¹ Beko nataon'i Davida,Yaveh o,miasa amy zay hanohitsy gnahy;mialia amy zay mialy agnamiko. ² Rambeso gny ampinga kely ndraiky gnampinga-benao;mintsangana ka ampeo zaho. ³ Ampiasao amy ze mihaza gnahy gny lefo ndraiky famaky fialianao;volagno ami-gny fagnahiko hoe:"Zaho ro famonjenao" ⁴ Engao ho megnatsy ndraiky ho afa baraka ze te hamono gnaiko.Engao hiamboho ndraiky ho tsobo gny hevitsy ze te hagnisy raty gnahy. ⁵ Engao hanahaky gny lila andesin-tsioky rozy,laha mandraoky gnandrozy gny anjelin'i Yaveh. ⁶ Engao ho maiky ndraiky hadoso gny lalan-drozy,lafa magnea gnahy gny anjelin'i Yaveh. ⁷ Mametraky gny haratony ho gnahy tsy misy antony rozy;mihaly lavaky aho gnan'ny gnaiko tsy misy dikany rozy. ⁸ Engao hamango an-drozy masika gny faharava.Engaho ze harato napetra-drozy avao ro hanambotsy gnandrozy.Engaho ho lavo ao rozy, la agnatin'ny faharava. ⁹ Nefa hifaly amin'i Yaveh zaho,ndraiky hifalifaly amin'ny famonjeany. ¹⁰ Gny taolako iaby hanaohoe he :"Yaveh o,ia moa ro hanahaky Gnanao,zay mamonjy gny mahantsa amin-drozy matanjaky mare ho gnandrozy ndraiky gny malahelo voho gny mijaly amy ze te hangalatsy an-drozy? ¹¹ Mintsangana nareo vavolombelo tsy to;mpanvady gnahy rozy. ¹² Valean-drozy raty zaho ho ami-gny sao.Malahelo mare zaho. Nefa,tamin-drozy nisiloky,la nisalotsy fiojea zaho;tsy nihinan-kany ho gnandrozy aho tamy gny fagnondrahako gny kabesoko tamy gny tratrako. ¹⁴ Gnalaheloko gnandrozy la manahaky gny falahelovako gny rahalahiko;nalahelo manahaky gny miojy gnandreniko zaho. ¹⁵ Nefa laha taitsy gny foko,la nifaly rozy, ka nifamory;samby nivavaky hanohitsy gnahy rozy,ka la taitsy zaho.Tsy miegny nanatatataky gnahy rozy. ¹⁶ Tsy misy fagnaja sasy ro sady nandraty gnahy rozy ;tsy nivola tagnamiko iaby rozy. ¹⁷ Tompo o,ombia zaho vo henteanao?Lombao ami-gny fandravan-drozy gny fagnahiko,ndraiky gnaiko ami-gny biby masiaky. ¹⁸ Ka hisaotsy gnanao ami-gny fivavaha zaho;handrengy gnanao ami-gnolo maro zaho. ¹⁹ Ka henga hifaly agnamiko eto gny fahavalo mpamitaky;engao rozy tsy hahavita gny fanaovan-dratiny. ²⁰ Vatany tsy miresaky filongoa rozy fa magnaly te hamitaky ze mifitaky soa an-taninay ao. ²¹ Manoka-bava hitoretoreo agnamiko rozy;mivola rozy hoe:"Oho,Oho gny masonay ro fa nahajery gnazy." ²² Fa nahajery gnazy Iha,Yaveh,ka miegny tompo o,ka enganao lavitsy zaho. ²³ Mitsangana ndraiky mifohaza hiaro gnahy,Andrianagnahariko voho tompoko,ampeo gny aliko. ²⁴ Arovo zaho,Yaveh Ndranagnahariko,fa ti Iha;ka enga hifaly agnamiko eto rozy. ²⁵ Engao rozy tsy hametsivetsy hoe:"Oho,azonay ze tianay."Engao ao rozy tsy hanao hoe:"Fa naravanay ie." ²⁶ Ataovo megnatsy ndraiky trobo hevitsy ze te hagnisy raty gnahy.Engaho hisalotsy hegnatsy ndraiky fahafahanbaraka ze mandraty gnahy. ²⁷ Engaho hivola ampifalea ndraiky ho faly reo ze magnano soa gnahy;engao rozy hisafa isa-maray hoe:"Ho rengea Yaveh,Ie ro magnomea fahafaham-po gnanay." ²⁸ La hangambara gny fahitianao ndraiky handrengy Gnanao ami-gnandro iaby zaho.