¹ Sady tamin'ny gnandro raiky, laha nampagnanatsy gny vahoaky tao amin'ny tempoly Jesosy sady nitory gny filazantsara, la nagnato Gnazy reo lohan'ny mpisoro voho mpanora-dalagna nisondry tami'ireo loholo. ² Nivola rozy, nanao tamin'ny hoe:"Volagno anay hoe amin'ny fahafatesa ino ro hanaovanao reo raha reo? Na koa ia ro nagnome anao zao fahefa zao?" ³ Namaly Ie sady nivola gnazy reo hoe:" Zaho koa la hametraky fagnonbtania aminareo. Volagno Gnahy gny mahakasiky ⁴ gny batisan'i Jaona. Moa va zay bakaagny an-dagnitsy sa bakamin'ny olombelo?" ⁵ Nialy hevitsy rozy, nivola hoe:"Laha hamaly tsika hoe:' Bakagny an-dagnitsy' la hivola Ie hoe:' ka nagnino nareo ro tsy nino Gnazy?' ⁶ Fa laha mivola tsika hoe:' Bakami'ny olombelo,' la hitora-bato antsika gny vahoaky iaby, satria rozy la resy lahatsy fa Jaona la mpaminany." ⁷ Lafa izay la namaly rozy fa tsy hain-drozy zay nahaviany. ⁸ Jesosy nivola tamin-drozy hoe:"Zaho koa tsy hivola aminareo zay fahefa hanaovako zao raha iaby zao." ⁹ Novolagniny tamin'ny vahoaky zao fagnohara zao:"Nisy johary raiky nanao tanim-boaloboka, nampagnofa izay tamin'ny mpamboly voaloboky, sady nandeha tagny amin'ny firenena hafa tagnatiny gny fotoa maharitsy. ¹⁰ Tamin'ny lera voatondro la nandefa mpanompo ie ho agny amin'ireo mpamboly voaloboky, fa tokony hagnome gnazy gny voankazogn'ny tanim-boloboky rozy. Novangoan'ireo mpamboly anefa ie, sady nalefany nipoly tagnam-polo. ¹¹ Bakeo la nandefa mpanompo hafa ndraiky ie sady la novangoan-drozy avao koa, nalainy baraka, sady nalefan-drozy tagnam-polo. ¹² Mbo nandefa fagnintelony ie sady niratran-drozy koa ie, sady noroasiny. Lafa izay la nivola gny tompogn'ny tanim-boaloboky hoe:'Ino ro ho ataoko? Halefako agny gny anaky lahy malalako. Mety mba ho hajain-drozy ie." ¹⁴ Fa lafa jerin'ireo mpamboly voaloboky ie, la nifampiresaky rozy, nivola hoe:' Io gny mpandova. Ndao hovonoantsika ie, mba ho lasantsika gny lova.' ¹⁵ Noroasin-drozy niala gny tanim-boaloboky ie sady novonoan-drozy. Ino zany ro ho ataon'ny tampogn'ny tanim-boaloboky amin-drozy? ¹⁶ Ho avy ie sady hamotiky reo mpamboly voaloboky, sady hagnome gny tanim-boaloboky ho gnan'ny hafa." Lafa nahajanjy izay rozy, la nivola hoe:"Sagnatria amin'Andranagnahary!" ¹⁷ fa nijery gnazy reo Jesosy, nivola hoe:"Ino ro hevitsign'ny voasoratsy hoe:"Gny vato zay tsy nenkegnin'ireo mpagnorin-tragno ro lasa vato fehizoro'? ¹⁸ Gny olo iaby zay milavo eo amin'io vato io la ho torotoro. Fa na ia na ia hilavoany, la ho potiky." ¹⁹ Ka nila hisambotsy Gnazy tamin'io lera io reo mpanora-dalagna voho reo mpisoro, fa hain-drozy fa nivolagninny io fanohara io hanohitsy gna-drozy. Nefa natahotsy gny vahoaky rozy. ²⁰ Teo am-pandiniha Gnazy soa, la nandefa mpi tsikilo mody ho marina rozy, mba hahazoan-drozy mahajery tsiny amin'ny volany, ka hanolotsy Gnazy eo amin'ny fanapaha voho gny fahefan'ny goverinora. ²¹ Nagnontany Gnazy rozy, nivola hoe:"Mpampagnatsy o, hainay Iha fa mivola voho mampagnanatsy am-pahamarigna, sady