¹ Nisy lahilahy raike bakao Ramataima agne Zefotita, tane tazoa ty Efraima; ty agnarane le Elkana anadahy Jeroama anadahy Eliho anadahy Toho anadahy Zofa, Efraimita. ² Nana valy roe re, ty voalohane le i Hana, naho ty agnara ty faharoe le i Penina. Nanagnanake ty Penina, fa Hana kea tsy mba nana. ³ I lahilahy io le isan-tao ro niala bakagne amity tanane mba hanompo vaho hanao soro ho ahy Yaveh tompo ty maro ao Silo. Tao reo anake roe lahy Ely, Ofnia vaho Finehasa, mpisoro Yaveh. ⁴ Laha avy ty anjara andro hanova Elkana soro isan-tao, le nagnomea vakin-kena ho ahy Penina valine zisikagne re, naho ho ahy reo anadahine vaho reo anakampelane iaby. ⁵ Fa ho ahy Hana kea le vakine roe avao ro nameane aze, satria teane ty Hana, na le fa natao Yaveh tsy miterake aza re. ⁶ Nipay aze mafe ty rafe-vavene mba handragitre aze, satria Yaveh tsinampiterake aze. ⁷ Ka isan-tao, laha fa niakatre tagne antragno Yaveh re amity fokone, le nipay aze zisikeagne ty rafe-vavene. Laha zao le nitagny vaho tsy nihina na ino ino re. ⁸ Fa Elkana valine tamine zisikagne hoe:" Hana, nagnino riha ro mitagny? Nagnino riha ro tsy mihina? Nagnino ty arofonao ro meloke? Tsy soa aminao noho ty anadahy folo vao raho? ⁹ Indraike, le nindeha Hana laha fa baka nihina vaho ninondrano tao Silo iereo. Naho Ely mpisoro nitoboke teo amity sezane teo agnila ty vavahady ty tamepoly Yaveh. ¹⁰ Ore vatane re; nivavake tamy Yaveh re naho nitagny mafe. ¹¹ Nanao vava re naho nanao ty hoe:" Ry Yaveh tompo ty maro, laha hisanao ty fijalea ty mpanomponao le tiarovo raho, naho ko magnaligno ty mpanomponao, fa ameo anadahy kea ty mpanomponao, le hatoloko Yaveh re amity androm-piaignane iaby, naho tsy hisy meso hikihisa ty lohane." ¹² Naho laha mboe nanohy nivavake teo agnoloa Yaveh re, le hinente Ely ty vavakene. ¹³ Nirehake tao ampone ty Hana. Nihetseketseke ty vavane, feie fa mamo re. ¹⁴ Le hoe Ely tamine:" Hirifiry riha ro ho mamo? Miala amity divainao." ¹⁵ Hana namale hoe:" Aha tompoko, ampela ore ampagnahy raho. Tsy ninon-draho na zaka-mahamamo, fa mirehake ty agnateko ato agnoloa Yaveh raho. ¹⁶ Ko hevere ho ampela tsy misy hegnatre ty mpanomponao; nirehake tamity habey ty fijaleako vaho ty fipaiane ahy raho." ¹⁷ Naho Ely namale ka nanao hoe:" Mindehana ampilamina; Zagnahare Israely anie hamale ty hatake ze nangatahenao tamine." ¹⁸ Hoe ty ampela:" Ao hahisake saotre eo amasonao ty mpanomponao." Le nindeha tamity lalane rampela ka nihina; tsy nalahelo sase ty toerane. ¹⁹ Nindeha vaho magneno akoho iereo ka nanompo teo agnoloa Yaveh, naho nihere tagne antragnone tagne Rama ndraike iereo bakeo. Niarake-niroro tamy Hana valine ty Elkana, naho Yaveh nahatiaro aze. ²⁰ Laha fa niavy ty andro, le nibevoka ty Hana naho niterake kolo lahilahy. Nikaike ty agnarane hoe: Samoela re, nanao hoe:" Satria bakamy Yaveh ro nangatahako aze." ²¹ Elkana vaho reo fokone iaby le niakatre ndraike mba hanolotre ty soro isan-tao ho ahy Yaveh ka nandoa ty vavane. ²² Fa Hana kea tsy nindeha; le fa nirehake tamity valine re hoe:"Tsy hindeha raho mandram-pisara-nono ty kolo; naho hoenteko re, mba hahafahane miboake eo agnoloa Yaveh naho hitoboke agne zisikezay." ²³ Hoe ty Elkana valine tamine hoe:" Anovo ze hisanao fa soa aminao. Mandignasa madram-pisara-nonone; feie, Yaveh avao anie ro hagnamafe ty rehane." Le nijano rampela naho niteza ty anadahine mandram-pisarahane nono aze. ²⁴ Laha fa sinarane nono re, le nientene niarake tamine, niarake tamity anakagnombe kele telo tao raike, sakafo raike efaha, naho tavoangin-divay raike, ka nientene tao antragno Yaveh tao Silo re. Naho mboe kele ty kolo. ²⁵ Vinono iereo ty anakagnombe, naho nientene tagne amy Ely ty kolo. ²⁶ Hoe re ty hoe:" O, ry tompoko! Laha mboe velo kea riha, ry tompoko, zaho ty ampela ze nitsanga teo agnilanao nivavake tamy Yaveh. ²⁷ Fa ty kolo toy ro nivavahako naho namea Yaveh ahy ty hatako ze nangataheko tamine. ²⁸ Le fa nameako Yaveh re, laha mboe velo kea re le hatolotre Yaveh." Le nanompo Yaveh teo re.