¹ Avy tagny Derbe voho Lystra avao koa Paoly, voho ingo, teo gny mpianatsy raiky kinaiky hoe Timoty, anaky lahin'ny ampela Jiosy zay nino; Grika gny babany. ² Ie la soa laza tamin'ireo rahalahiny zay tagny Lystra sady Ikonioma. ³ Tean'i Paoly hiara-dia aminy ie; la nalany ie sady nofofany noho reo Jiosy zay teo amin'ireo toera reo, fotony hain-drozy iaby fa Grika gny babany. ⁴ Laha nandeha namakivaky reo tana maro rozy la nanolotsy toromariky ho gnan'ireo nmpino mba hankanto gny fampianara, zay nosoratan'ny Apostoly voho gny loholona tao Jerosalema. ⁵ Ka niha-natanjaky tamin'ny finoa gny fiangona sady nitombo isa isan'andro. ⁶ Nandeha namakivaky gny faritsy gny Frigia voho Galatia Paoly voho gny namany, fotony noraran'ny Fagnahy Masy rozy hagnambara gny safa agny amin'ny faritr'i Asia. ⁷ Lafa nilitsy nanariny gnan'i Mysia, la te-handeha ho agny Bitynia rozy, nefa nosakanan'ny Fagnahin'i Jesosy rozy. ⁸ Ka nandalo tamin'i Mysia, la nandeha nizotso tagny amin'ny tana gnan'i Troasy rozy. ⁹ Nahajery fahita i Paoly tamin'ny haliky: johary raiky Makedonia nitsanga teo, nikaiky gnazy sady nivola hoe: " Avia atoy makedonia sady vonjeo rahay." ¹⁰ Lafa avy nahajery gny fahita i Paoly, la nandeha hamonjy gnan'i Makedonia avy hatrany rahay, nahatsapa fa Ndranagnahary ro nikaiky gnanay hitory gny filazantsara amin-drozy. ¹¹ Niantsambo noho izay avy agny Troasy, la nizotso mahity ho agny Samatrikia rahay, sady nitandraky gnan'i Neapolia rahay gny andro magnaraky. ¹² Bakeo la nandeha nagnagny Filipy rahay, ze isan'ny tana Makedonia, zay tana manan-danja mare ao amin'ny faritsy voho gny zana-tany Romanina, sady nijano tao amin'izay tana izay tagnatiny gny andro maro rahay. ¹³ Tamin'ny andron'ny Sabata la nandeha tagny amonton'ny vavahady agnilan'ny renirano rahay, zay nieretreretinay fa misy toeram-pivavaha. Nipetraky rahay sady niresaky tamin'ireo ampela zay niara- niavy teo. ¹⁴ Nisy ampela raiky atao hoe Lydia, mpivarotsy salotsy volomparasy bakagny amin'ny tanan'i Tyatira, zay nanompo gnan-Dranagnahary, ninjanjy gnanay. Nanokatsy gny fony gny Tompo Hitandry gny safa zay nambaran'i Paoly. ¹⁵ Lafa vita batisa ie voho gny avorohotany, la namporisiky gnanay ie, nivola hoe: " Laha nitsara gnahy ho mahatoky amin'ny Tompo nareo, la milira sady mipetraha ao an-tragno." Sady nandresy lahatsy gnanay ie. ¹⁶ Sady tamin'izay, laha nandeha nagnagny amin'ny toeram-pivavaha rahay, la nisy zatovovavy raiky zay mana fagnahin'ny sikily nifakatonjy tagnaminay. Nanday tombony maro ho gnan'ny tompony tamin'ny alalan'ny sikily ie. ¹⁷ Nagnaraky gnanay voho Paoly bakao afara io ampela io sady nikaiky mare, nanao hoe: " Reo johary reo la mpanompon-Dranagnahary Abo Mare. Magnambara agnaminareo gny lalam-pamonjea rozy." ¹⁸ Nanao izay tagnatiny gny andro maro ie. Fa i Paoly la nanomboky sosotsy taminy ka nitoliky sady nivola tamin'ny fagnahy hoe:" Mandidy gnanao amin'ny agnaran'i Jesosy Kristy zaho mba hiboaky ao aminy." Sady niboaky avy hatrany izay. ¹⁹ Lafa jerin'ireo tompony fa lasa gny fanantena gny amin'ny tombony ho gnan-drozy, la nosamborin-drozy i Paoly voho Silasy sady notaritiny rozy ho agny an-tsena teo agnatrehan'ireo manam-pahefa. ²⁰ Lafa nanday gnan-drozy