tsy voasariky gny hevits'ia na ia, fa iha la mampagnanatsy gny fahamarigna mahakasikign'ny lalagn'Andranagnahary. ²² Ara-dalagna ho gnanay va gny mandoa hetra amin'i Kaisara, sa tsia?" ²³ Fa Jesosy la nahatakatsy gny hafetsen-drozy, sady nivola tamin-drozy hoe:" ²⁴ Mampisehoa denaria raiky Agnamiko. An'ia io sary voho agnara eo aminy io?" Nivola rozy hoe:" An'i Kaisara." ²⁵ Hoy Ie tamin-drozy hoe:"Noho izay omoe an'i Kaisara gny raha zay an'i Kaisara, sady an'Andranagnahary, reo raha zay an'Andranagnahary." ²⁶ Tsy nahajery tsiny tamin'izay nivolagniny teo agnatrehan'ny vahoaky rozy, fa la nitseriky tamin'ny valin-dresaky ka tsy nivola. ²⁷ Lafa avy teo amin'ny sasany tamin'ireo Sadoseo, reo zay nivola fa tsy misy gny fitsangagna amin'ny maty, ²⁸ nagnontany Gnazy rozy, nivola hoe:"Mpampagnanatsy o, Mosesy la nanoratsy ho gnantsika fa laha maty gny rahalahin'ny johary raiky, manam-baly, sady tsy managn'anaky, la tokony hangalaky valy gnan'ny valin-drahalahiny gny johary, sady hagnome anaky ho gnan'ny rahalahiny. ²⁹ Nisy mpirahalahy fito sady gny voalohany nanam-baly, sady tsy nanagn'anaky, ³⁰ Nampakatsy gnazy gny fahatelo, sady manahaky izay iaby rozy fito samy tsy nanagn'anaky, sady maty. ³² Tafaran'izay la maty koa gny vehivavy. ³³ Amin'ny fitsangagna amin'ny maty, ho valin'ia zany ie? Fa samby fa nanambaly Gnazy rozy fito." ³⁴ Jesosy nivola tamin-drozy hoe:" Reo anak'izao tontolo zao la mampaka-bady voho ampakary. ³⁵ Fa reo zay jery amin'izao fa mendiky gny handramby gny fitsara amin'ny maty la tsy hampaka-baly na hampakarina. ³⁶ Tsy ho maty sasy rozy, satria mitovy amin'ireo anjely voho reo anak'Andranagnahary, zay anaky gny fitsangagna amin'ny maty. ³⁷ Fa gny maty la natsanga, na Mosesy aza la nampiseho, teo amign'ny toera zay nisy gny voaroy, zay nikaiky gny Tompo ho Ndranagnaharin'i Abrahama voho Ndranagnaharin'Isaka sady Ndranagnaharin'i Jakoba. ³⁸ Sady Ie la tsy Ndranagnahary gny maty, fa gny velo, satria gny iaby la velo ao aminy." ³⁹ gny sasany tamin'ireo mpanora-dalagna namaly hoe:"Mpampagnanatsy o, namaly soa Iha." ⁴⁰ Satria tsy mahasaky nametraky fagnontania hafa taminy sasy rozy. ⁴¹ Jesosy nivola gnan-drozy hoe:"Ahoa ro ivolagnan-drozy fa Kristy la anaky lahin'i Davita? ⁴² Davita vatany ro nivola tao amin'ny bokin'i Salamo hoe: Gny Tompo nivola tamin'ny Tompoko hoe:' Mipetraha eo an-tana ankavagnako, ⁴³ mandra-panovako gny fahavalonao ho fitoeran-tombokinao.' ⁴⁴ Lafa izay Davida la nikaiky an'i Kristy hoe:'Tompo', ka ahoa ro maha anak'i Davida Gnazy?" ⁴⁵ Teo agnatrehan'ny olo iaby la nivola tamin'ireo mpianatsiny Ie hoe:" ⁴⁶ Mitandrema amin'ny mpanora-dalagna zay magniry handeha misondry amin'ny akanjo lava, voho tea fiarahaba manoka egny an-tsena, voho seza voalohany ao agnaty synagoga, sady toera voalohany agny amin'ny fanasa. ⁴⁷ Rozy koa la mandany gny tranon'ireo mpanday vata, sady manao vavaky lavaregny ho fisehosehoa. Gny johary manahaky izay la hahazo fagnameloha bevata vatany."