¹ Era mwena yabazuukizirye bwe mwabbaire nga mufiiriire mu byonoono n'ebbibi byanyu, ² bye mwatambulirangamu eira ng'emirembe egy'ensi eno bwe giri, okusengereryanga omukulu w'obuyinza obw'omu ibbanga, omwoyo ogukolera atyanu mu baana abatawulira; ³ era fena fena be twatambulirangamu eira mu kwegomba kw'omubiri gwaisu, nga tukolanga omubiri n'ebirowoozo bye byebitaka, ne tubbanga olw'obuzaaliranwa abaana b'obusungu, nga n'abandi: ⁴ naye Katonda, kubanga niiye mugaiga w'ekisa, olw'okutaka kwe okungi kwe yatutakire ife, ⁵ era ife bwe twabbaire nga tufiiriree mu byonoono byaisu, yatufiire abalamu awamu ne Kristo (mwalokokere lwe kisa), ⁶ n'atuzuukizia wamu naye, n'atutyamisya wamu mu bifo eby'omu igulu mu Kristo Yesu: ⁷ mu mirembe egyaaba okwiza kaisi alage obugaiga obusinga einu obw'ekisa kye mu busa obuli gye tuli mu Kristo Yesu: ⁸ kubanga mwalokokere lwe kisa lwo kwikirirya; so tekwaviire gye muli: niikyo ekirabo kya Katonda: ⁹ tikwaviire mu bikolwa, omuntu yenayena aleke okwenyumirizianga. ¹⁰ Kubanga ife tuli mulimu gwe, abaatondeirwe mu Kristo Yesu olw'ebikolwa ebisa, Katonda bye yasookere okuteekateeka ife okubitambulirangamu. ¹¹ Kale mwijukire ng'eira imwe, ababbaire ab'amawanga mu mubiri, Abakomole be bayetere Abataakomoleibwe, mu mubiri okukolebwa n'emikono; ¹² nga mu biseera bidi mwabbaire nga muli wala ne Kristo, mwabbaire nga mubooleibwe mu kika kya Isiraeri, era mwabbaire banaigwanga eri endagaano egy'okusuubiza, nga mubula kusuubira, nga mubula Katonda mu nsi. ¹³ Naye atyanu mu Kristo Yesu imwe abaali ewala eira musembezeibwe olw'omusaayi gwa Kristo. ¹⁴ Kubanga iye niigyo emirembe gyaisu, eyafiire byombiri ekimu, n'amenyawo ekisenge ekya wakati ekyawula, ¹⁵ bwe yamalire okutoolawo mu mubiri gwe obulabe, tawuleti ey'ebiragiro ebiri mu mateeka; kaisi atonde mu iye mweene abo bombiri okubba omuntu omumu omuyaaka, okuleeta emirembe; ¹⁶ era kaisi atabaganye bombiri eri Katonda mu mubiri gumu olw'omusalaba, bwe yaitiire obulabe ku igwo: ¹⁷ n'aiza n'ababuulira enjiri ey'emirembe imwe ababbaire wala, n'emirembe ababbaire okumpi: ¹⁸ kubanga ku bw'oyo ife fembiri tulina okusembera kwaisu eri Itawaisu mu Mwoyo omumu. ¹⁹ Kale mutyo temukaali banaigwanga na batambula, naye muli be kika kimu n'abatukuvu, era bo mu nyumba ya Katonda, ²⁰ kubanga mwazimbiibwe ku musingi niibo batume na banabi, Kristo Yesu mweene bw'ali eibbaale einene ery'oku nsonda; ²¹ mu oyo buli nyumba yonayona, bw'egaitibwa okusa, ekula okubbanga yeekaalu entukuvu mu Mukama waisu; ²² mu oyo era mwena muzimbibwa wamu okubbanga ekisulo kya Katonda mu Mwoyo.