¹ Telo andro tafara tatoy , la nisy fagnalam-baly tao Kana ao Galilia, sady tao gny renin'i Jesosy. ² Jesosy voho reo mpianany la voahasa tamy gny fangalam-baly. ³ Lafa lany gny divay, la niresaky tagnaminy gny renin'i Jesosy hoe:" Tsy mana divay rozy." ⁴ Ka hoy jesosy tagnaminy hoe:" Apela toy, nagnino iha ro mamonjy gnahy? Mbo tsy avy gny androko." ⁵ Ka hoy gny reniny tamin'ireo mpanompo hoe:' Ndra ino ino resahany agnaminareo, la tanteraho." ⁶ Sady nisy vato eny ze fampiasa amy gn'andro fisasany gny Jiosy teo, ze mirefy roe ka hatraminy telo metatsy iaby. ⁷ Hoy gnataony Jesosy tamin-drozy :" Feno rano gny siny." Ka nifenoan-drozy zisiky ambavany. ⁸ Lafa bakeo la hoy Gnataony tamin'ireo mpanompo hoe:" manobiza agnamin'io ka andeso agny amin'ny tompon'andraikitsy gny fikarakara." ka narahin-drozy io. ⁹ Nagnandrama gny tompon'andraikitsy gny fikarakara gny rano lasa divay, kanefa tsy nahay ze fiavian'io ie(fa reo mpanompo ze nagnova gny rano ro nahay ) . Bakeo la nikaiky gny mpangala-baly Ie . ¹⁰ Sady niresaky tagnaminy hoe:" Gnolo iaby la mandroso gny divay soa aloha zay vao gny divay moramora lafa mamo rozy. Fa gnanareo koa nagnajary gny divay soa zisiky henanio." ¹¹ Io rovoaloham-pamantara nataon'i Jesosy tao Kana tagny Galilia, sady naneho gny vononahiny Ie, ka nino Gnazy reo mpianany. ¹² Tafaran'io la nizotso ho agny Kapernaomy Jesosy , gny reniny, reo rahalahiny voho reo mpianany ka nijano andro kelikely tao rozy. ¹³ Sady fa marikitsy koa gny Paska gny Jiosy, la niakatsy tagny Jerosalema Jesosy. ¹⁴ Nahita mpamarotsy aomby, aondry voho voromahilala tantempoly tao Ie, voho nipetrakyteo avao koa reo mpanakalo drala. ¹⁵ Amin'io la nagnamboatsy karavasy ie ka nandroaky gnan-drozy iaby hiboaky gny tempoly , ndra gnaondry ndr gnaomby. Nandraraky gny dralan'ireo mpanakalo drala Ie sady nagnatonta gny latabon-drozy. ¹⁶ La hoy Ie tamin'ireo mpamarotsy voromahilala hoe:" Andeso miboaky lavitsy gnany toy toera toy reo raha reo. Tamoitsy zay gny fanaova gny tragnony Babako ho toera famarota." ¹⁷ Sady tiaron'ireo mpianany fa voasoratsy hoe:" Gny firehetako gny amy gny tragnonao ro handrava gnahy." ¹⁸ Bakeo namaly gnan'ireo lohandohany gny mpisoro Jiosy ka nanao tagnaminy hoe:" Ino ro famantara hatoronao gnanay, mahatonga gnanao manao gnan'iregny raha regny?" ¹⁹ Jesosy namaly hoe:" Akopaho toy tempoly toy, fa hantsangako agnatiny gny telo andro avao ." ²⁰ Ka hoy gnataony reo mpanapaky gny Jiosy hoe:" Efapolo enignamby tao ro nagnorena toy tempoly toy, ka vo iha va gny hahatsanga gnazy agnatiny gny telo andro?" ²¹ kanefa , mahakasiky gny tempoliny gny vatany ro nirehafiny. ²² Tafarany gny nitsanganany tamy gny maty, la tiaronan'ireo mpianany fa niresaky mahakasiky gnan'io tokoa ie, ka nino gny Soratsy Masina voho gny safa niresahan'i Jesosy igny rozy. ²³ Ka lafa tao Jerosalema Ie tamy gny andro firavoravoany gny paska, la lako ro nino gnagnarany lafa nahajery gnan'ireo famantara ze nataony. ²⁴ Fa Jesosy koa tsy natoky gnan-drozy amy gny Fahaizany soa gnan-drozy iaby, ²⁵ fotony tsy nila gnan' ia nia hagnambara agnaminy gny mahakasiky gnolo Ie, amy gny raha Hainy agnatiny gnolo ao.