¹ Pawulo ne Sirwano ne Timoseewo eri ekanisa ey'Abasesalonika mu Katonda Itawaisu ne Mukama waisu Yesu Kristo; ² ekisa kibbenga gye muli n'emirembe ebiva eri Katonda Itawaisu ne Mukama waisu Yesu Kristo. ³ Kitugwaniire okwebalyanga Katonda enaku gyonagyona ku lwanyu, ab'oluganda, nga bwe kisaana, kubanga okwikirirya kwanyu kukula inu, n'okutakagana kwa buli muntu ku imwe mwenamwena mwenka na mwenka kweyongera; ⁴ feena beene n'okwenyumirizia ne twenyumirizia mu imwe mu kanisa gya Katonda olw'okuguminkiriza kwanyu n'okwikirirya mu kuyiganyizibwa kwanyu kwonakwona n'okubonaabona kwe muzibiikirizia; ⁵ ebyo niiko kabonero k'omusango gwa Katonda ogw'ensonga; kaisi musaanyizibwe obwakabaka bwa Katonda, n'okubonaabona bwe mubonaabonera: ⁶ oba nga kye nsonga eri Katonda okubasasula okubonaabona abababonyaabonya, ⁷ era mweena ababonyaabonyezebwa okubasasula okwesiima awamu naife, mu kubikulibwa kwa Mukama waisu Yesu okuva mu igulu awamu na bamalayika ab'obuyinza bwe, ⁸ mu musyo ogwaka, ng'awalana eigwanga abatamaite Katonda, boona abatagondeire njiri ya Mukama waisu Yesu: ⁹ abalibonerezebwa, niikwo kuzikirira emirembe n'emirembe okuva mu maiso ga Mukama waisu no mu kitiibwa ky'amaani ge, ¹⁰ bw'aliiza okuweebwa ekitiibwa mu batukuvu be, n'okwewuunyizibwa mu bonabona abaikirirya (kubanga okutegeeza kwaisu gye muli kwaikirizibwe) ku lunaku ludi. ¹¹ Kyetuva tubasabira enaku gyonagyona, Katonda waisu abasaanyizie okwetebwa kwanyu, era atuukirirye n'amaani buli kye mutaka eky'okusa na buli mulimu ogw'okwikirirya; ¹² eriina lya Mukama waisu Yesu kaisi liweebwe ekitiibwa mu imwe, era mweena mu iye, ng'ekisa kya Katonda waisu no Mukama waisu Yesu Kristo bwe kiri.