¹ Era nanywe yabayimbokerye nimwaali nga mufiirire omukusiisa ne bbibi byanywe, ² Byemwatambuliramu eirai nga emirembe eza nsi eni nizili, okugobeerera omukulu wa buyinza obwa mwibanga, omwoyo ogukola atibuni omu baana abajemu. ³ Naye iswena abo nitwatamburangamu eirei omukwegomba kwa mubiru gwaiswei, nga ttukolanga omubiri ne birowozo bikukwendya, nitubaanga olwa buzariranwa, abaana aba busungu, nka bandi. ⁴ Naye ONyamwanga kubanga niye mugaiga owa kisa, olwa kwendya kwaamwe okuyingi kweyatwenderye iswei. ⁵ Bwetwali nga tufiriire omukusiisa kwaiswei yatufiirire abomi omu Yesu Kristo. (Twalokoleilwe mu kisa) ⁶ Yatuyimboyire amwei naye, natwikarya amwe naye omu bifo ebya iguru omu Kristo Yesu. ⁷ Nimwo atyo mumirembe ezaakaire okwiiza alyoke alange obugudda obusinga omuno obwa kisa kyamwei ekisai obuli jetuli omu Kristo Yesu. ⁸ Olwakuba mwalokokere lwa kisa lwa kwikiriza; naye titwazwe gyemuli, nikyo kirabo kya NNyamwanga, ⁹ Titwazwire mu bikolwa, omuntu yeena aleme okwenyumirizanga. ¹⁰ Okulwakuba iswei tuli mulimu gwamwei, abamantibwe mu Kristo Yesu olwabikolwa ebinyakasai. ONyamwanga biyasokere okuteekateeka iswei okubitambuulamu. ¹¹ Ale mwizukire nga eirai nywe, abaali Abanamawanga omu mubiri abakomoirwe nibo bakara abatakomoirwe, mu mubiri okukolebwa ne mikono. ¹² Nga omubiro bidi mwali nga muli arai no Kristo, mwalinga mubooleibwe omukika kya Israeli, era mwali Banamawanga edi endagano eza kusubiiza, nga temulina kusubiira, nga temulina Nyamwanga omunsi. ¹³ Yeni atubuni omu Kristo Yesu nimwo abaali alai eirai musembezebwe olwa musaayi gwa Kristo. ¹⁴ Olwakuba ye niye mirembe zaiswei, eyafuula byoona ekimwei, namenyawo ekisenge kya akati ekyawula, ¹⁵ Niyamara okumwiyawo omubiri gwa obulabe, obwali okubipande ebya biragiro na mateeka; alyoke amante omuntu okumwiiya omukifo kyeebyo byoona, okuleeta emirembe. ¹⁶ Era atyo alyoke atabaganye byoona edi Onyamwanga mu mubiri gumwei olwa musalaba, nimwe yayitiire obunyanzigu okuggwo. ¹⁷ Nayiza nabakobera emirembe nywe abaali alai, era ne mirembe abo abaali ampi; ¹⁸ kulwakuba kubyona naiswei tusobola okusembera edi Oito waiswe omu mwoyo ogumwe. ¹⁹ Ale nimwo mutyo ti mukyali Banamawanga nabetere, yeni muli ba kika kimwe nabeikiiri, era bamunyuba ya Nnyamwanga. ²⁰ Kulwakuba mwayombokeibwe ku musingi gwa baatumirwe na banabbi, OKristo Yesu omwenyini nga niryo eibbale erikonto erya kunsonda. ²¹ Omu ye buli nyubba yoona, negaitibwa okusai, ekula okubba eyekalu eikiriire omu Mukama waiswei; ²² era omu ye nanywe mwombekebwa amwe okubbanga ekisuro kya Nyamwanga mu Mwoyo