¹ Kale nze Pawulo, omusibe wa Yesu Kristo ku lwanyu ab'amawanga, - ² oba mwawuliire obuwanika obw'ekisa kya Katonda kye naweweibwe eri imwe; ³ bwe nategeezeibwe ekyama mu kubikkuliwa, nga bwe nawandikire eira mu bigambo ebitono, ⁴ ebiyinza okubategeeza, bwe mubisoma, okumanya kwange mu kyama kya Kristo; ⁵ ekitaategeezebwa mu mirembe egy'eira abaana b'abantu, nga atyanu bwe kibikkuliibwe abatume be abatukuvu ne banabi mu Mwoyo; ⁶ ab'amawanga okubba abasikira awamu, era ab'omubiri ogumu, era abaikirirya ekimu ekyasuubizibwe mu Kristo Yesu olw'enjiri, ⁷ gye nafuukiire omuweereza waayo, ng'ekirabo eky'ekisa kya Katonda bwe kiri kye naweweibwe ng'okukola kw'amaani ge bwe kuli. ⁸ Nze, omutomuto okusinga abatobato ab'omu batukuvu bonabona, naweweibwe ekisa kino, okubuuliranga ab’amawanga obugaiga bwa Kristo obutasagirikika; ⁹ n'okumulikiryanga bonabona babone okugaba kw'ekyama bwe kuli, ekyagisiibwe okuva eira n'eira lyonalyona mu Katonda eyatondere byonabyona; ¹⁰ atyanu abaamasaza n'ab'obuyinza mu bifo eby'omu igulu bategeezebwe mu kanisa amagezi amangi aga Katonda ag'engeri enyingi, ¹¹ ng'okumalirira bwe kuli mu Kristo Yesu Mukama waisu: ¹² mwe tutoola obuvumu bwaisu n'okusembera n'obugumu olw'okumwikirirya iye. ¹³ Kyenva nsaba imwe mulekenga okwiririra olw'ebibonoobono byange ku lwanyu, ebyo niikyo ekitiibwa kyanyu ¹⁴ Kyenva nfukaamirira Itawaisu, ¹⁵ buli kika eky'omu igulu n'eky'oku nsi kwe bitoola eriina, ¹⁶ abawe imwe, ng'obugaiga bw'ekitiibwa kye bwe buli, okunywezebwa n'amaani mu Mwoyo gwe mu muntu ow'omunda: ¹⁷ Kristo atyamenga mu myoyo g'yanyu olw'kwikirirya; mubbenga n'emmizi munywezebwenga mu kutaka, ¹⁸ kaisi muweebwe amaani okukwatanga n'amagezi awamu n'abatukuvu bonabona obugazi n'obuwanvu n'obugulumivu n'okwaaba wansi bwe biri, ¹⁹ n’okutegeera okutaka kwa Kristo okusinga okutegeerwa, kaisi mutuukirire okutuusia okutuukirira kwonakwona okwa Katonda. ²⁰ Kale oyo ayinza okukola einu okusingira kimu byonabyona bye tusaba oba bye tulowooza, ng'amaani bwe gali agakolera mu ife, ²¹ aweebwenga ekitiibwa mu kanisa ne mu Kristo Yesu okutuusia emirembe n'emirembe egitawaawo. Amiina.