¹ Naye tubeegayirira, ab'oluganda, olw'okwiza kwa Mukama waisu Yesu Kristo n'olw'okukuŋaana kwaisu gy'ali; ² obutasagaasagana mangu mu magezi ganyu, waire okweraliikirira waire olw'omwoyo, waire olw'ebbaluwa efaanana ng'eviire gye tuli, nti olunaku lwa Mukama waisu lutuukire; ³ omuntu yenayena tababbeyanga mu kigambo kyonakyona: kubanga olunaku olwo teruliiza wabula ng'okwawukana kudi kumalire kubbaawo, era omuntu odi ow'okwonoona nga alimala okubikuliwa, omwana w'okuzikirira, ⁴ aziyizia era eyeegulumiza okusinga buli kintu ekyetebwa Katonda oba ekisinzibwa, n'okutyama n'atyama mu yeekaalu ya Katonda, nga yeeraga yenka nti niiye Katonda. ⁵ Temwijukira, nga bwe nabbaire nga nkaali naimwe, nabakobeire ebyo? ⁶ Era ne atyanu ekiroberya mukimanyi, kaisi abikuke mu ntuko ye. ⁷ Kubanga ne atyanu ekyama eky'obujeemu kiriwo kikola: wabula kyoka aziyizya atyanu okutuusya lw'alitolebwawo. ⁸ Awo omujeemi odi kaisi n'abikuka, Mukama waisu Yesu gw'aliita n'omwoka ogw'omu munwa gwe, era gw'alizikirirya n'okubonesebwa kw'okwiza kwe; ⁹ naye okwiza kw'oyo kuli mu kukola kwa Setaani n'amaani gonagona n'obubonero n'eby'amagero eby'obubbeyi, ¹⁰ n'okukyamya kwonakwona okutali kwo butuukirivu eri abo abagota; kubanga tebaikirirye kutaka mazima, kaisi balokoke. ¹¹ Katonda kyava abasindikira okukyamya okukola, baikirirye eby'obubbeyi: ¹² Bonabona kaisi basalirwe omusango abataikirirye mazima naye abasanyukiire obutali butuukirivu. ¹³ Naye Kitugwaniire ife okwebalyanga Katonda enaku gyonagyona ku lwanyu, ab'oluganda abatakibwa Mukama waisu, kubanga Katonda yabalondeire bulokozi okuva ku luberyeberye mu kutukuzibwa Omwoyo n'okwikirirya amazima ¹⁴ bye yabeteire n'enjiri yaisu olw'okufuna ekitiibwa kya Mukama waisu Yesu Kristo. ¹⁵ Kale ab'oluganda, mwemererenga, era munywezenga bye mwaweweibwe ne mwegeresebwa, oba mu kigambo oba mu bbaluwa yaisu. ¹⁶ Naye Mukama waisu Yesu Kristo mwene, ne Katonda Itawaisu, eyatakire n'atuwa okusanyusa okutawaawo n'eisuubi eisa mu kisa, ¹⁷ abasanyusie emyoyo gyanyu aginywezienga mu buli kikolwa n'ekigambo ekisa.