¹ Imwe Abagalatiya ababula magezi, yani eyabalogere, so nga Yesu Kristo yakomereirwe nga mubona? ² Kino kyonka kye ntaka imwe okuntegeezia nti Mwaweweibwe Omwoyo lwa bikolwa bya mateeka oba lwo kuwulira kwo kwikirirya? ³ Mutyo bwe mubula magezi? Abaasookeire mu Mwoyo, atyanu mutuukiririzibwa mu mubiri? ⁴ Mwabonyaabonyezeibwe ebyekankana awo bya bwereere? so nga dala ti bwereere. ⁵ Abawa Omwoyo, akola eby'amaani mu imwe, akola lwe bikolwa bya mateeka oba lwo kuwulira kwo kwikirirya? ⁶ Nga Ibulayimu bwe yaikirirye Katonda, ne kumubalirwa okubba obutuukirivu. ⁷ Kale mutegeere ng'abemerera mu kwikirirya niibo baana ba Ibulayimu. ⁸ N'ekyawandiikibwa bwe kyaboine eira Katonda bw'aliwa amawanga obutuukirivu olw’okwikirirya, ne kibuulira oluberyeberye Ibulayimu enjiri nti Mu iwe amawanga gonagona mwe galiweerwa omukisa. ⁹ Kityo abemerera mu kwikirirya bawebwa omukisa awamu ne Ibulayimu eyabbaire okwikirirya. ¹⁰ Kubanga bonabona abemerera mu bikolwa by'amateeka, bafugibwa kikolimo: kubanga kyawandiikibwe nti Akolimiirwe buli atabinyiikirira byonabyona ebyawandiikiibwe mu kitabo ky'amateeka, okubikolanga. ¹¹ Era kimanyibwe nga mu mateeka wabula aweebwa butuukirivu eri Katonda: kubanga nti Abatuukirivu baabbanga balamu lwo kwikirirya; ¹² naye amateeka tigemerera mu kwikirirya; naye nti Omuntu agakola yabbanga mulamu mu igo. ¹³ Kristo yatununwire mu kikolimo ky'amateeka, bwe yafuukire ekikolimo ku lwaisu: kubanga kyawandiikibwe nti Akolimiirwe buli awanikiibwe ku musaale: ¹⁴ omukisa gwa Ibulayimu kaisi gutuuke eri amawanga mu Kristo Yesu; kaisi tuweebwe ekyasuubiziibwe eky'Omwoyo olw'okwikirirya. ¹⁵ Ab'oluganda, ntumula mu buntu: endagaano waire nga ya muntu buntu bw'emala okunywera wabula agitoolawo waire agyongeraku. ¹⁶ Ebyasuubiziibwe byakobeibwe Ibulayimu n'omwizukulu we. Tatumula nti N'eri abaizukulu, nga bangi, naye ng'omumu nti N'eri omuzzukulu we, niiye Kristo. ¹⁷ Kino kye ntumula nti Endagaano eyasookere okunywezebwa Katonda, amateeka agaizire nga wabitirewo emyaka bina mu asatu tegagitoirewo n'okudibya ekyasuubizibwe. ¹⁸ Kuba oba ng'obusika buva mu mateeka, nga tebuva ate mu kusuubiza: naye Katonda yabuwaire Ibulayimu olw'okusuubizia, ¹⁹ Kale amateeka kiki? Gatekeibwewo lwo kwonoona okutuusia w'aliziira omwizukulu eyasuubiziibwe, galagirwe bamalayika mu mikono gy'omutabaganya. ²⁰ Naye omutabaganya ti w'omumu; naye Katonda iye mumu. ²¹ Kale amateeka tigatabagana n'ebyasuubiziibwe Katonda? Kitalo: kuba singa amateeka gaaweebwa nga niigo gayinza okuleeta obulamu, dala obutuukirivu bwandibaire mu mateeka. ²² Naye ebyawandiikiibwe byasiigiibwe byonabyona mu bufuge bw'ekibbiibi, abaikirirya kaisi baweebwe ekyasuubizibwe ekiva mu kwikirirya Yesu Kristo. ²³ Naye okwikirirya nga kukaali kwiza, twakuumibwanga mu bufuge bwa mateeka, nga tusibibwa olw'okwikirirya okwaba okubikuliwa. ²⁴ Kityo amateeka yabbaire mutwali waisu eri Kristo, kaisi tuweebwe obutuukirivu olw'okwikirirya. ²⁵ Naye okukkirirya bwe kwamalire okwiza, tetukali mu bufuge bwo mutwali. ²⁶ Kubanga imwe mwenamwena muli baana ba Katonda olw'okwikirirya, mu Kristo Yesu. ²⁷ Kubanga mwenamwena abaabatiziibwe okuyingira mu Kristo, mwavaire Kristo. ²⁸ Wabula Muyudaaya, waire Omuyonaani, wabula mwidu waire ow'eidembe, wabula musaiza no mukazi: kubanga imwe mwenamwena muli mumu mu Kristo Yesu. ²⁹ Era imwe bwe muli aba Kristo, kale muli izaire lya Ibulayimu, era muli basika ng'okusuubizia bwe kwabbaire.