¹ Gny olo sasany la nizotso bakagny Jodia hatragny Antiokia voho nampianatsy reo rahalahy, ka nivola hoe: " Laha tsy vita savatsy araky gny fomba fataon'i Mosesy nareo, la tsy ho voavonjy nareo." ² Izay la nanday gnan'i Paoly voho Barnabasy tao agnaty fifamalia voho aly hevitsy tamin-drozy. Noho izay i Paoly voho i Barnabasy la voatendry niaraky tamin'ny sasany hafa tamin-drozy hiakatsy agny Jerosalema mba hihao amin'ireo apostoly voho reo loholona mikasiky izay fanontania izay. ³ Noho izay rozy, nalefan'ny fiangona, la namakivaky gnan'i Foinika voho Samaria sady nagnambara gny fiovam-pon'ireo Jentilisa. Rozy la nanday hafalia bevata tamin'ireo rahalahy iaby. ⁴ Lafa avy tao Jerosalema rozy, la norambesin'ny fiangona voho reo apostoly sady reo loholona, ka nitatitsy reo raha iaby zay nataon-Dranagnahary tamin-drozy. ⁵ Nefa gny olo sasany izay tao amin'ny tarik'ireo Fariseo, la nitsanga voho nivola hoe: " Ila gny manao gny famorana gnan-drozy voho gny mibaiko gnan-drozy hitandry gny lalan'i Mosesy." ⁶ Noho izay reo apostoly voho reo loholona la niara-nivory mba handinika izay raha-misy izay. ⁷ Tafaran'ny aly hevitsy maro, nitsanga i Petera ka nivola tamin-drozy hoe: " Ry rahalahy, hainareo fa taloha ela be Ndranagnahary ro nanao safidy teo aminareo, mba ho amin'ny alalan'ny tsihoviko la tokony hahaja gny safan'ny filazantsara reo Jentilisa, sady hino. ⁸ Ndranagnahary, zay mahay gny fo, vavolombelo amin-drozy, nagnomea gny Fagnahy Masy gnan-drozy, manahaky gny nataony tamintsika; ⁹ Sady tsy nanao fanavakavaha tamintsika voho tamin-drozy Ie, nanadio gny fon-drozy tamin'ny finoa. ¹⁰ Sady noho izay nagnino nareo ro mitsapa an-Dranagnahary, hoe tokony hametrahanareo zioga eo amin'ny vozon'ireo mpianatsy nefa na gny razantsika na tsika aza tsy mahavita milanja? ¹¹ Nefa mino tsika fa ho voavonjy amin'ny alalan'ny fahasoavan'i Tompo Jesosy, toa an-drozy avao koa." ¹² Gny olo iaby la nitandraky gny fahangina tagnatiny gny ninjanjignan-drozy gnan'i Barnabasy voho Paoly mitatitsy reo famantara voho reo fahagaga niasan-Dranagnahary izay niasa tamin'ireo Jentilisa tamin'ny alalan-drozy. ¹³ Lafa avy nijano nivola rozy, la namaly Jakoba, nivola hoe: " Ry rahalahy, njanjino aho. ¹⁴ I Simeona la fa nagnambara gny fomba nanampian-Dranagnahary tam-pahasoava voalohany reo Jentilisa mba hangalaky amin-drozy olo ho gnan'ny aragnany. ¹⁵ Reo safan'ireo mpaminany la mikasiky izay, araky gny voasoratsy hoe: ¹⁶ ' Afaran'ireo raha reo la himpoly aho, sady hananga ndraiky gny tragno lain'i Davida aho, zay nitonta; hagnamboatsy voho hampimpoly amin'ny pilasiny ndraiky reo faharavany aho, ¹⁷ mba hila gny Tompo reo olo sisa tavela, ao agnatin'izay reo Jentilisa iaby zay kinaiky amin'ny agnarako.' ¹⁸ Zao ro nagnambaran'ny Tompo, reo zay fa nanao reo raha reo zay hay tamin'ireo razambe taloha. (Fanamariha: Reo dikan-teny sasany taloha la mivaky manahaky zao: " Zao ro nambaran'ny Tompo amin'nireo zay hay tamin'ny andro taloha gny asany iaby.) ¹⁹ Noho izay, gny diniko la, tsy tokony hanakoronta reo bakamin'ny Jentilisa zay nitoliky tamin-Dranagnahary tsika. ²⁰ Fa tsika la hanoratsy ho gnan-drozy fa tsy maintsy miala