¹ Naho hoe iereo tamy Davida:" Ingo, mialy amy Keila ty Filistina naho mandrava reo famoloa." ² Ka nivavake tamy Yaveh Davida mba hagnampe aze ka nagnontane aze ty hoe:" Tokone hindeha hanafike reo Filistina reo vao raho?" Naho hoe Yaveh tamy Davida:" Mindehana naho tafiho reo Filistina ka vonjeo ty Keila." ³ Naho hoe reo lahilahy Davida tamine:" Ingo, matahotre tika eto Joda. Ka maike fa hindeha ho agne Keila ka hialy amireo tafike ty Filistina?" ⁴ Le mboe nivavake tamy Yaveh ndraike Davida mba hagnampe aze. Namale aze Yaveh hoe:" Mitsangana, mizotroa mbaeo Keila. Fa hameako anao ty fandresea reo Filistina." ⁵ Le nimbaeo Keila ty Davida vaho reo lahilahyne naho nialy tamireo Filistina. Nientene lavitre reo biby hare naho nagnisy iereo tamity famonoam-bey re. Ka voa vonje Davida ty ndaty Keila. ⁶ Laha fa nilay tagne amy Davida tao Keila ty Abiatara anadahy Ahimeleka, le nindeha niarake amity efoda tegne antagnane re. ⁷ Naho natalily tamy Saoly fa nimbaeo Keila ty Davida. Hoe ty Saoly:" Le fa namean'Agnahare ahy ho eo antagnako re. Ka voahily ao re satria nilitre tao amity tana misy vavahady vaho vala." ⁸ Nampikaike ty tafine iaby ty Saoly mba hialy, hindeha ho agne Keila, naho hanao faherano Davida vaho reo lahilahine. ⁹ Naho hay Davida fa manao heve-draty handiera aze ty Saoly. Naho hoe re tamy Abiatara mpisoro hoe:" Ento atoy ty efoda." ¹⁰ Le hoe Davida:' Ry Yaveh, Zagnahare Israely, le fa rey ty mpanomponao vatane fa Saoly le mipay hombaeo keila, mba handrava ty tana noho ty amiko. ¹¹ Hanolotre ahy ho eo antagnane vao ty ndaty Keila? Hindeha vao ty Saoly, arake ty rey ty mpanomponao? Ry Yaveh, Zagnahare ty Israely, mangatake aminao raho, mangatake rie mba rehafo ty mpanomponao." Naho hoe Yaveh ty hoe:" Hindeha re." ¹² Le hoe Davida ty hoe:" Hatolo ty ndaty Keila ho antagna Saoly eo vao raho vaho reo lahilahiko? Le hoe Yaveh ty hoe:" Hanolotre anao iereo." ¹³ Le nindeha ty Davida vaho reo lahilahine, ze tokone ho teo amity enenjato, ka niala bakao Keila, naho nindeha nifindrafindra toera. Natalily tamy Saoly fa nilay bakao keila re, naho najanone ty fagniagna. ¹⁴ Nijano tao agnate fiarova mafe tagne agnefetre ty Davida, tegne amity tane tazoa tagne agnefetre Zifa. Nipay aze isanandro ty Saoly, nefa Zagnahare tsy nanolotre aze tantagnane eo. ¹⁵ Naho hisa Davida fa nifofo ty aine ty Saoly; naho le fa tagne agnefetre ty Zifa agne Horesa ty Davida. ¹⁶ Naho Jonatana, anadahy Saoly, nindeha ka nimbaeo amy Davida tagne Horesa, naho nagnamafe ty tagnane tao amin'Agnahare. ¹⁷ Hoe re tamine ty hoe:" Ko matahotre. Fa tsy ho hisa ty tagna Saoly raeko riha. Riha ro ho mpanjaka eo amy Israely, naho zaho le ho agnilanao eo. Hay Saoly raeko zay." ¹⁸ Nanao fagnenkea teo agnoloa Yaveh iereo. Le nijano tao Horesa ty Davida, naho Jonatana noly tagne amity tanane. ¹⁹ Naho namonje Saoly tao Gibea reo Zifita ka nanao ty hoe:" Tsy Davida vao ro mihaja agne aminay ao agnate ty batery fiaro mafe agne Horesa, agne amity tazoa Hakila, ty agne antimo Jesimona? ²⁰ Amizao mindeha, ry mpanjaka! Arake ty teanao, mindeha! Hanolotre aze ho eo antagna ty mpanjaka ro anjaranay." ²¹ Naho hoe Saoly:" Yaveh anie hitahy anareo. Fa niferegnay ahy nareo. ²² Mindehana, anovo azo antoke vatane. Haizo vaho paio ty toera ze ihajane vaho ze nahisake aze tagne. Natalily tamiko fa mahihitse vatane re. ²³ Ka henteo, naho haizo reo toera iaby ze hagnajane ty vatane. Le miheregna ndraike amiko atoy hitalily mare kea, le hiarake aminareo hihere raho. Laha agne amity tane re, le hopaieko amireo Joda agnarivone iaby." ²⁴ Bakeo nitsanga iereo ka nimbaeo Zifa taloha Saoly. Naho tagne amity efetre ty Maona ty Davida vaho reo lahilahine, tagne Araba antimo Jesimona. ²⁵ Nindeha nipay aze Saoly vaho ty lahilahine. Fa natalily tamy Davida zay, ka nindeha tagne amity tane tazoa bey-vato re naho nitoboke tagne agnefetre Maona. Laha fa naharey zay ty Saoly, le nagnia Davida tagne antane efetre Maona re. ²⁶ Naho Saoly nindeha tamity ila ty vohitse raike, Davida vaho reo lahilahine kea tamity ilane raike hafa. Nindeha malaky ty Davida mba hihalavitre Saoly. Laha fa nagnodidy Davida vaho ty lahilahine ty Saoly vaho ty lahilahine mba hangalake iereo, ²⁷ le nisy mpinday rehake namonje i Saoly ka hoe re tamine ty hoe:" Malakia ka avia, fa manao fanafiha handietre ty tane reo Filistina." ²⁸ Le nihere bakamity fagniagna i Davida ty Saoly naho nindeha nifanao tamireo Filistina. Laha zao ro nikaiha reo toera reo ty hoe:" Vatolampy ty Filaisa. ²⁹ Niakatre bakagne Davida ka nitoboke tao amireo fiaro mafe i En-jedy.