¹ Oluvanyuma lw'ebyo ne mbona malayika ogondi ng'aika okuva mu igulu, ng'alina obuyinza bungi; n'ensi n'emulisibwa ekitiibwa kye. ² N'atumulira waigulu n'eidoboozi ery'amaani, ng'atumula nti Kigwire, kigwire Babulooni ekinene, ne kifuuka kisulo kya balubaale, n'eikomera erya buli dayimooni, n'eikomera erya buli nyonyi embibbi ekyayibwa. ³ Kubanga olw'omwenge gw'obusungu bw'obwenzi bwe amawanga gonagona gagwire; na bakabaka b'ensi ne benda naye, n'abatundi b'ensi ne bagaigawala olw'amaani g'obukaba bwe. ⁴ Ne mpulira eidoboozi erindi eriva mu igulu, nga litumula nti Mukifulumemu, abantu bange, muleke okwikirirya ekimu n'ebibbiibi bye era muleke okuweebwa ku bibonyoobonyo bye: ⁵ kubanga ebibbiibi bye bituukire mu igulu, era Katonda aijukiire ebyonoono bye. ⁶ Mumusasule oyo nga yeena bwe yasaswiire, era mumwongereku emirundi ibiri ng'ebikolwa bye bwe byabbaire: mu kikompe kye yatambwire mumutabulire emirundi ebiri. ⁷ Nga bwe yeegulumizia n'akabawala, mumuwe mutyo okubonaabona n'okunakuwala; kubanga atumula mu mu mwoyo gwe nti Ntyaime nga kabaka, so tindi namwandu, so tindibona enaku n'akatono. ⁸ Kyebiriva biiza mu lunaku olumu ebibonyoobonyo bye, okufa, n'enaku, n'enjala; era alyokyebwa dala omusyo; kubanga Mukama Katonda wa maani eyamusaliire omusango. ⁹ Era bakabaka b'ensi, abayendere na bakabawala naye, balikunga balikubba ebiwoobe ku lulwe, bwe balibona omwoka ogw'okwokyebwa kwe, ¹⁰ nga bemereire wala olw'entiisia ey'okubonaabona kwe, nga batumula nti Gibasangire, gibasangire, ekibuga ekinene Babulooni, ekibuga eky'amaani, kubanga mu saawa imu omusango gwo gutuukire. ¹¹ N'abatundi ab'omu nsi bakunga banakuwala ku lulwe kubanga wabula muntu akaali agula obuguzi bwabwe; ¹² obuguzi bwa zaabu, ne feeza, n'amabbaale ag'omuwendo, ne luulu, ne bafuta ensa, n'olugoye olw'efulungu, ne aliiri, n'olugoye olumyufu; na buli musaale ogw'omusita, na buli kintu eky'eisanga, na buli kintu eky'omusaale ogw'omuwendo omungi einu, n'eky'ekikomo, n'eky'ekyoma, n'eky'eibbaale eisa; ¹³ n'eky'akaloosa, n'ebinzaali, n'obubaani, n'omuzigo gw'omusita, n'envumbo, n'omwenge, n'amafuta, n'obwita obusa, n'eŋaanu, n'ente n'entama; n'obuguzi bw'embalaasi n'amagaali n'abaidu; n'emyoyo gy'abantu. ¹⁴ N'ebibala omwoyo gwo bye gwegomba bikuviireku, n'ebintu byonabyona ebiwooma n'ebisa bikuviireku, so tebakaali babona ate. ¹⁵ Abatundi b'ebyo, niibo beyagaigawairye, balyemerera wala olw'entiisia y'okubonaabona kwe, nga bakunga nga banakuwala; ¹⁶ nga batumula nti Gibasangire; gibasangire, ekibuga ekinene, ekyavaalisiibwe bafuta ensa n'olugoye olw'efulungu n'olumyufu, era ne kiyonjebwa ne zaabu n'amabbaale ag'omuwendo ne luulu! ¹⁷ kubanga mu saawa imu obugaiga obungi nga buno buzikiriire. Na buli mubbinga na buli atambula wonawona mu lyato n'abalunyanza ne bonabona abakola emirimu egy'omu nyanza, ne bemerera wala, ¹⁸ ne batumulira waigulu bwe baboine omwoka ogw'okwokyebwa kwe, nga batumula nti Kiruwa ekifaanana ng'ekibuga ekinene? ¹⁹ Ne bafuka enfuufu ku mitwe gyabwe, ne batumulira waigulu nga bakunga nga banakuwala, nga batumula nti Gibasangire, gibasangire, ekibuga ekinene, bonabona kye bagaigawaliramu abaalina ebyombo mu nyanza olw'omuwendo gwe omusa, kubanga mu saawa imu gwazikiriire. ²⁰ Mumusanyukire, eigulu mweena abatukuvu mweena abatume mweena banabbi; kubanga Katonda amusaliire omusango gwanyu. ²¹ Malayika ow'amaani n'asitula eibbaale einene ng'olubengo olunene, n'alisuula mu nyanza, ng'atumula nti Babulooni, ekibuga ekinene, bwe kirisuulibwa kityo n'okutandagirwa okunene, so tekiriboneka ate. ²² Waire eidoboozi ly'abakubbi b'enanga n'abalina ebivuga n'abafuuwa emirere n’abafuuwa amakondeere tiririwulirwa ate mu iwe; waire omugezi w'emirimu gyonagyona taliboneka ate mu igwe; waire eidoboozi ly'olubengo teririwulirwa ate mu igwe; ²³ waire okutangaala kw'etabaaza tekulitangaala ate mu iwe; waire eidoboozi ly'akwa omugole n'ery'omugole teririwulirwa ate mu iwe; kubanga abatundi niibo babbaire balangira b'ensi; kubanga mu bulogo bwo amawanga gonagona gabbeyebwa. ²⁴ Era n'omusaayi gwa banabbi n'abatukuvu n'ogwa bonabona abaitiibwe ku nsi gwabonekere mu iye.