¹ Awo olwaikire o'Pawulo niyaali e Kkolinso, o'Pawulo niyakaliire oku sayidi ezaiguru naika mu Efeso nasaanga abegesya abamwe; ² nabakoba nti mwabweibwe omwoyo agwikiiri nimwaikiriize?Nibamukoba nti bbee, nokuura te tuwuraanga nti waaliyo omwoyo ogwikiiri. ³ Nabakoba nti kale mwabatiziiibwe kwingira mu kiki? nibakoba nti omu kubatizibwa kwa yokaana. ⁴ O'Pawulo nakoba nti o'Yokaana yabatiize okubatiza kwa kweenya, nga akoba abantu bbaikirize bbaabe okwiiza emabegga waamwe, ye o'Yesu. ⁵ Nibawuliire ni babatizibwa okwingira omwibara rya Nnyamwanga waiswe Yesu. ⁶ OPawulo niyabatekereku emikono, omwoyo ogwikiiri nabaizamu, nibabaza endimi ni balagula. ⁷ Abantu bboona bbaali ikumi na babiri. ⁸ Naingira omwikumbaniro nabazanga nobugumu okumala emyezi issatu, nga akuwakananga era nga akusendasendanga olwa bigambo ebya bukama bwa Nnyamwanga. ⁹ Naye abamwe nibakakanyaire ni batawura nga kuzumaanga enzira omu maiso ga kibiinja, nazwa gye bali, nayawula abegesya, nga akuwakananga bbuli lunaku omu somero rya Tulaano. ¹⁰ Ebyo nibimala emyaka ibiri, bboona abaali bakwikala omu Esiya ne bawura ekigambo kya Nnyamwanga waiswe, Abayudaaya naBayonaani. ¹¹ O'Nnyamwanga nakolanga ebya magero ebitakubonebwa bbuli lunaku omu mikono gya Pawulo, ¹² nabalwaire bbabaleteranga ebiremba ne ngoye eza ku mubiri gwaamwe, endwaire ni zibazwangaku, odayimooni nabazwaangaku. ¹³ Naye era abantu Abayudaaya abatayina waabwe, abapeka odayimooni, nebetuminkiirya okubaza eibara rya Nnyamwanga waiswe Yesu okwaabo abaalina odayimooni, nga bakoba nti mbalayiza o'Yesu o'Pawulo gwa komberwa. ¹⁴ Awo waliwo abaana musanju aba Skewa omuyudaaya okabona omukulu, nga akoba nti nkubalayiza oYesu oPawulo gwa buliira. ¹⁵ Dayimooni nairamu nabakoba nti o'Yesu mutegeera no Pawulo mumaite; nanywe ninywe banaani. ¹⁶ Omuntu eyaliku odayimooni nabagulukira nabasiiga boona nabayiinza, no kwiruka ni beiruka okuzwa omu nyubba eddi nga bali bwereere nga balina ebiwuundu. ¹⁷ Ekyo ne kitegeerwa boona abayudaaya na yonaani abaikaraanga mu Efeso; entiisa ne bakwata boona, eibara rya mukama waiswe yesu ne rigulumizibwa. ¹⁸ Era bbaingi oku bbo bbaikiriize ni baiza ni baikaara nbategeeza ebikolwa byaabwe. ¹⁹ Era bbaingi oku bbo bbakolanga ebya busumu ne bakumbaniya abitabu byaabwe, ne babyokyerya omu maiso gaabwe boona; nebabala omuwendo gwaabyo ne babona ebitundu bya feeza obukuumi budooli. ²⁰ Nimwo kityo ekigamboo kya mukama waiswe nikyeyongeranga omu maani ne kiwangula. ²¹ Ebyo nibyawaire o'Pawulo nalowoza omu mwoyo okwakaara omu Makedoni ne Akaya, no kwaaba e Yerusaalemi, nakoba nti nindimala okubba ekyo, era