¹ Roapolo limy tao i Jotama laha manomboka; nanjaka; nanjaka folo enin'amby tao ta Jerosalema tagny ie. Jerosa ro agnaran-dreniny; gnanak'ampelan'i Zadoka ie. ² Nanao gny to tamason'i Yaveh teo ie, nagnaraky gny ohatsy nataon-drainy, la i Ozia, tamy raha iaby. Niegny tami-gny filira tam-tempolin'i Yaveh tao avao koa ie. Kanefa mbo nanday vata tami-gny fomba raty avao gny vahoaky. ³ Nagnamboatsy gny vavahady agnabony gny tragnon'i Yaveh ie, voho nagnamboatsy maro tami-gny havoan'i Ofela. ⁴ Fagnampiny zay la nagnamboatsy tana tami-gny tany havoan'i Joda tagny, ndraiky nagnamboatsy rova ndraiky tilikambo tami-gny reo ala tagny ie. ⁵ Nialy tami-gny mpanjakany gny vahoakan'i Amona avao koa ie voho nandresy gnan-drozy. Tami-zay tao zay avao, ro nagnomezany gny vahoakan'i Amona gnazy talenta volafoty zato, vary tritrika ray aly fatsy, vary hordea ray aly fatsy. Nameany gny vahoakan'i Amona gnazy manahaky gnany zay avao ie gny tao faharoe nndraiky fahatelo. ⁶ Ka la nihanahery i Jotama fotony nandeha nahity tagnatrehan'i Yaveh Ndranagnahariny. ⁷ Voho gny ami-gny reo raharaha hafa mikasiky gnan'i Jotama, gny aliny iaby, voho gny reo lalany, ingo, voasoratsy ami-gny bokiny reo mpanjakan'Israely ao ndraiky Joda zay. ⁸ Roapolo limy amby tao ie laha nanomboky nanjaka; nanjaka tagnatiny folo enin-amby tao ta Jerosalema tao ie. ⁹ Nimaty tami-gny reo razambeny tagny i Jotama, voho nalevin-drozy tan-tanan'i Davida tao ie. Ahaza, gnanany lahy, ro lasa mpanjaka nilimby gny polasiny.