¹ Tafaran'ireo raha reo Jesosy la niseho tagnamin'ireo mpianatsy ndraiky teo amin'ny ranomasin'i Tiberiasy. Manahaky gnan'izao gny fomba nisehoany:" ² Simona Petera la nagniraky tamin'i Tomasy zay atao hoe Didymo, Natanaela bakagny Kana agny Galilia, reo anak'i Zebedio, ka mpianats'i Jesosy roe hafa. ³ Hoy Simona Petera tagnamin-drozy hoe:" Handeha hagnarato aho." Ka hoy rozy tagnaminy hoe:" Rahay koa, handeha hisondry agnaminao." Ka lasa rozy sady nilitsy tao an-tsambokely raiky, fa tsy nahazo ndra ino ino rozy nandritra gny haly manontolo. ⁴ Voho , laha fa mangiran-draty gnandro , la nijoro tan-dranomasina Jesosy , fa tsy hain'ireo mpianatsy hoe Jesosy io. ⁵ Ka hoy Jesosy tagnamin-drozy hoe:" Ry tovolahy, tsy misy ho hany va nareo?" Namaly Gnazy rozy hoe:" Tsia." ⁶ Hoy Ie tagnamin-drozy :' Atoraho eo amin'ny sisiny ankavanan'ny sambokely gny haratonareo, la hahazo nareo." Ka la nalatsan-drozy gny haraton-drozy la tsy nahavita nampiakatsy gnan'io tao noho gny hamaroany gny hazandrano. ⁷ Bakeo hoy gny mpianatsy zay tian'i Jesosy tagnamin'i Petera hoe:' Gny Tompo io." Lafa jan'i Simona Petera fa gny Tompo io, la nampilitsy gny agnabon'ankanjony ie( fotony tsy niakanjo ie), ka nitsamboko agnatiny ranomasina tao. ⁸ Gny sasany tamin'ireo mpianatsy hafa nandeha tan-tsambokely( Fotony rozy marikitsy gny tanety, sabosabony roan-jato hakiho teo), voho naninto gny harato feno hazandrano. ⁹ Lafa tafakatsy an-tanety rozy, la nahajery afon'arina tegny sady hazandrano tagnabony teo, miaraky amin'ny mofo. ¹⁰ Hoy Jesosy tagnamin-drozy hoe:" Magnandesa maromaro agnamin'ireo vo azonareo lehaniky ." ¹¹ Ka la niakatsy Simona Petera ka naninto an-tanenty gny harato, zay feno fia bevata; 153. Maro maro mare, kanefa la tsy nitataky gny harato. ¹² Hoy Jesosy tagnamin-drozy hoe:" Avia hisakafo maray." Tsy nisy tagnamin'ireo mpianatsy nahasaky nagnontany Gnazy hoe:" Ia moa Iha?" Hain-drozy fa gny Tompo io. ¹³ Namonjy Jesosy, nandramby gny mofo, voho nagnome gnan'io gnan-drozy, manahaky gnan'io koa gny fia. ¹⁴ Fagnintelo amin'io ro nisehoan'i Jesosy tagnamin'ireo mpianatsy tafaran'ny nitsanganany tamin'ny maty. ¹⁵ Lafa baka nihina gny sakafo maray rozy, la hoy Jesosy tagnamin'i Simona Petera hoe:" Simona anak'i Jaona, tea Ahy mandilatsy noho reo va iha?" Hoy Petera tagnaminy :" Eka Tompo, hainao fa tea Gnanao aho." Hoy Jesosy tagnaminy hoe:" Fahano reo aondriko." ¹⁶ Niresaky tagnaminy fagnindroeny ndraiky Ie:" Simona anak'i Jaona, tea Gnahy va iha?" Hoy Petera tagnaminy hoe:" Eka Tompo, faiko fa tea Gnanao aho." Hoy Jesosy hoe:" Karakarao gny aondriko." ¹⁷ Niresaky tagnaminy fagnintelo Ie:" Simona , anak'i Jaona, tia Gnahy va iha?" La nalahelo Petera fotony Jesosy nagnontany intelo tagnaminy hoe:" Tia Gnahy va iha?" Ka hoy ie tagnaminy hoe:" Tompo, Iha mahay gny raha iaby, haiko fa tia Gnanao aho." Hoy Jesosy tagnaminy hoe:" Fahano gny aondriko." ¹⁸ Rehafikko agnaminao ,to, la to tokoa, taminy iha mbo tanora la zatsy nampilitsy raiky gny akanjonao voho nandeha tamin'izay tianao, fa lafa niha-antitsy iha, la nahampatsy gny tagnanao, ka olon-kafa ro hampiakanjo gnanao voho handay gnanao aminy ze tsy tianao handehana." ¹⁹ Sady Jesosy nagnambara gnan'io mba hahaiza hoe amin'ny karaza fahafatesa Manao akory ro hagnomezan'i Petera voninahitsy gnanin-Dranagnahary. Lafa baka niresaky gnan'io Ie , la hoy Ie tagnamin'i Petera hoe:" Magnara Gnahy." ²⁰ Nitoliky Petera ka nahatsipalitsy gny mpianatsy zay tian'i Jesosy nagnaraky gnan-drozy, gny raiky zay nianky ampitan'i Jesosy avao koa tagnaminy tel am-pisakafoana ka nanao hoe:" Tompo, ia gny raiky hamadika Gnanao?" ²¹ Nahatsipalitsy gnazy Petera ka hoy ie bakeo igny tagnamin'i Jesosy hoe:" Tompo, ino gny ataon'io johary io?" ²² Hoy Jesosy tagnaminy hoe:" Laha tiako hipetraky ie mandra-piaviako, la midika ino io agnaminao? Magnara Gnahy." ²³ Ka niparitaky tagnamin'ireo mpiarahalahy io safa io, fa tsy ho maty io mpianatsy io. Nefa Jesosy tsy niresaky tagnamin'i Petera fa tsy ho maty gny mpianatsy hafa, fa hoe:' Laha tiako hipetraky ie mandra-pihaviako, la midika ino io agnaminao?" ²⁴ Ie gny mpianatsy zay nijoro vavolombelo mahakasiky gnan'ireo raha reo, voho gny nanoratsy gnan'ireo raha reo, voho haintsika gny fagnambarany. ²⁵ Misy raha maro hafa koa zay nataon'i Jesosy. Laha voasoratsy kirakiraiky iaby io, la heveriko fa ndra la zao tontolo zao aza tsy ho tendriky gny boky zay ho sorata.