ty Davida." ² Bakeo Saoly le nangalake lahilahy telo arivo vaoamare bakamy Israely iaby naho nindeha nipay i Davida vaho reo lahilahy tegne amity vatolampy reo Osen'ala. ³ Nimbaeo amity valan'agnondry tegne andala re, ty nisy zohy raike. Nilitre tao mba hanao maloto ty Saoly. Naho Davida vaho reo lahilahine le nitoboke lavitre tao afarane tao amity zohy. ⁴ Hoe reo lahilahy Davida tamine hoe:" Itoy andro ze nirehafa Yaveh laha fa nirehake taminao Re ty hoe:' Hatoloko eo antagnanao reo fahavalonao, mba hanovanao ze teanao hatao amine."' Bakeo Davida nitsanga naho nilaly moramora nindeha ka nandily ty moro ty akanjo lava Saoly. ⁵ Laha fa afake zay le nampijale aze ty arofo Davida satria nandily ty moro ty akanjo lava Saoly re. ⁶ Hoe re tamireo lahilahine hoe:" Yaveh anie handrara ty hanovako ze zaka zao amity tompoko, ty voahoso Yaveh, le ty hamotorako ty tagnako amine, laha mahisake fa voahoso Yaveh re." ⁷ Le nirehake mafe reo lahilahy tamireo rehake reo Davida, naho tsy namototre iereo hagnisy Saoly. Nistanga ty Saoly, naila ty zohy, naho nindeha tamity lalane. ⁸ Laha fa afake zay, le nitsanga avao kea Davida, niala ty zohy, naho nikaike i Saoly ty hoe:" Ry mpanjaka tompoko." Laha fa nanente aze bakao afarane ty Saoly, le nagnohoke ty tarehene tamity tane ty Davida naho nanoro fagnaja aze. ⁹ Hoe ty Davida tamy Saoly hoe:" Nagnino riha ro midranjy reo lahilahy ze manao hoe:' Ingo, mipay hanao raty anao Davida?' ¹⁰ Amizao hisa ty masonao ty fomba nametraha Yaveh anao teo antagnako tamintika tao anjohy. Ty ilane nirehake tamiko mba hamono anao, fa nandefetre taminao raho. Hoe raho ty hoe:' Tsy hamototre ty tagnako amity tompoko raho; satria voahoso Yaveh re.' ¹¹ Ingo, ry raeko, henteo ty moron-tombon'akanjo lavanao eo antagnako. Fa ty antone nandiliako ty moron-tombon'akanjo lavanao vaho tsy namonoako anao, le mba ho hainao vaho hisanao fa tsy misy raty na fivaliha antagnako eto, naho tsy nanonta taminao raho, na le mihaza ty aiko mba hamono ahy aza riha. ¹² Yaveh anie hitsara ahy vaho riha, naho Yaveh anie hamale fate ahy aminao, fa ty tagnako le tsy tokone handietre anao. ¹³ Arake ty rehafe ty ohabola ty ntaolo hoe:' Bakamity raty fagnahy ro hiavia ty haratia.' Fa tsy handietre anao ty tagnako. ¹⁴ Ho ania ro niakara ty mpanjaka Israely? Ia ro sesehenao? Amboa mate! Parasy! ¹⁵ Yaveh anie ho mpitsara vaho hagnomea fitsara ahy vaho riha, naho hanente amizay, naho hisolo vava ahy vaho hagnenga ahy hilay amity tagnanao." ¹⁶ Laha fa baka nirehake reo rehake reo tamy Saoly ty Davida, le hoe Saoly ty hoe:" Feonao vao zay, ry Davida anako?" Nagnakatre ty feone ty Saoly naho nitagny. ¹⁷ Hoe re tamy Davida hoe:" Mare vatane riha mihoatre ahy. Satria namale sao ahy riha, laha fa namale raty anao raho. ¹⁸ Nambaranao amizao ty fomba nagnanovanao soa tamiko, satria tsy namono ahy riha laha natao Yaveh teo antagnanao ty arofoko. ¹⁹ Fa laha misy lahilahy mahisake ty fahavalone, le handefa aze ampilamina vao re? Yaveh anie hamale soa anao amize vitanao tamiko androany. ²⁰ Amizao, haiko fa ho mpanjaka vatane riha naho hatoboke eo antagnanao ty fanjaka Israely. ²¹ Mifanta amiko amy Yaveh fa tsy handany reo fokoko afara riha, naho tsy hamoteke ty agnarako hiala amity tragnon-draeko." ²² Laha zao le nanao fifanta tamy Saoly ty Davida. Bakeo le nindeha noly ty Saoly, fa Davida vaho reo lahilahine kea nindeha nimbaeo amity fiaro mafe.