¹ Roapolo tao i Ahaza ro nanomboky nanjaka, voho nanjaka folo enin'amby tao ta Jerosalema tao ie. Tsy nanao gny to tamason'i Yaveh teo ie, manahaky gny nataon'i Davida razambeny. ² Fa koa, nandeha tami-gny lalany reo mpanjakan'Israely ie; nagnamboatsy sarin-draha ho gnany reo Bala avao koa ie. ³ Fagnampiny zay, nagnoro emboky magnitsy tami-gny Lohasahan'i hinoma tao ie voho mandefa gnany reo gnanany tagnaim-bolo tao, araky gny reo asa fanompoan'aoly gnolo niteren'i Yaveh hiala tami-gny taminy talohany gny vahoakan'Israely. ⁴ Nanao saro ndraiky nagnoro ditin-kazo magnitsy tami-gny fipetraha agnabo tao ndraiky tami-gny havoa regny ndraiky tambaniny hazo maintso tagny iaby. ⁵ Nohony zay Yaveh Ndranagnaharin'i Ahaza, la nagnomea gnazy tan-tagnany gny mpanjakan'i Syria teo. Naharesy gnazy gny Syriana voho nanday vahoaky gadra maro miala tagnaminy tao, nanday gnan-drozy nagna Ndranagnahary agny. Namea tan-tagnany gny mpanjakan'Israely teo nahareny gnazy tami-gny famonoa bevata avao koa Ahaza. ⁶ Fa Peka gnanaky lahin'i Remalia, la namono maramila 120 000 ta Joda tao tagnaminy gny andro raiky, johary be herim-po iaby rozy iaby, fotony rozy la nahafoy gnan'i Yaveh, Ndranagnahariny gny razamben-drozy. ⁷ Zikry, johary mahery raiky baka Efraima agny, namono gnan'i Mahaseia gnanaky lahiny gny mpanjaka. ⁸ Gny tafik'Israely la nangalaky babo 200 000 valy, gnanaky lahy, voho gnanak'ampela baka tami-gny reo longon-drozy. Nangalaky babo maro avao koa rozy, nandesiny nimpoly ta Samaria tagny. ⁹ Fa misy mpagnambara hafats'i Yaveh raiky tagny, Obeda ro agnaminy. Niboaky mba hitsara gny tafiky avy baka Samaria tagny ie. Hoy ie tamin-drozy hoe: " Fotony Yaveh, Ndranagnahariny gny razambenareo, masiaky tamin'i Joda, la nagnomea gnan-drozy tan-tagnanareo teo Ie. Fa namono gnan-drozy tan-kasiaha mahatakatsy gny lagnitsy nareo. ¹⁰ Voho mihevitsy gny hitanjaky gnany reo johary ndraiky ampelan'i Joda ndraiky Jerosalema ho botinareo nareo. Fa nareo moa tsy meloky tami-gny reo fahotanareo tamin'i Yaveh Ndranagnaharinareo?" ka androany, mijanjigna gnahy: Alefaso gny reo gadra, nalanareo tami-gny reo rahalahinareo, fa mirehitsy agnaminareo gny siakin'i Yaveh." ¹² Voho gny reo mpitariky gny vahoakin'i Efraima sasany__Azaria gnanaky lahin'i Johanana, Berekia gnanaky lahin'i Mesilemota, Jehizikia gnanaky lahin'i Saloma, voho i Amasa gnanaky lahin'i Hadlay, nitsanga hanohitsy gnany reo nimpoly baka ami-gny aly tagny. ¹³ Hoy rozy tamin-drozy hoe: " Ao tsy handay gnany reo gadra atoy nareo, fotony mila handay raha hampanota gnany hanohitsy gnan'i Yaveh nareo, mba hagnampy gnany reo otanay ndraiky gny reo fahadisoany, fa bevata gny fahadisoany, voho misy firehetan-tsiaky amin'Israely." ¹⁴ Ka nagnenga gnany reo gadra ndraiky gny reo babo tagnatrehany