¹ Oluvanyuma lw'ebyo ne mpulira ng'eidoboozi einene ery'ekibiina ekinene mu igulu, nga batumula nti Aleruuya; Obulokozi, n'ekitiibwa, n'obuyinza niibyo bya Katonda waisu: ² kubanga emisango gye gya mazima era gye nsonga; kubanga asaliire omusango omwenzi omukulu, eyayonoonere ensi n'obwenzi bwe, era awooleire eigwanga ly'omusaayi gw'abaidu be mu mukono gw'oyo. ³ Omulundi ogw'okubiri ne batumula nti Aleruuya. N'omwoka niigwo gunyooka emirembe n'emirembe. ⁴ N'abakaire amakumi abiri na bana n'ebiramu ebina ne bavuunama ne basinza Katonda atyama ku ntebe, nga batumula nti Amiina; Aleruuya. ⁵ N'eidoboozi ne liva mu ntebe, nga litumula nti Mutendereze Katonda waisu, imwe mwenamwena abaidu be, abamutya, abatobato n'abakulu. ⁶ Ne mpulira ng'eidoboozi ly'ekibiina ekinene, era ng'eidoboozi ly'amaizi amangi, era ng'eidoboozi ly'okubwatuka okw'amaani, nga batumula nti Aleruuya: kubanga Mukama Katonda waisu Omuyinza w'ebintu byonabyona afuga ⁷ Tusanyuke, tujaguze, tumuwe ekitiibwa iye: kubanga obugole bw'Omwana gw'entama butuukire, no mukali we yeeteekereteekere. ⁸ N'aweebwa okuvaala bafuta entukuvu ensa: kubanga bafuta eno niibyo ebikolwa eby'obutuukirivu eby'abatukuvu. ⁹ N'ankoba nti Wandiika nti Baweweibwe omukisa abetebwa ku mbaga ey'obugole bw'Omwana gw'entama. N'ankoba nti Ebyo niibyo ebigambo eby'amazima ebya Katonda. ¹⁰ Ne nfukamira mu maiso g'ebigere bye okumusinza. N’ankoba nti bona tokola otyo: Ndi mwidu mwinawo era ow'omu bagande bo abalina okutegeeza kwa Yesu: sinza Katonda: kubanga okutegeeza kwa Yesu niigwo mwoyo gw'obunabbi ¹¹ v11 Ne mbona eigulu nga libikukire; era, bona, embalaasi enjeru n'eyabbaire agityaimeku, ayetebwa mwesigwa era ow'amazima; no mu butuukirivu asala emisango era alwana. ¹² Era amaiso ge niigwo musyo ogwaka, no ku mutwe gwe engule nyingi; era ng'alina eriina eriwandiikiibwe, omuntu yenayena ly'atamaite wabula iye yenka. ¹³ Era ng'avaire ekivaalo ekyamansiirweku omusaayi: n'eriina lye ne lyetebwa Kigambo kya Katonda. ¹⁴ N'eigye ery'omu igulu ne limusengererya ku mbalaasi enjeru, nga bavaire bafuta enjeru ensa. ¹⁵ Ne mu munwa gwe muvaamu ekitala eky'obwogi ateme amawanga nakyo: era alibafuga n'omwigo ogw'ekyoma: era aniina eisogolero ly'omwenge gw'obusungu bw'obukambwe bwa Katonda Omuyinza w'ebintu byonabyona. ¹⁶ Era alina ku kivaalo kye ne ku kisambi kye eriina eriwandiikiibwe nti KABAKA WA BAKABAKA, ERA MUKAMA W’ABAAMI. ¹⁷ Ne mbona malayika ng'ayemereire mu isana; n'atumulira waigulu n'eidoboozi inene, ng'akoba enyonyi gyonagyona egibuuka mu ibbanga nti Mwize mukuŋaane ku mbaga enkulu eya Katonda; ¹⁸ kaisi mulye enyama ya bakabaka, n'enyama ey'abagabe, n'enyama ey'ab’amaani, n'enyama ey'embalaasi n’ey'abo abagityamaku, n'enyama eya bonabona ab'eidembe era n'abaidu, abatobato n'abakulu. ¹⁹ Ne mbona ensolo, na bakabaka b’ensi, n'eigye lyabwe nga bakuŋaine okulwana n'oyo eyabbaire atyaime ku mbalaasi n'eigye lye. ²⁰ Ensolo n’ekwatibwa era wamu nayo nabbi ow'obubbeyi eyakolere obubonero mu maiso gaayo bwe yabbeyeserye abo abaikirirya enkovu y'ensolo, n'abo abasinza ekifaananyi kyayo: bombiri ne basuulibwa nga balamu mu nyanza ey'omusyo eyaka n'ekibiriiti: ²¹ n'abaasigairewo ne baitibwa n'ekitala ky'oyo eyabbaire atyaime ku mbalaasi, ekiva mu munwa gwe: n'enyonyi gyonagyona ne giikuta ku nyama yaabwe.