¹ Abaana abatobato, muwulirenga abazaire baanyu mu Mukama waisu: kubanga kino niikyo ekisa. ² Oteekangamu ekitiibwa itaawo ne maawo (niilyo eiteeka ery'oluberyeberye eririmu okusuubiza) ³ kaisi obbenga kusa, era owangaalenga enaku nyingi ku nsi. ⁴ mwena, baitawaabwe, temusunguwalyanga baana baanyu: naye mubalerenga mu kukangavulanga ne mu kubuuliriranga kwa Mukama waisu. ⁵ Abaidu, muwulirenga bakama baanyu ab'omubiri nga mulina okutya n'okutengera, omwoyo gwanyu nga gubulamu bukuusa, nga Kristo; ⁶ ti nga mu kuweereza okw'okungulu, ng'abaandi okusiimibwanga abantu; naye ng'abaidu ba Kristo, nga mukolanga n'omwoyo, Katonda by'ataka, ⁷ nga muweerezanga n'okutaka nga Mukama waisu so ti bantu: ⁸ nga mumaite nti buli muntu ekisa ky'akola, ky'aliweebwa ate eri Mukama waisu, oba mwidu oba w'eidembe. ⁹ mwena, bakama baabwe, mubakolenga mutyo, nga mulekanga okutiisia: nga mumaite nga Mukama waabwe era owanyu ali mu igulu, so wabula kusosola mu bantu gy'ali. ¹⁰ Eky'enkomerero, mubbenga n'amaani mu Mukama waisu ne mu buyinza obw'amaani ge. ¹¹ Muvaalenga ebyokulwanisia byonabyona ebya Katonda, kaisi musobolenga okwemerera eri enkwe gya Setaani. ¹² Kubanga tetukubbagana na musaayi na mubiri, naye n'abaamasaza, n'ab'obuyinza, n'abafuga ensi ab'omu ndikirirya eno, n'emyoyo egy'obubbiibi mu bifo ebya waigulu. ¹³ Kale mutwalenga ebyokulwanisia byonabyona ebya Katonda, kaisi muyinzenga okuguma ku lunaku olubbiibi, era bwe mulimala okukola byonabyona, musobole okwemerera. ¹⁴ Kale mwemererenga, nga mwesibire mu nkeende gyanyu amazima, era nga muvaire eky'omu kifubba obutuukirivu, ¹⁵ era nga munaanikire mu bigere okweteekateeka okw'enjiri ey'emirembe; ¹⁶ era ku ebyo byonabyona nga mukwatiireku engabo ey'okwikirirya, eyabasobozesianga okuzikizia obusaale bwonabwona obw'omusio obw'omubbiibi. ¹⁷ Muweebwe ne sepewo ey'obulokozi, n'ekitala eky'Omwoyo, niikyo kigambo kya Katonda: ¹⁸ nga musabanga buli kiseera mu Mwoyo n'okusaba n’okwegayiriranga kwonakwona mu kunyiikiranga kwonakwona n’okwegayiririranga abatukuvu bonabona, ¹⁹ era nzeena kaisi mpeebwe okutumulanga okwasamyanga omunwa gwange, okutegeezanga n'obuvumu ekyama eky'enjiri, ²⁰ gye mbeerera omubaka waayo mu lujegere; ntumulenga n'obuvumu mu iyo, nga bwe kiŋŋwanira okutumulanga. ²¹ Naye mwena kaisi mutegeere ebifa gye ndi bwe biri, Tukiko, ow'oluganda omutakibwa era omuweereza omwesigwa mu Mukama waisu alibategeeza byonabyona: ²² gwe mbatumiire olw'ensonga eno, kaisi mutegeere ebifa gye tuli, era abasanyusie emyoyo gyanyu. ²³ Emirembe gibbenga eri ab'oluganda, n'okutaka awamu n'okwikiriria ebiva eri Katonda Itwaisu ne Mukama waisu Yesu Kristo. ²⁴ Ekisa kibbenga n'abo bonabona abataka Mukama waisu Yesu Kristo mu butamala.