¹ Akacwaano nikamaare ogwagwaana, o'Pawulo nayeta abegesya nabawuliiri nabasiibula, nazwaayo okwaaba e Makedoni. ² Niyayakaire olubajju luddi nabakoba ebigambo biingi, naika e Buyonaani. ³ Niyabbaireyo emyezi eissatu, era Abayudaaya nibabbaire bbamusaliire olukwe, niyaali akwakwakala omu nyanja okwirayo omu Makedoni ⁴ Nibabba naye okwiika omu Asiya o'Sopateri omubberoya omutaani wa Pawulo, naba Sessalonika Alisutaluuko no Sekuado; no Gayo omu Darubbe no Timaseewo; naba Asiya Tukiko no Tulofiimo. ⁵ Bbani nibebembera nibatukuumira omu Tulowa. ⁶ Iswe ne tuzwa omu Firipi nitwanika amatanga oluzwanyuma lwa biro bya migaati egitagezeseeibwe, netubaikaku omu Tulowa mu nnaku itaanu; getwamaare ebiro musanju. ⁷ Awo ekiro ekyakaserye omu Sabbitti, nitwakumbaine okumenya emigaati, o'Pawulo nanyumya nabo, nayeendya okwimula emambya nalwaawo omu kunyumya okwiikya omwi tuumbi. ⁸ Niwabbaawo amataala gaingi omu kiseenge ekaiguru, gye twakumbaniire. ⁹ Omwojo eibara ryamwe Yatuko naikaara omu dirisa, nakwatibwa otulo twiingi; awo o Pawulo niyalwiirewo nga akunyumya, nga akwatiibwe otulo twiingi nazwa omu nyubba eyakasatu, nagwwa nayibwaawo nga afiire. ¹⁰ O'Pawulo nainama namugwaaku namuvumbagira nakoba nti mutabba kiboobo; obwoomi bwaamwe bbulimu omunda. ¹¹ Naniina namenya omugaati nalyaaku nalwaawo nga akyanyumya okwicca e maambya ale nazwaayo. ¹² Nibaleeta omwoojo nga mwoomi, ne basemeerwa akatali kaddooli. ¹³ Naye iswe nitwebembera okwiika oku meeri nitwaaba okwiika e Aso, nga tukweendya okutwalana o'Pawulo kubba yaali nalagiire atyo, nga akweendya ye mbeye okwakala okulukalu. ¹⁴ Niyatusangire omu Aso nitwabiranwa ne twiiza e Mituleene. ¹⁵ Nitwanika amataanga okuzwaayo oku kiro kya kabiri nitwiika omu maiso ga Kiyo; oku lwakasatu nitwiika oku Samo; oku lwakanai nitwiika omu Mireeto. ¹⁶ Kubba o'Pawulo yayikriize okwakala omu Efeso omu meeri aleke okulwa omu Asiya, kubba yaali akwanguwa, nikyabba kikusoboka okubba omu Yerusaalemi okulunaku lwa pentekote. ¹⁷ Niyaali omu mireeto natuma omu Efeso nayeta abakaire ba kanisa , ¹⁸ Nibaikire gyaali nabakoba nti nywe mumaite okuzwa oku lunaku olwekereeire ninainamire omu Asiya ninabbanga nanywe omu biro byoona. ¹⁹ Nga nkuwereza omukama waiswe no buteeki bwoona na maligga nokusendebwasendebwa kwe nabwoine omu nkwe za Bayudaaya, ²⁰ nintebbisaanga okubakoba ekigambo kyoona ekisaine, no kubegesyaanga omu maiso ga baantu no mu buli nyubba, ²¹ nga nkukobera abayudaaya amwei nabayonaani okwiramu eddi o'Nnyamwanga nokwikiriza omukama waiswe Yesu kurisito. ²² Anti, bbona, nembwebweibwe omu mwoyo okwaaba e Yerusaalemi nga timaite bye nalibonayo. ²³ Wabula nga omwoyo akweera okunkoba omu buli kibugga, nga akunkoba nti okubbweebwa no kwasayasanizibwa kuundindire. ²⁴ Naye obwoomi bwange tenkubulowooza nka ekintu, nga bwa bbeeyi gyendi, ndeke nyingire olugendo lwange nokuwereza kwe nawaire omukama waiswe Yesu kurisito, okukobera enjiri ya kisa kya Nnyamwanga. ²⁵ Anti, bbona, nje nkumanya ti mukyambona namaiso gaange nywe nyweena nenakolanga nga nkubulira obukama. ²⁶ Nikyo nkubakoba ereero nti nje ndi mwikiiri okulwamusaayi gwa boona. ²⁷ Kubba tinebbisaanga kubakobera kuteesa kwa Nyamwanga kwoona. ²⁸ Mwerindenge nywe nyweenkai noluggo omwoyo akweera gye yateekere nywe okubba abliisya, okulisyaanga e kanisa ya Nnyamwanga jjeyeguliire nnmusaayi gwaamwe okulwaanywe, ²⁹ nje maite nga bwendimala okuzwaawo owaaki ezaandi ziringira omu nywe, nizaali sasira oluggo. ³⁰ Era omunywe nywenkai mwalizwamu abantu nga bakubaza ebigambo ekyaami, okukulula abegesya emabegga waabwe. ³¹ Kale mubwaine, mwizukire tinalekaangawo kubalabula namaliga ga bbuli muntu oku myaka esaatu emisa no bwiire. ³² Era nati nkubalekera o'Nnyamwanga nekigambo kya kisa kyamwei okusobola okwomboka no kuggaba obusika omwaabo abatukuziibwe. ³³ Tinegoomber ku feeza ya muntu yeena ne bwewankubbaire ozaabbu ne bwewankubbaire ekizwaaro. ³⁴ Nywe mumaite nga emikono gini nigyo jjakolanga bye nayeendyanga nabo ababonanga naanje. ³⁵ Mbalangire omu byoona ne kikusaana okukola e mirimu mutyo okujunanga abatalina maani, nokwizukiranga ebigambo bya mukama waiswe Yesu bye yakobere ye yeenkai nti okuwa kwa mukisa kukusiinga okutwaala. ³⁶ Niyabazire atyo nafukamira nasabira amwei nabo boona. ³⁷ Nibakuunga muno booona, nibamugwa omwikoti o'Pawulo ni bamunywegerra. ³⁸ Nga banakuwaire okusingira kimwe olwakigambo kyamwei nti tibakyairayo ku mubona, nebamusendekeerya okwiika oku meeri.