¹ Gny fagnambara mikasiky gnan'i Ninive. Gny bokiny gny fahitan'i Nahoma, gny Elkosita. ² Ndranagnahary mamarahy ndraiky mamaly faty Yaveh. Mamaly faty ndraiky antsiky siaky Yaveh. Mamaly raty ami-gny mpanohitsy agnaminy Yaveh, voho manohy gny siakiny ho gnany gny fahavalony Ie. ³ Mahari-po ndraiky bavata ami-gny heriny Yaveh; tsy hagnambara gnany reo fahavalony ho tsy manan-tsiny sasy Ie. Hanao gny lalany ami-gny tafion-tsioky ao Yaveh, voho gny raho ro lembokiny gny tombony. ⁴ Mivola mare gny riaky Ie ka magnamaiky gnany zay, mandritsy gny renirano iaby Ie. Ketraky i Basana, voho i Karmela avao koa; malazo gny reo foleran'i Libanona. ⁵ Mitebiteby ami-gny fagnatrehany gny reo vohitsy, voho mietry gny reo havoa; miringa ami-gny fagnatrehany gny tany, eka vatany, gny tany ndraiky olo iaby mipetraky agnaminy ao. ⁶ Ia ro ahajoro agnatrehany gny siakiny? Ia ro ahatohitsy gny firehatani-gny siakiny? Miaraky manahaky gny bolo gny siakiny, nivinakivakiny gny reo vatolampy. ⁷ Soa Yaveh, fiarova mahery ami-gn'andro fijalea; voho matoky ami-ze mialoky agnaminy Ie. ⁸ Fa hamonga tanteraky gny reo fahavalony ami-gny safo-drano manafotsy koa Ie;hagnenjiky gnan-drozy ami-gny hiky agny Ie. ⁹ Mitetiky ino anohera gnan'i Yaveh nareo ry vahoaky? Hamonga tanteraky gnany zay Ie;tsy hisandratsy fagnindroany gny fahoria. ¹⁰ Fa ho azon-kavaka manahaky gny kirihitsy fatiky, ho safotsy gny raha finominy, ho levoni-gny bolo tanteraky manahaky gny mololo maiky rozy. ¹¹ Nisandratsy tagnaminao tao, ry Ninive, gn'olo nikasa raha raty hanohera gnan'i Yaveh, la olo nampirusiky faharatia. ¹² Zao ro nivinolan'i Yaveh:"Na la ami-gny tanjany ao tanteraky voho maro isaky aza rozy, la ho rava rozy, tsy hisy olony sasy. Fa iha, ry Joda: Na la nampijaly gnanao aza Iaho, tsy hampijaly gnanao sasy Iaho. ¹³ Voho hanapaky gny ziogany reo olo agnaminao ao Iaho,hanapaky gnany reo rohinao Iaho." ¹⁴ Fa nagnomea baiko momba gnanao Yaveh, ry Ninive: "Tsy hisy sasy gny taranaky handay gn'agnaranao. Hamongotsy gnany reo sari-draha an-idina ami-gny tragnony reo ndranagnaharinao Iaho. Hialy gnany reo fagnasanao iaho,fotony tsisidikany iha." ¹⁵ Ingo, am-bohitsy egny gny tombony gn'olo manday vaovao mahafaly, magnambara fiadagna! Ankalzao gny firavoravoanareo, ry Joda, voho solo gny fatsinareo, fa tsy hilay gnanreo sasy gny raty fagnahy; rava tanteraky ie.