¹ Naye ntumula nti omusika ng'akaali mutomuto tomwawula no mwidu n'akatono, waire nga niiye mukama wa byonabyona; ² naye afugibwa abasigire n'abawanika okutuusia ebiseera Itaaye bi yalagire eira. ³ Tutyo feena, bwe twabbanga abatobato, twabbanga baidu nga tufugibwa eby'oluberyeberye eby'omu nsi: ⁴ naye okutuukirira kw'ebiseera bwe kwatukire, Katonda n'atutumire Omwana we eyazaaliibwe omukali, eyazaaliibwe ng'afugibwa amateeka, ⁵ kaisi abanunule abaafugibwa amateeka, kaisi tuweebwe okufuuka abaana. ⁶ Era kubanga muli baana, Katonda yatumwire Omwoyo gw'Omwana we mu myoyo gyaisu; ng'akunga nti Abba, Itawaisu. ⁷ Kityo weena tokaali mwidu, naye mwana; oba ng'oli mwana, era oli musika ku bwa Katonda. ⁸ Naye mu naku gidi bwe mutaamanyanga Katonda, mwabbanga baidu ba badi abatali bakatonda mu buwangwa: ⁹ naye atyanu bwe mutegeire Katonda, oba ekisinga bwe mutegereibwe Katonda, mukyuka mutya enyuma mu bigambo eby'oluberyeberye ebibula maani ebinafu, ate bye mutaka okufugibwa omulundi ogw'okubiri? ¹⁰ Mukwata enaku n'emyezi n'ebiseera n'emyaka. ¹¹ Mbakeŋŋentererwa okutegana kwange gye muli okubba okw'obwereere. ¹² Mubbe nga nze, kubanga nzena ndi nga imwe, ab'oluganda mbeegayirire. Temunyonoonanga: ¹³ naye mumaite ng'olw'obunafu bw'omubiri nababuulire enjiri omulundi ogw'oluberyeberye: ¹⁴ era okukemebwa kwanyu okw'omu mubiri gwange temwakunyoomere so temwakulondoire, naye mwangikiriirye nga malayika owa Katonda, nga Kristo Yesu. ¹⁵ Kale okwetenda kwanyu kuli waina? kubanga ndi mujulizi wanyu nti, singa kyabbaire kisoboka, mwanditoiremu amaiso ganyu ne mugawa nze. ¹⁶ Kale nfukire mulabe wanyu nga mbabuulira amazima? ¹⁷ Beegondia gye muli naye ti kusa; naye kye bataka niikwo kubatakira ewanza, imwe kaisi mwegondienga gye bali: ¹⁸ Naye kisa abantu okwegondianga mu busa enaku gyonagyona, naye ti niinze lwe mba naimwe lwonka. ¹⁹ Abaana bange abatobato, abanuma ate okutuusa Kristo lw'alibumbibwa mu imwe, ²⁰ era nanditakire okubba naimwe atyanu, n'okuwaanyisia eidoboozi lyange, kubanga mbuusiabuusia olw'ebigambo byanyu. ²¹ Munkobere imwe abataka okufugibwa amateeka, temuwulira mateeka? ²² Kubanga kyawandiikibwe nti Ibulayimu yabbaire na abaana babiri, omumu wa muzaana, omumu weidembe. ²³ Naye ow'omuzaana yazaaliibwe lwo mubiri; naye ow'eidembe lwo kusuubizia. ²⁴ Ebyo byo lugero: kubanga Abakali abo niigyo ndagaano eibiri; eimu eva ku lusozi Sinaayi, egendi olw'obwidu, eyo niiye Agali. ²⁵ Agali oyo niirwo lusozi Sinaayi, oluli mu Buwalabu, era yekankana ne Yerusaalemi ekya atyanu: kubanga mwidu wamu n'abaana be. ²⁶ Naye Yerusaalemi eky'omu igulu niikyo ky'eidembe, niiye mawaisu. ²⁷ Kubanga kyawandiikiibwe nti Sanyuka, omugumba atazaala; Baguka okutumulira waigulu, atalumwa: Kubanga abaana b'oyo eyalekeibweyo bangi okusinga ab'oyo alina omusaiza: ²⁸ Naye ife, ab'oluganda, tuli baana ba kusuubiza nga Isaaka bwe yabbaire. ²⁹ Naye nga mu biseera bidi eyazaaliibwe olw'omubiri nga bwe yayiganirye eyazaaliibwe olw'Omwoyo, kityo ne atyanu. ³⁰ Naye ebyawandiikibwa bitumula bitya? nti Bbinga omuzaana n'omwana we: kubanga omwana w’omuzaana talisikira wamu n'omwana ow'eidembe. ³¹ Kale, ab'oluganda, ife tetuli ba muzaana, naye bo we idembe