¹ Ankoatsiny zay la nagnamboatsy alitara saba ie, roa polo hakiho gny halavagnany voho roa polo hakiho gny sakany. Folo hakiho gny ahabony. ² Nataony vy avao koa gny magnodidy gny tavin-drano, folo hakiho gny sogniny. Limy hakiho gny ahabony, voho telopolo hakiho gny magnodidy gnany tavin-drano. ³ Gn'ambaniny gny sogniny gny tavin-drano magnodidy la nisy aombilahy, folo isaky gny hakiho, natraoky raiky miaraky ami-gny tavin-drano hafa vita gny tavin-drano. ⁴ Napetraky tagnabony gny aomby folo roa amby gny tavin-drano, gny mitoliky magnavaratsy, gny telo mitoliky magnandrefa, gny telo mitoliky magnan-timo, voho gny telo mitoliky manignana. Nipetraky tagnabony reo tavin-drano, voho nifagnila gny zorony efatsy raha reo. ⁵ Matevy manahaky gny volivoam-pelatagna gny tavin-drano, voho gny sogniny la voatefy manahaky gny sogniny gny kapoaky, manahaky gny vogniny gny lili. ⁶ Mahalany rano telo arivo bata gny tavin-drano. Nagnambatsy kovata folo bavata ho fanasa raha avao koa ie; nasiany limy tan-kavagna, voho limy tan-kavia; fitaova ampiasa ami-gny fagnantanteraha gny fagnatitsy oroa ro nisinasa tagnaminy reo. Gny tavin-drano koa, mba hisasany reo mpisaro. ⁷ Nagnamboatsy gny reo fipetrahan-jiro volamena folo natao araky reo toromariky ho gnany sary ie; Napetrany tan-tempoly ao reo, limy tagnaminy gny ankavagna, voho limy tan-kavia. ⁸ Nagnamboatsy latabo folo ie ka napetrany tao an-tempoly ao reo, limy tan-kavagna, voho limy tan-kavia. Nagnamboatsy koveta volamena zato ie. ⁹ Fagnampiny zay la nagnamboatsy kianjany gny mpisoro ndraiky kianja bevata, voho varavarany gny kianja ie; mipetrahany saba reo varavarany reo. ¹⁰ Napetrany tami-gny ilany ankavagnany gny tragno, tan-tignana, mitoliky magnantimo gny tavin-drano. ¹¹ Nagnamboatsy valagny, lapely fandrofa, voho finga famafaza i Hirama. Ka la vitan'i Hirama gn'asa nataony ho gnan'i Solomona mpanjaka tan-tragnon-Dranagnahary ao: ¹² la reo andry roa, kapitaly boribory tan-tapony gny andry roa, kapitaly boribory tan-tapony gny andry roa eo, voho fipetrahany gny haingo makarakara roa mba hanakona gny reo kapitaly boribory roa an-tampony reo andry eo. ¹³ Fa nagnamboatsy ampongaben-dagnitsy efa-jato ho gnany reo haingo makarakara ie: ampongaben-dagnitsy roa mba hanakona gny kapiteny boribory roa taminy reo andry. ¹⁴ Nagnamboatsy tsangana ndraiky koveta natao tagnambony gny tsangana avao koa ie, ¹⁵ tavin-drano raiky ndraiky aomby folo roa aomby, ¹⁶ reo valagny, lapely fandrofa, fitrebiky, voho fitaova hafa iaby avao koa. Nataon'i Hirama fa mahay raha tami-gny saba voalio, ho gnan'i Solomona mpanjaka, ho gnany gny tragnon'i Yaveh reo. ¹⁷ Navaliky gny mpanjaka tagnaminy lemaky gny Jordana reo, tagnaminy gny tamimanga agnivognivon'i Sokota ndraiky Zaretana. ¹⁸ La manao gnany zay, ro nagnamboaran'i Solomona gny reo fanaky iaby maro reo; tsy afaky mifantary vatany gny lanjany gny saba. ¹⁹ Nagnamboatsy gny fanaky iaby tan-tragnon-Dranagnahary i Solomona, gny alitara volamena avao koa, vohoreo latabo nametraha gny mofony gny fagnatreha; ²⁰ gny fipetrahan-jiro mbaminy gny jirony reo, voatoka ho oroa agnatrehany gny efitsy agnainy__reo la vita tami-gny volamena malio; ²¹ voho reo folera, gny reo jiro, voho gny lelan-jiro, la volamena, volamena malio. ²² Gny fanapahan-jiro, gny koveta, gny sotro voho ditin-kazo magnitsy fioroa avao koa la vita tami-gny volamena malio iaby. Gny ami-gny filira magnamigny tragno ao, reo varavara agnainy magnami-gny polasy masy mare voho gny varavarany gny tragno, gnany gny tempoly, la vita tami-gny volamena.