¹ naye tegeera kino nga mu naku egy'oluvanyuma ebiseera eby'okubona enaku biriiza. ² kubanga abantu balibba nga betaka bonka, abataka ebintu, abeenyumirizia, ab'amalala, abavumi, abatagondera bazaire baabwe, abateebalya, abatali batukuvu, ³ abatataka bo luganda, abatatabagana, abawaayirirya, abateegendereza, abakambwe, abatataka obusa, ⁴ ab'enkwe, abakakanyali, abeegulumizia, abataka eisanyu okusinga katonda; ⁵ nga balina ekifaananyi ky'okutya katonda, naye nga beegaana amaani gaakwo: era bona obakubbanga amabega. ⁶ kubanga ku abo niibo bantu abasenseire mu nyumba ne banyaga abakali abasirusiru abazitoowererwa ebibbiibi ebingi, abafugibwa okwegomba okutali kumu, ⁷ abeega bulijo, ne batasobola enaku gyonagyona okutuuka ku kutegeerera dala mazima. ⁸ era nga yane ne yambere bwe baaziyizire musa, na bano batyo baziyizia amazima; bayonooneka amagezi gaabwe, abatasiimibwa mu kwikirirya. ⁹ naye tebalyeyongeraku kubitirira: kubanga obusirusiru bwabwe bulitegeererwa dala abantu bonabona, era ng'obwa badi bwe bwabbaire. ¹⁰ naye iwe wasengereirye inu okwegeresya kwange, empisa gyange, okuteesia kwange, okwikirirya kwange, okugumiinkirizia kwange, okutaka kwange, okulindirira kwange, ¹¹ okuyiganyizibwa kwange, okubonaabona kwange; ebyambaireku mu antiyokiya, mu ikoniyo, mu lusitula; okuyiganyizibwa kwe nayiganyizibwanga bwe kwabbaire: era mukama waisu yandokoire mu byonabyona. ¹² naye era bonabona abataka mu kristo yesu okukwatanga empisa egy'okutya katonda bayiganyizibwanga. ¹³ naye abantu ababbiibi n'abeetulinkirirya balyeyongera okubitiriranga mu bubbiibi, nga babbeya era nga babbeyebwa. ¹⁴ naye iwe bbanga mu ebyo bye wayegere n'otegeerera dala, ng'omaite abakwegeresya bwe bali; ¹⁵ era ng'okuva mu butobuto wamanyanga ebyawandiikiibwe ebitukuvu ebisobola okukugeziwalya okuyingira mu bulokozi olw'okwikirirya okuli mu kristo yesu. ¹⁶ buli ekyawandikiibwe kirina okuluŋamya kwa katonda, era kigasa olw'okwegeresyanga, olw'okunenyanga, olw'okutereezanga, olw'okubuulira okuli mu butuukirivu; ¹⁷ omuntu wa katonda alekenga okubulwa kyonakyona, ng'alina ddala byonabyona olwa buli mulimu omusa.