teo agnatrehan'ireo mpitsara rozy, la nivola hoe: " Manakoronta gny tanantsika reto johary reto. Jiosy rozy. ²¹ Magnambara fomba zay tsy ara-dalana ho gnan'ny Romanina gny manenky na mampihatsa gnazy reo." ²² La nitsanga gny vahoaky nanohitsy gnan'i Paoly voho Silasy; nangalaky gny lamban-drozy gny mpitsara sady nandidy gnan-drozy mba ho vangoa amin'ny hazo. ²³ Lafa vinangon'ireo mare rozy, la nalefan-drozy agny an-tranomaiky sady nandidy gny mpiamby tranomaiky mba hiamby mare gnan-drozy. ²⁴ Lafa naharamby izay lily izay gny mpiamby, la nalefany tagny amin'ny farany laliky mare amin'ny gadra rozy sady nifeheziny teo amin'ny hazo gny tombondrozy. ²⁵ Nagnodidy gny misasak'aly la nivavaky i Paoly voho Silasy sady nihira fidera gnan-Dranagnahary, sady reo gadra hafa la ninjanjy gnan-drozy. ²⁶ Tampoky teo la nisy horohorontany bevata, ka nampihozongozo gny fototsy gny gadra; sady avy la nisokatsy gny varavara iaby, voho nivaha gny fehin'ny olo iaby. ²⁷ Taitsy tamin'ny torimaso gny mpiamby gny tragnomaiky sady nahajery reo varavaran'ny fonja nivoha; namoaky gny mesony ie ka saiky hamono gny vatany, fotony noeritreretiny fa nandositsy reo gadra. ²⁸ Fa nikaiky tamin'ny feo mare Paoly, nanao hoe: " Ka mandratsy gny vatanao, fotony ato iaby rahay iaby." ²⁹ Nampikaiky Jiro gny mpiamby tragnomaiky sady nilitsy malaky tao agnatiny, la nangitikitiky noho gny tahotsy, nihohoky teo agnatrehan'i Paoly voho Silasy, ³⁰ sady nanday an-drozy niboaky voho nivola hoe: " Tompoko, ino ro tsy maintsy hataoko mba ho voavonjy?" ³¹ Hoy rozy hoe: " Minoa gnan'i Tompo Jesosy, la ho voavonjy iha,iha voho gny avorohotanao." ³² Nitory gny safan'ny Tompo tagnaminy rozy, niaraky tamin'ny olo iaby tao an-tragnony. ³³ Bakeo la nandramby an-drozy tamin'ny haliky tamin'igny ora igny avao gny mpiamby gadra, sady nanasa gny ferin-rozy, sady ie voho rozy iaby tao amin'ny tragnony raiky iaby la natao batisa teo noho eo. ³⁴ Bakeo la nandesiny niakatsy tao an-tagnony i Paoly voho Silasy sady nandroso sakafo teo agnatrehan-drozy, la nifaly vatany ie niaraky tamin'ireo zay tao an-tragnony, fa fa nino an-Dranagnahary ie. ³⁵ Sady lafa maraindray gny andro, la nandefa safa tamin'ireo mpiamby reo mpitsara, nivola hoe: " Engao handeha reo johary reo." ³⁶ Nitatitsy izay safa izay tamin'i Paoly gny mpiamby, nivola hoe: " Nampanday safa tagnamiko reo mpitsara mba hagnenga gnanareo handeha: noho izay henanizao miboaha, sady mandehana am-piadagna." ³⁷ Fa nivola tamin-drozy Paoly hoe: " Namango gnanay ampahibeso tsy nisy fitsara rozy, na la mizaka gny zom-pirenena Romanina aza rahay_sady nalefan-drozy tao am-pigadra. Henanizao la tean-drozy ho alefa an-tsokosoko va rahay? Tsia! Ao gny safan-drozy ro ho avy eto voho hitariky gnanay hiboaky." ³⁸ Nitatitsy izay safa izay tamin'ny mpitsara gny mpiamby, sady laha vo nahanjanjy rozy fa romanina i Paoly voho Silasy, la natahotsy rozy. ³⁹ Avy la nialatsiny tamin-drozy gny mpitsara sady nanday gnan-drozy niboaky, nangataky gnan-drozy mba hiala ao an-tana. ⁴⁰ Ka niala tao an-tragnomaiky i Paoly voho Silasy sady nagneo an-tragnon'i Lydia. Lafa nahajery reo rahalahy i Paoly voho Silasy, la nampahery gnan-drozy sady bakeo la niala tao an-tana rozy.