¹ Ka nisy Fariseo raiky atao hoe Nikodemosy , mpitariky gny Jiosy . ² Namonjy gnan'i Jesosy tamy gny andro magnotagnaly johary io ka niresaky tagnaminy hoe:" Raby, hainay fa mpagnanatsy zay bakamin-Dranagnahary Iha, fotony tsy misy mahavita gnan'ireo famantara ataonao laha tsy misondry agnamin-Dranagnahary." ³ Ka la namaly gnazy Jesosy hoe:" Resahako aminareo to, la to tokoa, fa laha tsy ateraky ndraiky gnolo , la tsy hahajery gny fanjakan-Dranagnahary ie." ⁴ Nikodemosy niresaky tagnaminy hoe:" Amy gny fomba manao akory ro hahateraky gnolo raiky laha fa antitsy ie? Tsy afaky hilitsy fagnindroeny an-tron-dreniny ao ie ka haterany , sa va afaky?" ⁵ Namaly Jesosy hoe:" Rehafiko agnaminao to , la to tokoa, fa laha tsy nateraky tamy gny rano voho gny fagnahy gnanak'olo, la tsy afaky hilitsy amy gny fanjakan-Dranagnahary ao ie. ⁶ Ze ateraky gny nofo la nofo, voho ze ateraky gny fagnahy la fagnahy. ⁷ Fa ka tseriky amy ze raha volagniko gnanao hoe:" Tsy maintsy hateraky ndraiky nareo." ⁸ Gny tsioky mitsioky nda aia aia iriny; janao gny feony, fa tsy hainao ze niaviany na ze handehanany. Manahaky gnan'io koa ze ateraky gny Fagnahy." ⁹ Namaly Nikodemosy ka niresaky tagnaminy hoe:" Manao akory gny fomba hahatanteraky gnan'io raha io?" ¹⁰ Jesosy namaly ka nivola tagnaminy hoe:" Mpagnanatsy gn'Ysraely va iha, la mbo tsy mazava agnaminao avao raheo? ¹¹ Volagniko agnminao , to,la to tokoa , fa ze hainay volagninay, voho rahay magnambara gny momba ze hitanay. kanefa mbo tsy magnaraky gny fagnambaranay nareo. ¹² Laha nagnambara tagnaminareo gny raha teto amy toy tany toy aho nefa tsy hinoanareo, amy gny fomba manao akory moa ro hinoanareo Gnahy laha hitantara agnaminareo gny raha-misy an-dagnitsy agny Aho? ¹³ Tsy nisy niakatsy an-dagnitsy agny laha tsy zay nizotso bakagny, la Gnanak'Olo . ¹⁴ Ka manahaky gny nanandratan'i Mosesy gny bibilava tagny agn'efitsy, ro tsy maintsy hanandrata Gnanak'Olo, ¹⁵ mba hanagnan'iaby ze mino Gnazy gny fiaigna mandrakizay. ¹⁶ Fa tena tia gnan'izao tontolo zao tokoa Ndranagnahary , ka nagnomezany Gnanaky lahiny tsy roe tsy telo, mba tsy ho trobo ze mino Gnazy iaby fa hana gny fiaigna mandrakizay. ¹⁷ Fa Ndranagnahary tsy nagniraky Gnanaky lahiny tsy roe tsy telo ho amy zao tontolo zao ka hagnameloky zao tontolo zao, fa hagnavotsy gnan' izao tontolo zao amy agnarany. ¹⁸ Ze mino Gnazy la tsy helohina, fa ze tsy mino koa la fa voaheloky fotony tsy nino gny agnarany Gnanaky lahy tsy roe tsy telo voho gny tokan-Dranagnahary. ¹⁹ Zao gny anton'ny fitsara: baketo amin'izao tontolo zao gny fahazava, nefa la naleony gnolombelo gny hahiky manahaky gny mazava fotony raty reo asa nataony. ²⁰ Fa zay iaby manao gny raty la malay gny mazava sady tsy mamonjy gnan'io mba tsy ho hita miharihary reo asany. ²¹ Kanefa, ze manao gny marina la mamonjy gny mazava ka ho hita soa fa reo asany la natao arakin-Dranagnahary." ²² Tafaran'izay , la nandeha tagny Jodia Jesosy voho reo mpianany. Nipetraky fotoa tsy ampy tao nisondry tamin-drozy Ie sady nanao batisa. ²³ Sady Jaona koa nanao batisa tagny Ainona agnilan'i Saleima fotony maro gny rano tagny. Namonjy gnazy gny fokonolo ka natao batisa, ²⁴ fa mbo tsy nalefa an-tragno mahiky agny jaona. ²⁵ Bakeo nisy fifandraisa tamin'ny sasany amin'ireo mpianatr'i Jaona voho Jiosy raiky mahakasiky gny ando fisasa. ²⁶ Namonjy gnan'i Jaona rozy ka niresaky tagnaminy hoe:" Raby, zay raiky nisondry tagnaminao tagny ampitan'ny reniranon'i Jordana , zay nambaranao , ingo, manao batisa ie, sady mamonjy gnazy iaby gnolo manontolo." ²⁷ Ka Jaona namaly hoe:' Tsy afaky mandramby na ino ino gn'olo raiky laha tsy namea gnazy bakagny an-dagnitsy io. ²⁸ Nareo avao ro afaky vavolombelo amin'ny safako hoe:" Tsy Kristy aho; fa koa:" Nirahy talohany." ²⁹ Gny ala valy gnan'ny mpangalaky valy. Sady gny nama 'ny mpangalabaly, ze mitsanga voho mijanjy gnazy, la mazoto mare noho gny amin'ny fanehoa gny feon'ny mpangalabaly. Io, ro mameno gny hazotoako. ³⁰ Tsy maintsy mitombo Ie, fa zaho koa tsy maintsy mihena. ³¹ Ie zay baka agnabo agny la agnabony gny raha iaby. Ie ze baketo an-tany la baketo an-tany sady miresaky mahakasiky eto an-tany. Ze bakagny an-dagnitsy la agnabony gny raha iaby. ³² Ie la magnambara gny mahakasiky ze hitany voho jany, kanefa la tsy misy mandramby gny fagnambarany. ³³ Ze nandramby gny fagnambarany koa la nagnamafy fa to Ndranagnahary. ³⁴ Fa gny raiky nirahin-Dranagnahary la miresaky gny safan-Dranagnahary. Fotony tsy nasiany fetra gny fagnomeza gny Fagnahy. ³⁵ Gny Ray tia Gnanaky lahiny sady nametraky gny raha iaby teo am-pelatagnany. ³⁶ Ze mino Gnnaky lahiny la mana fiaigna mandrakizay, fa ze tsy mankato Gnnaky lahiny koa la tsy hahita fiaigna , fa hipetrahan'ny helokin-Dranagnahary."