¹ Ekyankango, abaluganda musemererwenge O'nyamwanga weiswe okwiiramu okubandiikira ebyo byenandikiririrye tikuunkeresya njje, naye kisei edi nywe. ² Mweerindenge obweene, mwerindenge ebibbi, mwerindenge abakomola omubiri. ³ Kulwakubba niiswe abakomole abeikiiri abalamya O'nyamwanga omu mwoyo, era abenyumiirirya omu Kurisito Yesu abatesiga mubiri. ⁴ Newankabbeire nga njje nsoobola okubba nensonga okweesiga omubiri, omuntu owondi yeena nalowooza okeesiga omubiri, njje mba nkumusinga. ⁵ Njje nakomoleibwe ku lunnaku olwa munanai, awo mwiiyanga lya Isiraeri, owa mukika kya Benyamini Omwebbulaniya wawu, omu mateka ndi Mufalisaayo. ⁶ Omukunyikira, nga nkuyiganya ekanisa omubwikiiri obuli omu mateka, Nabonekanga nga tindikku kunnenyezebwa. ⁷ Naye byona ebyali nga magoba jeendi ebyo nabiroweize nko kufeerwa olwa Kurisito. ⁸ Naye era nebintu byona mbirowooza nga kufeerwa olwa muwendo ogwingi ogusinga oguli omu kutegeera kurisito Yesu omu Mukama wange okwebyo nafeereibwe ebintu byona era mbirowooza okubba nga kasasisiro nsobole okutanga amagoba niye Kurisit. ⁹ Era nsobole okubonekera omu ye nga tiinina bwikiiri bwange obuzwa omu mateka , wabula obwikiiri obuliwo olwa kwikiiriiza O'kurisito, okuzwa edi O'nyamwanga omu kwikiiriiza. ¹⁰ Ndyoke mmutegeere ye nobuyinza obwakuyimbooka kwamwei era nokubagana okubibaraazi nga mukwisana nko kuffa kwamwei. ¹¹ Era nikyabbanga kikusoboka nffune okuyimbokera omu bafiire. ¹² Tikukoba nti mmare okukitunga oba mmare okwikiiriiza naye nffuba oku kitunga, kulwakuba O'kurisito Yesu yanfiire omwanna wamwei. ¹³ Abaluganda, tinkulowooza nga mmare okukitunga, naye ekintu kimwei kyenkola, nikwo okwerabira ebyo ebiri emabega ,nkusuungerya ebyo ebiri omu meiso. ¹⁴ Nkulubiiriira okwika awakayanirwa awali empeera eya kwetta kwa Nyamwanga okwa iguru mu Kurisito Yesu. ¹⁵ Ale iswena abakuure omu mwoyo, tulowozenge ebyo naye oba nga mukulowooza bundi , nakiini O'nyamwanga alikibaswekuura. ¹⁶ Naye ka tugumiire okwekyo ekitwikiirekku. ¹⁷ Abaluganda, mwikiiriize okumboneraku, era munsengerye abo abatambula nkweiswe bemulina nke kyakubonerakku. ¹⁸ Kubba bengi abatambula be nakobeirekku emirundi ezingi, nati bunni mbakobera nga nkukuunga amaligga, nga nibo abazziggu aba musalaaba gwa Yesu Kurisito. ¹⁹ Enkango yabwe nikwo kuzikiiriira, O'nyamwanga waabwe niyo endda, era ekitinisya kyabwe kiri mu nssonni zabwe, balowooza bya nsi. ²⁰ Kulwakubba iswe eweiswe mwiguuru, era niijo tulindirya omulokooli okuzwayo, Omukama weiswe Yesu Kurisito. ²¹ Aliwanyisa omubiiri ogwakutowazibwa nko omubiiri ogwa kitinisya kyamwei. Nkokula okwo nikuli okumusobolesya nokutta ebintu byona ansi wamwei.