kinsaaniire okubba ne Ruumi. ²² Natuma e Makedoni babiri oku bbo abamuwerezanga, Timoseewo no Erasuto, ye omwenyini nalwaayo ebiro ti biingi omu Asiya. ²³ Omukiseera ekyo ni wabbaawo akacwano ti kadooli olwa nzira. ²⁴ Kubba omuntu eibara ryamwe Demeteriyo, omuweesi wa feeza e yakolaanga obusabo obwa feeza obwa Atemi nokufuniraanga abaweesi amagoba agatali gadooli; ²⁵ nakumbaniya abo abakolanga emirimu ejjo, akoba nti abasaiza, mumaite nti omulimu ogwo obugaiggai bwaiswe nimwo buzwa; ²⁶ mukobona era mukuura nga ti mu Efeso wonkai nayeenga mu Asiya yoona o'Pawulo oyo era yeena asenderesendere era akyusire ebibiina bikooto, nga akoba nti abakoleibwe ne mikono ti ba Nnyamwanga. ²⁷ Naye tiniswe sweenkai ababooine akabbi omu mulimu gwaiswe okunyomebwaanga, era naye ne sabo lya Atemi o'Nyamwanga omukulu omukazi okulowozebwanga nti ti muntu, oyo nokugibwa nokwiyibwa omu kitinisya kyamwei, asinzibwa Asiya yoona nensi zoona. ²⁸ Nibawuliire nibaizula obusuungu ni babazira aiguru nga bakoba nti Atemi wa be Efeso mukulu. ²⁹ Ekbuga kyona ne kiizula oktabula kuni; nibafubutuka no mwoyo gumwei okwiika omu Teyatero, nibamaare okukwaata o'Gayo no Alisutaluuko aba Mekeddoni, aatambulanga no Pawulo. ³⁰ O'Pawulo niyendyanga okwingira omu baantu, abayigirizwa ni batamwikiriza. ³¹ Era abakulu abamwei aba mu Asiya bbali banywani bbamwei, nibamutumira nga bakumwegayiira aleke kwewaayo mu Teyatero. ³² Abamwe ni babazira iguru buundi, nibabona buundi kubba ekibiina kyaali kyetabwiire, ate nga nabandi baingi notategeera nsoonga eyabakumbanisirye. ³³ Nibaiya Alegezanda omu kibiina, Abayudaaya nga bakumusindikiirya. Alegezanda nabaweenya no mukono nayeendya okwenyonyola eddi abantu. ³⁴ Naye nibamutegaire nti muyudaaya, boona nibabazira aiguru ne doboozi rimwei okumala e ssawa ibiri nti Atemi wa ba Efeso mukulu. ³⁵ Omuwandiiki niyasirikirye e kibiina, nakoba nti abasaiza aba Efeso, timukitegeera nti e kibugga kya ba Efeso nikyo kikuuma e ssabo rya Atemi omukulu ne kifananyi ekyazwiire e Zewu. ³⁶ Kale kubba ebyo tebyeganika, kibagwaniire nnywe okukakana nobutakola kintu mu kwanguyiirya. ³⁷ Kubba muletere abantu bani abatanyagire bya mu ssabo tebanyomere Nnyamwanga waiswe omukazi. ³⁸ Kale oba nga o'Demeteriyo nabaweesi abaali naye bbalina ekigambo oku muntu, enkiiko ziriwo nabamasaza bbaliwo; bbalopengane. ³⁹ Naye abo nga bakuswagana ebindi, bbikwakusaarwa mwikumbaniro eribbaawo bbuliizo. ⁴⁰ Kubba ddala tuyiinza okwikibwaku akabbi olwa keguguungo kani oka lwaleero, kubba naga ndoowo nsonga gye tuliyiinza kuwoza olwa kukumbaana kuni. ⁴¹ Niyabalize atyo nayabulula ekibiina.