¹ Ebisigaireyo, ab'oluganda, mu tusabirenga ekigambo kya Mukama waisu, kiwulukuke, kiweebwenga ekitiibwa, era nga mu imwe; ² era tulokoke eri abantu ababula magezi, ababbiibi; kubanga okwikirirya ti kwa bonabona. ³ Naye Mukama waisu mwesigwa, alibanywezia, yabakuumanga eri omubbiibi. ⁴ Era twesiga Mukama waisu mu bigambo byanyu, nga mukola bye tulagira era mwabikolanga. ⁵ Era Mukama waisu aluŋamyenga emyoyo gyanyu okutuuka mu kutaka kwa Katonda ne mu kuguminkiriza kwa Kristo. ⁶ Era tubalagira, ab'oluganda mu liina lya Mukama waisu Yesu Kristo, mweyawulenga eri buli ow'oluganda atatambula kusa waire mu mpisa gye baaweweibwe ife. ⁷ Kubanga imwe beene mumaite bwe kibagwanira okutusengereryanga: kubanga tetwalemereirwe kutambula kusa mu imwe; ⁸ so tetulyanga mere yo muntu yenayena yo bwereere, naye mu kufuba n’okukoowa twakolanga emirimu obwire n'emisana obutazitoowerera muntu ku imwe: ⁹ ti kubanga tubula buyinza, naye tweweeyo gye muli ng'ekyokuboneraku kaisi mutusengereryenga. ¹⁰ Kubanga era bwe twabbaire gye muli, twabalagiire tutyo nti Omuntu yenayena bwagaananga okukola emirimu, n'okulya talyanga. ¹¹ Kubanga tuwulira nti eriyo abamu abatatambula kusa mu imwe nga tebakola mirimu gyabwe n'akatono (n'akadidiiri), wabula egy'abandi. ¹² Abali batyo tubalagira era tubabuulirira mu Mukama waisu Yesu Kristo, okukolanga emirimu n'obuteefu kaisi balyenga emere yaabwe ibo. ¹³ Naye imwe, ab'oluganda, temukoowanga mu kukola okusa. ¹⁴ Era omuntu yenayena bw'atagonderanga kigambo kyaisu mu bbaluwa eno, oyo mumwetegerezianga, so temwegaitanga naye, ensoni kaisi gimukwate. ¹⁵ So temumulowoozanga ngo mulabe, naye mumubuuliriranga ng'ow'oluganda. ¹⁶ Era Mukama waisu ow'emirembe mweena abawenga emirembe enaku gyonagyona mu bigambo byonabyona. Mukama waisu abbenga naimwe mwenamwena. ¹⁷ Kuno niikwo kusugirya kwange Pawulo n'omukono gwange, niiko kabonero mu bbaluwa yonayona: ntyo bwe mpandiika. ¹⁸ Ekisa kya Mukama waisu Yesu Kristo kibbenga naimwe mwenamwena