¹ Kale obba waloowo okubeiryamu amaani kwonna omu Kurisito obba okusiikiiriiza kwona okwa kwendya, obba okwikiiriiza amwei kwonna omu mwoyo, obba okwendya kwangeri yona. ² Mukiirye okusemerwa kwange, mulowoozenge bumwei, nga mulina okwendya kumwei, omwoyo gumwei, nga mukulowooza bumwei. ³ Temukolaanga kintu kyona olwa kweyendesya kwanywe nnywenkei, obba omu bukunsa, wazira omu bucculiiri buli muntu agulumizenga omwiira wamwei okusinga niyegulumizanga yenkei. ⁴ Buli muntu taloleranga byamwei yenkei naye bulyomwei naye buli omwei nga akufaangayo no kubandi ⁵ Nnywe mubenge nolulowooza okwo okwabeire omu Kurisito Yesu. ⁶ Yee wade nga yabeire mukifanaanyi kya Nyamwanga, teyeeroweize kwenkanankanna na Nyamwanga, ⁷ Naye, yeiyiirekku ekitinisya niyatweire engeri ya mwiiru, nabyalibwa nko muntu. ⁸ Era niyabonekeire omu mutindo ogwa buntu, ni yewuumbekka, nga mucculeri okwika okuffa era okuffa okwa kumusalaaba. ⁹ Era O'nyamwanga nikyo yazwiire amugulumiiza omunno namuwa eibara liddi eikusiga amabara goona. ¹⁰ Nti olwiibara lya Yesu, buli kujwi kufukamiire eddi abbao abali omwi iguru nabali oku nsi nabali ansi wansi. ¹¹ Era buli lulimi lwatulenge nga O ' Yesu niye Mukama weiswe, O'nyamwanga oito weiswe awebwe ekitinisya. ¹² Kale, abendebwa bange, nka nimubeire abacculiiri bulizzo nga nddi nannywe, naye ati nga tindiiwo, mwiyongere okubba abacculeeri. Mwikiirenge obulokoozzi bwanywe benyenere nokutina nokukankkana. ¹³ Kubba O'nyamwanga akora muniinywe, yabatakiisiirye era nabasobolesya nokukola, byasiima. ¹⁴ Mukolenge byona byonna nga ndoowo kwemulugunya ne mpaakka. ¹⁵ Mulemenge kubbakku kyemukunenyebwa, wadde eitiima, abanna ba Nyamwanga abatalina nzziro agati wa mirembe ejjaccamire ezikakanyali, jjemubonekeramu nke taala omu nsi. ¹⁶ Nga mugumirye ekigambo ekya bwomi; leke mbbe nokwenyumiiriiza oku lunaku lwa Kurisito, okulanga nti tineirukiire bwereere, ate tinekambiire bwereere. ¹⁷ Naye wade nsukiibwe oku ssaddaaka nokuwereeza okwakwikiiriiza kwanywe, nsemerwa era nnsemerwa amwei nanywe nnywenna. ¹⁸ Era nnywenna mutyo musemerwe era musemerwe amwei nanje. ¹⁹ Naye nkusuubira omu Mukama weiswe O'yesu okubatuumira amangu O' Timoseewo, nnjjenna leke nguume omwoyo, nga mmare okumanya ebifa jemuli. ²⁰ Kubba tendiina muntu woondi alina omwoyo ogukwenkanna nogwooyo, aligendera ebyanywe omumanaannu. ²¹ Kubba abbo bbona beetorya bwabwe ku lwabwe, ti bya Yesu Kurisito. ²² Naye O' Timoseewo mmeite nke bwasaniira, kubba yawerezanga amwei nanje olwa njjiiri nko mwana edi oito wamwei. ²³ Kale oyo nigwo nkusuubira okubatamira amangu aggo nga ntegeire embeera nke buyabba jjendi. ²⁴ Naye njjenna nkusuubiira Omukama weiswe nti ndiiza mangu. ²⁵ Era mbwiine nga kisaaniire okubatumiira Epafuloddito omuganda wange, era mukoozzi mwiira wange , era mulwanni mwiira wange, naye yee mutuume wanyweera omuweereza owa bintuu byenyendya. ²⁶ Kubba yabalumiriirwe omu mwoyo nnywenna nnywenna, ni yeralikiira muno, kubba mwawuulire nga yalweire. ²⁷ Ddaala okulwaala yalweire era yabeire alimpii okuffa, naye O'nyamwanga yamusasiire; ate tiniiye yenkei, naye nanjje, obujjune nebutaneyongera. ²⁸ Nikyo nnzwa nyendya omunno okumutuma, nemulimubona mulyoke musemerwe nanje nkenderye obujjune bwange. ²⁹ Kale mumwaniriize omu Mukama weiswe no kusemerwa okiwingi, era abeisana nko yo mubatengemu ekitinisya. ³⁰ Kubba yaburuku kadyoli okuffa olwa mulimu ogwa Kurisito, niyaweireyo obwommi bamwei nga akukoola ebyo bye mwandinkoleire singa mwali nanjje.