¹ Alee nitwaweirwe obwikiiri olwakwikiiriiza, tulina emirembe no Nyamwanga omukama waiswe Yesu kristo. ² Omuuye mwetayakaire okufuna ekisa kiini kyetwemeereiremu era tusemerwa omukusubira kwamwei kwetulina okwakugabana oku kitinisya kyamwei Onyamwanga. ³ Naye tinikyo kyonkei, era twenyumirizenge omukubonabona kweiswe nga tumeite okubonabona kuleeta okuguminkiiriiza. ⁴ Ate era okuguminkiiriiza kuleeta empisa ezisei ne mpisa ezisei zileeta okusubiira. ⁵ Nokusubira tekukukwatisya nsoni, kubba okwendya kwa Nyamwanga kusukirwe ddala emitima jeiswe, omu mwoyo ogwikiiri gwe twaweibwe. ⁶ NIitwali nga tukyali banakki omu kisa ekituufu okuristo nafiiriira abatatiina Nyamwanga. ⁷ Kizibu omuntu okufiiriira omuntu omwikiiri; obba mpozzi omuntu aguma okufiiriira omuntu omusei. ⁸ Naye O' Nyamwanga alanga okwendya kwamei jeetuli, kubba nitwali nga tukyalina ebibbi okristo natufiiriira. ⁹ Alee okusinga omuno, eleero nitwaweibwe obwikiiri olwamusai gwamwei, okusiinga muuno alitulokola okutuya omu busungu Bwanyamwanga. ¹⁰ Kubba nitwali tukyali banyanziggu, twatabagaine, no Nyamwanga olwa kuffa okwa mwana wamwei, ati buuni netutabaganyizibwe tulilokoo olwa bwomi bwamwei. ¹¹ Era tinikyo kyonkei, era tulijaguzzira amwei no Nyamwanga omukama weiswe Yesu kristo, atuweserye ati bunni okutabagana okwo. ¹² Nolyekyo nke kibbi nikyeizzire omwiyanga olwamuntu omwei, era nokufa no kwingiira olwa kusiisa, nimwo kityo nekisansaana omubantu bbona, kubba bona basiisiire, ¹³ Kitufu ekibbi kyaliwo omwiyanga nga amateka gakyali kuwebwa, naye ekibbi tekibalibwa, awatabeire mateka. ¹⁴ Kyonkei okuffa kwafugire okuzwa oku Adamu okwikya oku Musa, era nokwabo abatasoberye nko kusiisa kwa Adamu eiyee niye kifananyi ekyoyo okwaba okwiiza. ¹⁵ Naye ekisembo ekya bwereere tekisaana kusiisa. Kubba abbo olwakusiisa kwomwei abafiire abeingi, chikiira munno ekisa kya Nyamwanga nekisembo ekya bwereere omu kiisa kya Yesu kristo kyayakalilirye nekikanya omubeingi. ¹⁶ Era ekisembo ekya bwereere tekisanna ekyazwire omu kusiisa kwa muntu omwei, kubba omusango ogwazwire omu kibbi ekiwmei kwaleteere okusingibwa omusango, naye ekisembo ekya bwereere ekizwa omukusiisa okwingi kireta okuyibwaku omusango. ¹⁷ Kubba abbo, olwakusiisa kwomwei okuufa kwafuga kubwomwei, okusinga omunno abbo abaweireibwe ekisa ekisukiiriire ne kisembo ekya bwereere ekyabwikiiri balifugiira mu bwomi kulwoyo omwei, Yesu kristo. ¹⁸ Kale nimwo kityo olwa kusiisa kwomwei omusango nigwasingire abantu bonna, nimwo nolwabwikiiri bwomwei ekisembo kyali ku bantu bonna okuwesya obwikiiribwa bwomi. ¹⁹ Kubba olwa butawuura bwa muntu omwei eddi abeingi nibafukiire ababbi, nimwo kityo no lwa kuwuura kwoyo omwei abeingi balifuka abeikiiri. ²⁰ Amateka geiziire, okusiisa kwakalilirye, naye ekibbi nikyasukiiriire, ekisa ne kisinga okusukiriirya. ²¹ Era nke kibbi nikyafugire omukuffa, era nekisa ekya Nyamwanga nimwo kityo kyafugiire omu bwikiiri ne nekitakuwesya bwomi obutawawa, omu Yesu kristo omukama weiswe.