¹ La nivola tamin'i Mosesy Yaveh hoe:"Miakara amiko atoy iha, Arona,Nadaba,Abiho voho loholon'Israely fito-polo reo ka manompoa gnahy lavitsy egny avao nareo. ² Mosesy raiky avao ro misiziky Gnahy.Gnolo hafa tsy mahazo misiziky sady oloko reo tsy mahazo miakatsy misondry aminy. ³ Nandeha Mosesy la nagnambara gnan'ny vahoaky reo gny lilin'Yaveh iaby.namaly miaraky gnolo reo ka nanao hoe:"Hasanay iaby reo safa nosafagnin'Yaveh iaby". ⁴ Mosesy la nandramby an-tsoratsy reo safan'Yaveh iaby.Mbo mongotignana,Mosesy la nagnory alitara teo am-potony gny vohitry sady nandamy tsangam-bato folo roa amby, vato reo la maneho gny folo roa amby fokon'ny Israely . ⁵ Nandefa mpamaraky johary Israelita maromaro ie mba honolotsy fagnatitsy oroa voho nanao soro aomby ho gnan'i Yaveh ho fiharoa agnaminy. ⁶ Nalan'i mosesy gny am-bakimiran'ny gny lio ka nataony tangnaty koveta bevata zay; ka gny am-bakimirany koa napitsipitsiny tamin'ny gny alitara. ⁷ Nalany gny bokin'ny fagnekea-pilongoa ka nivakiny mare tamin'ny gnolo.Hoy rozy hoe:"Hataonay iaby reo raha nosafagnin'i Yaveh.ho mpagneky rahay." ⁸ La nalan'i Mosesy gny lio ka napitsipitsiny teo amin'ny gnolo.Hoy ie hoe :"Intoy ro lio fangnekea-pilongoa zay nasan'i Yaveh tagnaminareo ami-gny fagnomeza zao fampagnatena miaraky amy zao safa iaby zao." ⁹ La nanganiky gny vohitry Mosesy,Arona,Nadaba,Abiho,voho gny fito-polo tamy reo loholon'ny Israely. ¹⁰ Nahita gnan'Andrianagnaharin'Israely rozy.Nisy vato mirary vita tamin'ny vato safira gny tambany tombony eo,sady nazava manahaky lagnitsy igny aza. ¹¹ Tsy nagnampatsy gny tagnany an-keloky Ndranagnahary,tamin'ny gnolo mpanday gnan'i Israely reo.Nahita an-dRagnahary rozy ka la nihina voho nino. ¹² Vinolan'Yaveh Mosesy hoe:"Miakara agnamiko eto ka mifitara.Hameako gnanao vato pisaky noho lalagna voho lily nisorotako reo soa hagnanaranao an-drozy." ¹³ La niakatsy am-bohitsi-nDragnahary agny Mosesy noho Josoa mpagnomba gnazy igny. ¹⁴ Nivola tamin'olobe reo Mosesy hoe:"Mijanogna eto avao nareo zisiky himpolianay agnaminareo eto.Ho agnaminareo eto Arona voho Hora.Laha misy olo mialialy fahatany ,rozy ro handamy gnazy,engao ie handeha amin-drozy agny." ¹⁵ La niakatsy am-bohitsy agny Mosesy sady nisy hiboky nanako gnazy. ¹⁶ Nipetraky am-bohitsy Sinay ao gny voninahits'i Yaveh,sady nanaro gnazy agnatin'ny enignandro gny hiboky.Nikaiky gnan'i mosesy amizay ie tamin'ny faha fito andro igny,tagnaty hiboky tao. ¹⁷ sahala amin'ny bolo mandevo gny tampony vohitsy egny igny gny fahita gny voninahits'i Yaveh tamin'ny Israelta reo eo. ¹⁸ Nilitsy tagnati-hiboky ao Mosesy la niakatsy agnabo vohitsy egny.Tegny ie agnatin'ny efa-polo andro voho efa-polo mantognaly.