gny reo mpitariky ndraiky fivondrogna iaby gny reo johary mitanjaky fialia. ¹⁵ Niary gny reo johary voatendry tami-gny agnara voho nangalaky gnany reo gadra, ndraiky nampiakanjo gnany reo iaby tsy nisiky tagnamin-drozy miaraky tami-gny reo babo. Nampiakanjoan-drozy regny voho nameany kapa. Namean-drozy hany ohany ndraiky raha finomy rozy. Nitaha gny ferin-drozy voho nametraky gnany reo malemy tagnabony boriky teo rozy. Nandesin-drozy nimpoly tami-gny longony ta Jeriko tagny rozy, bakeo la nimpoly ta Samaria tagny rozy. ¹⁶ Tami-zay fotoa zay Ahaza Mpanjaka la nandefa mpanday hafatsy tami-gny reo mpanjakan'i Asyria tagny mba hangataky gnan-drozy hagnampy gnazy. ¹⁷ Fotny mbo niavy indraiky gny reo Ademita voho nanafiky gnan'i Joda, nanday gnany reo gadra reo gadra. ¹⁸ Reo Filistina avao koa la nanafiky gnany reo tanany reo tany lemaky ndraiky gnan'i Negeva a Joda ao. Nalan-drozy i Beti-Semesy, Aialona, Gederota, voho siko ndraiky gny reo gnana-bohiny, Timna ndraiky gny reo gnana-bohiny, voho Gimzo ndraiky gny reo gnana-bohiny avao koa. Nandeha nipetraky tegny ami-gny reo polasy reo rozy. ¹⁹ Fa i Yaveh nampietry gnan'i Joda nohony i Ahaza, mpanjakan'Israely, fotony ie nanao raty ta Joda tao ndraiky nanota mare la vatany mare tamin'i Yaveh vatany. ²⁰ Tiglato-pilesera, mpanjakan'i Asyria, la niavy tagnaminy teo voho nagnakoronta gnazy laha tokony nankahery gnazy. ²¹ Fa i Ahaza la nambabo gny tragnon'i Yaveh ndraiky gny reo longony gny mpanjaka voho gny reo mpitariky, mba hagnomea raha lafo vili ho gnany reo mpanjakan'i Asyria. Fe tsy nahazahoany tombony gny fanova gnany zay. ²² Io Ahaza Mpanjaka io avao ro nanohitsy gnan'i Yaveh mare tami-gny fotoany gny fihoriany. ²³ Fotony nanao saro tami-gny reo Ndranagnaharin'i Danaskasy ie, Ndranagnahary fa naharesy gnazy. Hoy ie hoe: " Fotony nagnampy gnahy rozy gny Ndranagnaharin'ireo mpanjakan'i Syria, la hisoro ho gnan-drozy zaho, mba hagnampy gnahy rozy." Kanefa faharava ho gnazy ndraiky Israely iaby rozy. ²⁴ Navorin'i Ahaza gny reo fanaky tami-gny tragnon-Dranagnahary tao voho nitinapakiny. Narindriny gny reo varavarany gny tragnon'i Yaveh voho nanao alitara ho gnazy tami-gny zoron'i Jerosalema tao iaby ie. ²⁵ Tagny ami-gny tanan'i Joda iaby ro nanovany fipetraha abo mba hagnaroa saro ho gnany reo Ndranagnahary hafa. Nikaiky gnan'i Yaveh, Ndranagnahariny reo razambeny ie. ²⁶ Voho gny sisa tami-gny reo asany, ndraiky gny reo lalany iaby, voalohany voho farany, la ingo, fa voasoratsy ami-gny bokiny reo mpanjakan'i Joda ndraiky Israely ao. ²⁷ Nimaty tami-gny reo razambeny tagny i Ahaza, voho nalevin-drozy tami-gny reo tana tao, ta Jerosalema tao ie, fa tsy nandesin-drozy tami-gny lolony reo mpanjakan'Israely tagny. Hezekia, gnanany lahy, ro lasa mpanjaka tami-gny toerany tao.