¹ Naho Saoly nirehake tamy Jonatana anadahine vaho tamireo mpanompone ty tokone hamonoa iereo Davida. Kanefa ty Jonatana, ana Saoly, le teane ty Davida. ² Ka hoe ty Jonatana tamy Davida:" Mipay hamono anao ty Saoly raeko. Laha zao miambena amity maray naho mihaja amity toera mangike. ³ Zaho hiakatre hitsanga eo agnila ty raeko eo amity baibo ze misy anao, naho hirehake miomba anao amin-draeko raho, Laha mahay raraha raho, le horehafeko riha." ⁴ Nitalily soa miomba Davida tamy Saoly raene ty Jonatana ka hoe re tamine:" Ao tsy hanonta amy Davida mpanompone ty mpanjaka. Fa tsy nanonta taminao re, naho ninday soa ho anao reo asane. ⁵ Fa re le fa nanao ty arofone tsisy dikane ka namono ty Filistina. Yaveh le fa ninday fahareseam-bey ho ahy Israely iaby. Nahisake zay riha ka fale. Nagnino ro hanonta handietre ty lio tsy manan-tsiny amity famonoa Davida tsy tsinontsino riha?" ⁶ Nidranjy Jonatana ty Saoly. Ka nifanta ty hoe:" Laha mboe velo kea Yaveh, le tsy hovonoe re." ⁷ Le nikaike Davida ty Jonatana, naho rinehane tamy Davida ze zaka iaby zay. Niente Jonatana tagne amy Saoly ty Davida, naho teo amity fiatrehane hoe ty taloha ndraike re. ⁸ Naho nisy aly ndraike, le niakatre hialy amity Filistina Davida ka naharese iereo tamity vonoam-bey. Le nilay teo agnoloane iereo. ⁹ Niavy tamy Saoly ty fagnahy raty bakamy Yaveh laha nitoboke tao antragnone niarake tamity lefo tegne antagnane re, naho laha nititike zaka-magneno igne ty Davida. ¹⁰ Naho Saoly nagnandra nikendre Davida teo amity rindry tamity lefone, kanefa nilay ty fiatreha Saoly re, ka natsato Saoly teo amity rindry ty lefo. Nilay ty Davida naho afake-nilay tamity hale igne. ¹¹ Nandefa irake tagne antragno Davida mba hanente aze mba hahafahane mamono aze ty Saoly amity maray. Mikala, valy Davida, nirehake aze ty hoe:" Laha tsy mamonje ty arofonao amizao hale zao riha, le hovonoe riha tehamaray." ¹² Nenga Mikala hizotro teo amity varavara-kele ty Davida. Le lasa re ka nilay, naho afake-nilay. ¹³ Nangalake sampe tao antragnone ty Mikala le nanao zay teo ampandreane. Naho nangalake onda volon'ose re ka natobone teo amity lohane, naho rinakone akanjo zay. ¹⁴ Laha nandefa irake mba hangalake Davida Saoly, le hoe re ty hoe:" Marare re." ¹⁵ Le nandefa irake mba hanente Davida ndraike ty Saoly, ka hoe re:" Ento hiakatre amiko atoy amity fandrea re, mba hahafahako mamono aze." ¹⁶ Laha nilitre reo irake, ingo, ty sampe ze tao antragnone ro teo ampandrea miarake amity onda volon'ose eo amity lohane. ¹⁷ Le hoe ty Saoly tamy Mikala:" Nagnino ro namitake ahy riha ka namototre ty fahavaloko hindeha, ka le afake-nilay re?" Mikala namale Saoly ty hoe:" Hoe re tamiko,' Engao raho hindeha. Nagnino raho ro hamono anao?"' ¹⁸ Naho nilay vaho afake-nilay Davida le nimbaeo amy Samoela tagne Rama ka nitalily tamine ty zaka iaby ze natao Saoly tamine. Le nindeha re vaho Samoela ka nitoboke tagne Naiota. ¹⁹ Nisy nagnambara tamy Saoly zay, manao hoe:" Ingo, ao Naiota agne Rama ty Davida." ²⁰ Le nandefa irake hitsepake Davida ty Saoly. Laha nahisake ty nama ty mpaminane namisavisa iereo, naho Samoela nitsanga ho bey iereo, ty fagnahin'Agnahare niavy tamity ira Saoly, le namisavisa kea iereo. ²¹ Laha fa nirehake zay Saoly, le nandefa irake hafa re, naho namisavisa avao kea iereo. Naho nandefa irake fagnintelone ndraike ty Saoly, ka namisavisa avao kea reo. ²² Le nimbaeo Rama kea re naho niavy teo amity lava-drano tao Seko. Nangnontane re hoe:" Aia ty Samoela vaho Davida?" Nisy ndaty nirehake hoe:" Ingo, ao Naiota agne Rama iereo." ²³ Nimbaeo Naiota agne Rama ty Saoly. Le niavy tao amine kea ty fagnahy Yaveh, ka namisavisa tegne ampindeha mandram-piavine tagne Naiota tagne Rama re. ²⁴ Nagnafake ty sikine re naho namisavisa teo agnoloa Samoela. Tsy nisiky zisike ty andro aman'ale iaby re. Zay ro antone nagnontanea iereo ty hoe:" Agnate ty mpaminane kea vao ty Saoly?'