¹ Nandiniky ndraiky gny momban'ny gny fahoria iaby zay vita teo ambany masoandro aho. Ka ingo, gny ranomason'ny gn'olo nampijalie, ka rozy la tsy nana ndra ia ndra ia mba hahaferignay azy! Teo an-tagnan'ny gny mpampijaly androzy gny hery, voho tsy nisy ndra raiky haferignay androzy! ² Nohon'izay la miarahaba gn'olo maty aho, reo zay fa maty, fa tsy gny miay, reo zay mbo velo. ³ Fe, sambatsy nohon'izy roe tonta gn'olo zay mbo tsy hinary, zay mbo nahita gn'asa raty iaby zay vita teo ambanin'ny gny masoandro. ⁴ Ka la hitako fa gn'asa kiraikiraiky voho gny fahaiza manao kiraikiraiky la nanjary fagnirian'ny gny mpiara-belo hafa. zay avao koa la setroky voho fikasa hagnohitsy gny tsioky. ⁵ Gn'adala mamoritsy gny tagnana ka tsy miasa, ka la gny nofiny avao ro haniny. ⁶ Fa soa avao koa voho magnatombo gn'asa mangina amin'ny gny tagna raiky nohon'ny tagna roe amin'ny gn'asa zay miezaky hanohitsy gny tsioky. ⁷ Bakeo la nandiniky gny zava-poa maro ndraiky aho, fifanajavoan'ny gny zavo maro teo ambanin'ny gny masoandro. ⁸ Misy karazan-johary mitoetsy raiky. Tsy mana ndra ia ndra ia ie, ndra anaky lahy ndra rahakahy. Tsy misy fiafarany gn'asany, voho gmy masony tsy afa-po amin'ny gny hanagna azony. Nagnotany gny vatany ie hoe: "Hiasa mafy ho an'ia aho ka handavako gny hafalea?" zava-poa avao koa zay, toe-draha raty. ⁹ Soa gn'olo roe miasa nohon'ny gny raiky; laha miaraky rozy la afaky mahazo karama soa amin'ny gn'asany. ¹⁰ Fa laha lavo gny raiky, la afaky mireny gny namany raiky hafa. Fe, gn'alahelo la magnaraky gny raiky zay fa raiky lafa lavo ie, ka tsy misy ndra raiky mandreny azy. ¹¹ Laha miara-mandre gny roe, la mety hafana rozy, fe manao ahoa gny hampafana raiky azy? ¹² Gny lehilahy raiky ro mety resy, fa gny roe mety afaky manohitsy fagnafiha, voho gny foly telo tsy ho mora tampahy. ¹³ Soa mare gny mahantra fe tanora hendry toy zay mpanjaka antitsy adala tsy mahay gny fomba ijanjignany fampitandrema. ¹⁴ To zay ndra la nanjary mpanjaka aza gny zatovolahy raiky baka am-pigadra agny, ndra la mbo nateraky hahantra ao amin'ny gny fanjakany aza ie. ¹⁵ Ka zaho la nahajery gn'olo iaby zay velo voho mandeha amban'ny gny masoandro mandefa gny vatandrozy magnagny amin'ny gny johary hafa zay nitsanga nanahaky gny mpanjaka. ¹⁶ tsy misy gny fiafarany ho an'ny gn'olo iaby zay magniry gny hankato gny mpanjaka vaovao, fa afara ao la maro amindrozy gny tsy handrengy azy koa. Setroky vatany zay toe-draha zay ka fikasa hanohitsy gny tsioky.