amin'ny fahalotoan'ireo sampy rozy, amin'ny fahavetaveta, sady amin'ny henan'ireo biby voakenda, voho amin'ny lio rozy. ²¹ Fotony Mosesy la fa voambara tamin'ny isan-tana tamin'ny andro taloha sady ie la vakia ao amin'ireo synagoga isaky gny Sabata." ²² La toa soa tamin'ireo apostoly voho reo loholona, niaraky tamin'ny fiangona iaby, gny hifily gnan'i Joda zay kinaiky hoe Barnabasy, voho i Silasy, zay mpitariky gny fiangona, voho gny handefa gnan-drozy agny Antokia miaraky amin'i Paoly voho Barnabasy. ²³ Rozy la nanoratsy toy: " Hatrany amin'ireo apostoly voho reo loholona, reo rahalahinareo, hatramin'ireo rahalahy bakagny Jentily agny Antiokia, Siria, voho Kilikia: Arahaba! ²⁴ Tsika la fa nahaja fa reo olo sasany la niala tamintsika, tsy nisy baiko baka amintsika, sady nanelingely gnanareo tamin'ireo fampianara zay nampikoronta gny fagnahinareo. ²⁵ Zao ro ie, rahay iaby la fa nagnenky gny hifily reo johary voho handefa gnan-drozy agny aminareo miaraky amin'i Barnabasy voho Paoly malalanay, ²⁶ johary zay nanao gny ainy tsy ho raha ho gnan'ny agnaran'i Jesosy Kristy Tompontsika. ²⁷ Noho izay rahay la magniraky gnan'i Joda voho i Silasy, zay hagnambara agnaminareo io raha io avao amin'ny safan-drozy manoka. ²⁸ Fa toa soa amin'ny Fagnahy Masy voho agnaminay, gny tsy hampitondra gnanareo enta bevata noho reo raha tena ila reo: ²⁹ mba hialanareo amin'ireo raha nataonareo ho fanatitsy amin'ireo sampy, lio reo raha voakenda, sady bakamin'ny fahavetaveta. Laha mitandrina gny vatanareo amin'izay nareo, la ho soa agnaminareo izay. Veloma." ³⁰ Noho izay rozy, lafa voaroaky, la nizotso tagny Antiokia; bakeo rozy la namory gny vahoaky niaraky, sady nanolotsy gny taratasy rozy. ³¹ Lafa voavakin-drozy izay, la nifaly rozy noho gny fampahereza. ³² Joda voho i Silasy, mpaminany avao koa la nankahery reo rahalahy tamin'ny safa maro voho nampahery gnan-drozy ³³ Lafa avy nijano fotoa kelikely tao rozy, la nalefa am-piadagna avy amin'ireo rahalahy ho agny amin'ireo zay nandefa gnan-drozy rozy. ³⁴ [ Fanamariha: Gny dikan-teny taloha mare la mangalaky andininy faha 34 (jereo gny Asa 15: 40): "Nefa mbo tean'i Silasy gny hijano teo."] ³⁵ Fa i Paoly voho Barnabasy la nijano tagny Antiokia niaraky tamin'ireo maro hafa, zay nampianaran-drozy voho nagnambaran-drozy gny safan'ny Tompo. ³⁶ Tafaran'ny andro kelikely Paoly la nivola tamin'i Barnabasy hoe: " Ndao tsika himpoly henanizao sady hamangy reo rahalahy agny amin'ny tana iaby zay nagnambarantsika gny safan'ny Tompo, sady hahajery hoe manao akory rozy." ³⁷ I Baranabasy la te handay avao koa gnan'i Jaona zay nikaiky hoe Marka hiaraky amin-drozy. ³⁸ Nefa i Paoly nandiky fa tsy soa gny handaisa gnan'i Marka, zay nagnenga an-drozy tagny Panfilia voho tsy nanohy niara-niasa tamin-drozy niasa. ³⁹ Bakeo la nisy fifamalia mare, ka nisaraky rozy, sady i Barnabasy nanday gnan'i Marka niaraky tagnaminy sady nandeha sambo nagnagny Sipra. ⁴⁰ Fa i paoly nifily gnan'i Silasy sady nandeha, tafaran'ny nanomezan'ireo rahalahy gnazy andraikitsy ho gnan'ny fahasoavan'ny Tompo. ⁴¹ Bakeo ie la nandeha namakivaky gnan'i Syria voho i Kilikilia, ka nampatanjaky reo fiangona.