¹ Paoly, apositoly,tsy apositoly bakamin'olo ndra bakamin'ny alalan'olo, fa bakamin'i Jesosy Kristy voho gny Andrianagnahary Baba,ze nampintsanga gnazy tamin'ny maty , ² voho reo rahalahy iaby misondry agnamiko, ho gnan'ireo fiangonan'ny Galatiana: ³ Hasoava ho gnanareo voho fiandagna baka amin-Dranagnahary Babantsika voho Jesosy Kristy Tompo, ⁴ ze nanolotsy gnainy ho gnan'ny fahotantsika mba hagnafahany antsika amizao andron'ny haratia zao,arakin'ny sitrapon'Andranagnaharintsika voho Babantsika, ⁵ Ho Gnazy lahy gny voninahitsy mandrakizay doria.Amena. ⁶ Tseriky zaho hoe niala malaky tamin'ny azy nikaiky gnanareo tamin'ny hasoavan'i Kristy nareo.Tseriky zaho fa mitoliky amin'ny hafatsy hafa nareo. ⁷ Tsy midika anefa zay fa misy hafatsy hafa,fa misy olo lako ze manday fikorontana ho gnanareo voho te hagnova gny hafatsin'i Kristy. ⁸ Fa ndra zahay ndra anjely baka an-danitsy any aza ro hagnambara gny hafatsy hafa agnaminareo mitaha amin'ny hafatsy nambaranay tagnaminareo,la engaho i ho voahozo. ⁹ Araky ze nivolaninay taloha,la henanizao zaho magnambara ndraiky hoe:" Laha misy olo magnambara agnaminareo hafatsy hafa noho ze nirambesinareo,la la engaho i ho voahozo." ¹⁰ Moa zaho henanizao va mila fankantoavan'olo sa fankantoavan-Ndranagnahary? Moa zaho va mila gny raha hamalifaly gn'olo ? Laha mbo miezaky manohy hamalifaly gn'olo zaho,la tsy mpanompon'i Kristy. ¹¹ Fa teako ho hainareo, ry rahalahiko,fa gny hafatsy ze nambarako la tsy hafatsin'olombelo. ¹² Tsy nandramby gnan'izay tamin'olo zaho,ndra nampianary gnahy zay.Fa koa,zay la fagnambaran'i Kristy Jesosy tagnamiko. ¹³ Fa nareo nahaja gny amin'ny fiagnako taloha tamin'ny fomba fivavaha Jiosy,voho gny fomba nagnenjehako gny fiangonan'Andriagnahary mandilatsy gny tokony ho izy gny fiezahako handrava gnanizay. ¹⁴ Nandroso tamin'ny fivavahan'ny gny Jiosy zaho nandilatsy gny lako tagnamin'ireo nitovy tao tagnamiko,bakamin'ireo tana raiky agnamiko.Manahaky zay gny fomba nitanjahako mare gny fomban-drazako. ¹⁵ Fe Ndranagnahary, ze nanoka gnahy bakan-tron-dreniko,voho nokaiky gnahy tamin'ny alalan'ny hasoany, ¹⁶ lafa faly gny hagnatoro gny anakilahiny tagnamiko,mba hahafahako magnambara Gnazy any amin'ny Jentilisa,la tsy nila hevitsy bakamin'ny gny nofo voho gny ra zaho. ¹⁷ Tsy niakatsy ta- Jerosalema tagny ho agny amin'ireo fa lasa Apostoly talohako zaho.Fa koa,nandeha tagny Arabia voho bakeo nimpoly tagny Damaskosy zaho. ¹⁸ Ka telo tao tafara tato la niakatsy tany Jerosalema zaho mba hifankahay tamin'i Kefasy voho ninjano nisondry tagnaminy tagnatin'ny folo limy amby andro. ¹⁹ Fa tsy nisy hitako reo Apostoly ankoatsin'i Jakoba, azy rahalahin'ny Tompo iny. ²⁰ Ka ao amin'ny ze nisoratako ho gnanareo,la magnome toky gnanareo agnatrehan-Dranagnahary zaho fa tsy mavandy . ²¹ bakeo zaho la nandeha tagny amin'ny faritsin'i Asiria voho Kilikia. ²² Mbo tsy nihain'ireo mpiagno tao Jodia zay ao amin'i Kristy Zaho. ²³ Janjin-drozy avao gny voavola hoee:"Gny johary ze ngnenjiky gnantsika taloha,henanizao la magnambara gny finoa ze niezahany nipotehiny taloha." ²⁴ Noho zay rozy la nandrengy gnan'Andrianagnahary nohon'ny agnamiko.