¹ Niavy tam'i Jona gnanaky lahin'i Amitahy teo gny safan'i Yaveh manao hoe: ² "Mitsangana voho mandehana a Ninive agny, tana la vatany bavata, voho miresaha gny momba gnany zay, fotony fa niakatsy tagnatrehako teo gny faharatian-drozy." ³ Fa nitsanga i Jona mba hilay gny fagnatrehan'i Yaveh voho nandeha ta-Tarsisy tagny. Nidrotso ta Jopa tagny ie voho nahita sambo hienga ho a Tarsisy agny. Ka la naloany gny fore voho niakatsy tami-gny sambo tao niaraky tamin-drozy ho a Tarsisy agny ie, lavitsy gny fagnatrehan'Dranagnahary. ⁴ Fa nandefasan'i Yaveh tsioky mahery tami-gny riaky tegny voho la lasa navaka mare gny reo tan-tsambo ka nikaiky mare gny ndranagnahariny manoka. ⁵ Natorakin-drozy tan-driaky tagny gny enta tami-gny sambo tao mba hagnamaiva gnany zay. Fa Jona koa nidrotso an-daliky tami-gny sambo tao, voho nentsilagny agnaini-gny roro tao. ⁶ Ka namonjy gn'azy gny kapitenin-tsambo voho nisafa tagnaminy hoe: "Nagnino iha miroro? Mitsangana! Keho gny ndranagnaharinao! Mety mba ahita gnantsika gny ndranagnaharinao ka tsy ho maty tsika." ⁷ Nifampiresaky rozy iaby nanao hoe: "Mamonjea, ndao tsika hanao ankitsapaky, mba ahafahan-tsika mahay hoe ia ro antony zao loza miseho agnamin-tsika zao." Ka nataon-drozy gny ankitsapaky, voho niebotsy tam'i Jona teo raha igny. ⁸ La hoy rozy tam'i Jona hoe: "Mba volagno gnanay lahy hoe ia ro antony zao loza miseho agnamin-tsika zao. Ino gn'asanao, voho bak'aia iha? Ino firenenanao, voho bak'ami-gny vahoakinia iha? ⁹ Hoy Jona tagnamin-drozy hoe: "Hebreo iaho, voho mavaka gnan'i Yaveh, Ndranagnaharini-gny lagnitsy, nanao gny riaky ndraiky gny tany maiky." ¹⁰ Voho vomaiky niha-navaka gny reo johary ka nisafa tam'i Jona hoe: "Fa nataonao toy?" Fa hainy johary reo fa nilay gny fagnatrehan'i Yaveh ie, fotony nivinolany tamin-drozy. ¹¹ Voho hoy rozy tam'i Jona hoe: "Ino ro tokony hataonay agnaminao mba hampilamy gny riaky ho gnanay?" Fotony niha nagnonja mare la vatany mare gny riaky. ¹² Hoy i Jona tagnamin-drozy hoe: "Rambeso iaho voho atoraho agnain-driaky agny. La hilamy ho gnanareo gny riaky, fotony haiko fa nohony iaho ro mahavy gnany zao tafion-tsioky zao hiseho agnaminareo." ¹³ Na la zay aza, la namohy mare gny reo johary mba hampimpoly gnan-drozy an-tety egny, fe tsy afaky nanao gnany zay rozy fotony niha nahery gny riaky nanohitsy gnan-drozy. ¹⁴ Noho zay la nikaiky mare gnan'i Yaveh rozy voho nanao hoe: "Mangataky agnaminao rahay, ry Yaveh, mangataky agnaminao rahay, ka enga ho maty nohoni-gn'ain'ity johary ity rahay, voho ka ampahasiahy agnaminay gny fahafatezany, fotony Iha, la fa nanao araky ze sitra-ponao." ¹⁵ Ka la nirinambin-drozy i Jona voho natorakin-drozy tagnain-driaky tagny, voho nijano tsy nisafoaky gny riaky. ¹⁶ Bakeo la navaka mare gnan'i Yaveh johary reo. Nagnomea saro ho gnan'i Yaveh rozy voho nifatsy. ¹⁷ Voho fa nagnoma fia bavata hitely gnan'i Jona i Yaveh, ka nijano tagnaini-gny vavoniny fia igny tao telo andro ndraiky telo haly i Jona.