¹ Kale musengereryenga Katonda, ng'abaana abatakibwa; ² era mutambulirenga mu kutaka, era nga Kristo bwe yabatakire imwe, ne yeewaayo ku lwaisu okubba ekirabo era saddaaka eri Katonda okubba eivumbe eriwunya okusa. ³ Naye obwenzi n'obugwagwa bwonabwona n'okwegomba n'okutumulibwangaku tebitumulibwangaku mu imwe, nga bwe kigwanira abatukuvu ⁴ Waire eby'ensoni, waire ebirogyebwa eby'obusiru, waire okubalaata, ebitasaana: naye wakiri okwebalyanga. ⁵ Kubanga ekyo mukitegeerera kimu nga wabula mwenzi, oba mugwagwa, oba eyeegomba, niiye oyo asinza ebifaananyi, alina obusika mu bwakabaka bwa Kristo ne Katonda. ⁶ Omuntu yenayena tababbeyanga n'ebigambo ebibulamu: kubanga olw'ebyo obusungu bwa Katonda bwiza ku baana abatawulira. ⁷ Kale temwikiriryanga kimu nabo; ⁸ kubanga eira mwabbaire ndikirirya, naye atyanu muli musana mu Mukama waisu: mutambulenga ng'abaana b'omusana ⁹ (kubanga ebibala by'omusana biri mu busa bwonabwona n'obutuukirivu n'amazima), ¹⁰ nga mukeberanga Mukama waisu ky'ataka bwe kiri; ¹¹ so temwikiriryanga kimu n'ebikolwa ebitabala eby'endikirirya, naye wakiri mubibuulirirenga bubuulirizi; ¹² kubanga kye nsoni n'okubitumulaku ebyo bye bakola mu kyama. ¹³ Naye ebigambo byonabyona, bwe bibuulirirwa, omusana gubibonesia: kubanga buli ekibonesebwa niigwo musana. ¹⁴ Kyava atumulisia nti Zuuka, iwe agonere, ozuukire mu bafu, Kristo yakwakira. ¹⁵ Kale mumoge inu bwe mutambulanga, ti ng'ababula magezi, naye ng'abalina amagezi; ¹⁶ nga mweguliranga eibbanga, kubanga enaku gino mbibbi. ¹⁷ Kale temubbanga basirusiru, naye mutegeerenga Mukama waisu ky'ataka bwe kiri. ¹⁸ So temutamiiranga mwenge, kubanga mu gwo mulimu okwegayaigula, naye mwizulenga Omwoyo; ¹⁹ nga mutumulagananga mu zabbuli n'enyembo n'ebiyiiye eby'Omwoyo, nga mwembanga, nga mumukubbiranga enanga mu myoyo gwanyu Mukama waisu; ²⁰ nga mwebalyanga enaku gyonagyona olwa byonabyona Katonda Itawaisu mu liina lya Mukama waisu Yesu Kristo; ²¹ nga muwuliragananga mu kutya Kristo. ²² Abakali, muwulirenga baibawanyu, nga bwe muwulira Mukama waisu. ²³ Kubanga omusaiza niigwo mutwe gwo mukali we, era nga Kristo bw'ali omutwe gw'ekanisa, bw'ali omulokozi ow'omubiri mwene. ²⁴ Naye ng'ekanisa bw'ewulira Kristo, n'abakazi batyo bawulirenga baibawabwe mu buli kigambo. ²⁵ Abasaiza, mutakenga bakali banyu, era nga Kristo bwe yatakire ekanisa, ne yeewaayo ku lwayo; ²⁶ kaisi agitukulye ng'amalire okugirongoosia n'okuginaabya n'amaizi mu kigambo, ²⁷ kaisi agyereetere mwene ekanisa ey'ekitiibwa, nga ebula ibala waire olufunyiro waire kyonakyona ekifaanana nga bino; naye ebbe entukuvu ebulaku buleme. ²⁸ Era bwe kibagwaniire kityo abasaiza okutakanga bakali baabwe beene ng'emibiri gyabwe beene. Ataka mukali we mwene, yetaka yenka: ²⁹ kubanga wabula muntu eyabbaire akyawire omubiri gwe mweene, naye aguliisia, agujanjaba, era nga Kristo bw'ajanjaba ekanisa; ³⁰ kubanga tuli bitundu byo mubiri gwe. ³¹ Omuntu kyeyavaaga aleka itaaye ne maaye ne yeegaita no mukali we; boona bombiri baabbanga omubiri gumu. ³² Ekyama kino kikulu: naye ntumula ku Kristo n'ekanisa. ³³ Naye era mwena buli muntu atakenga mukali we nga bwe yetaka yenka; n'omukali atyenga ibaaye.